ޕީއެންސީ ފިކުރުގެ ސިޔާސަތެއް ނެތް، އިރުއިރުކޮޅާ އެކި ލޯގޯގައި އަންނަން ޖެހެނީ އެހެން ވެގެން: އާޒިމް
ޕީއެންސީއަކީ ސިޔާސަތެއް ނެތް، އިތުބާރު ނުހިފޭ ބައެއް ކަމަށާއި މި ސަރުކާރުން ރައްޔިތުންނަށް ވީ ވައުދުތައް ނުފުއްދޭ ކަމަށް މާލޭގެ މޭޔަރު އާދަމް އާޒިމް ވިދާޅުވި.
މާލޭގެ މޭޔަރ އަދި މޭޔަރ ކެނޑިޑޭޓް އާދަމް އާޒިމް އެމްޑީޕީގެ ކަންމަތީ ޖަލްސާގައި ވާހަކަދައްކަވަނީ | ރާއްޖެ އެމްވީ
ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ފިކުރުގެ ސިޔާސަތެއް ނެތް، އިރުއިރުކޮޅާ އެކި ލޯގޯގައި އަންނަން ޖެހެނީ އެހެން ވެގެން ކަމަށް މާލޭގެ މޭޔަރ އަދި މޭޔަރ ކެނޑިޑޭޓް އާދަމް އާޒިމް ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ކަންމަތީ ޖަލްސާގައި ބުރާސްފަތި ދުވަހުގެ ރޭ ވާހަކަދައްކަވަމުންނެވެ.
ޕީއެންސީ އިން 3 ވަނަ އިންތިޚާބަކަށް ކުރިމަތިލާ އިރު މިހާތަނަށް ކޮށްދެވުނީ ކޮން ކަމެއްތޯ އާޒިމް ވަނީ ސުވާލު އުފައްދަވާފަ އެވެ. އެ ފިކުރުގެ މީހުންނަށް ކުރެވޭހާ ވެސް ކަމަކީ ރައްޔިތުންނަށް އުނދަނގޫކޮށް ދޮގުހެދުން ކަމަށް އާޒިމް ވަނީ ވިދާޅުވެފަ އެވެ. މި ސަރުކާރުން މާލެ އަށް ވެސް ކޮށްދިން ކަމެއް ނެތް ކަމަށް އޭނާ ވިދާޅުވި އެވެ. އެއާ ޚިލާފަށް އެމްޑީޕީ އަކީ ރައްޔިތުންނަށް ބޭނުންވާ ކަންކަން ކޮށްދޭނެކަން ސާބިތުކޮށްދީފައިވާ އިތުބާރު ހިފޭ ބައެއް ކަމަށް އާޒިމް ވިދާޅުވި އެވެ.
"ކޮންމެ ފަހަރަކު ވެރިކަން ލިބުމާއި އެކު ފޮނިކަނޑަމުން، ދޮގު ހަދަމުން އެ ދުވަނީ. ދެން ވެރިކަމަށް އައިސް ބުނި ކަންކަން ނުކުރެވުނީމަ ޕާޓީގެ ލޯގޯ ބަދަލުކުރަން ޖެހޭނީ. އަނެއްކާވެސް އާ ލޯގޯ އެއް ހިފައިގެން އަންނަން ޖެހެނީ." އާޒިމް ވިދާޅުވި އެވެ.
އާޒިމް ވަނީ ޕީއެންސީ އަކީ އިތުބާރު ހިފޭ ބައެއް ނޫން ކަމަށް ވިދާޅުވެފަ އެވެ. މިހާތަނަށް އައި އިރު ރައްޔިތުންނަށްޓަކާ ސަރުކާރަށް ކޮށްދެވުނު ކަމެއް ނެތް ކަމަށް ވެސް އާޒިމް ވިދާޅުވި އެވެ. ލޯކަލް ކައުންސިލް އިންތިޚާބަށް އެމްޑީޕީ އިން ކުރިމަތިލަނީ ރައްޔިތުންނަށް ދިމާވެފައި ހުރި މުހިންމު ކަންކަން އެމްޑީޕީ އިން ހައްލުކޮށްދިނުމަށް ފަހުގައި ކަމަށް އާޒިމް ވިދާޅުވި އެވެ. އެގޮތުން އޭނާގެ މޭޔަރ ކަމުގައި މާލެ އަށް ބޭނުންވާ ކަންކަން ކޮށްދީފައިވާނެ ކަމަށް އާޒިމް ފާހަގަކުރެއްވި އެވެ.
މިއަދު ރައީސް ޑރ. މުހައްމަދު މުއިއްޒު ގެންދަވަނީ ކުރިން ވީ ވައުދުތައް ހަނދާން ނައްތާލެއްވުމަށް ފަހު އާ ވައުދުތައް ވަމުން ކަމަށް އާޒިމް ވިދާޅުވި އެވެ. އެހެންކަމުން ސަރުކާރުން ވީ ވައުދުތައް ސަރުކާރަށް ނުފުއްދޭ ކަމަށް އާޒިމް ވިދާޅުވި އެވެ. އާޒިމް ވަނީ މި ސަރުކާރު އޮވެގެން ރައްޔިތުންނަށް ބޭނުންވާ ކަންކަން ކުރެވޭނީ ރައްޔިތުން ސަރުކާރަށް ޕްރެޝަރކޮށްގެން ކަމަށް ވިދާޅުވެފަ އެވެ. އެކަން ކުރެވޭނީ އެމްޑީޕީ އަށް ވޯޓު ދީގެން ކަމަށް ވެސް އާޒިމް ވަނީ ވިދާޅުވެފަ އެވެ. ވޯޓު ފޮށްޓަކީ ސަރުކާރަށް ޖަވާބު ދިނުމަށް ލިބޭ ފުރުސަތެއް ކަމަށް އާޒިމް ވަނީ ވިދާޅުވެފަ އެވެ. މިއީ މި ދޮގުވެރި ސަރުކާރަށް ނޫނެކޭ ބުނުމަށް ލިބޭ ރަނގެ ފުރުސަތެއް ކަމަށް އޭނާ ވަނީ ވިދާޅުވެފަ އެވެ.
