ޓްރަމްޕްއާ ދެކޮޅަށް "ނޯ ކިންގްސް"ގެ ނަމުގައި އެމެރިކާގެ 3،200 އަށް ވުރެ ގިނަ ސަރަހައްދު ތަކުގައި މުޒާހަރާ ކުރަނީ

އެމެރިކާގެ ރައީސް ޑޮނަލްޑް ޓްރަމްޕް އާއި، އޭނާގެ ސަރުކާރުގެ ސިޔާސަތުތަކާ ދެކޮޅަށް "ނޯ ކިންގްސް"ގެ ނަމުގައި ކުރިއަށް ގެންދާ ސިލްސިލާ މުޒާހަރާ ތަކުގެ ތެރެއިން މި އަންނަ ހޮނިހިރު ދުވަހު އެއްވުން ތަކެއް ބާއްވަން ތައްޔާރުވެއްޖެ އެވެ.

އެމެރިކާގެ އެކި ކަންކޮޅު ތަކުގައި މި އަންނަ ހޮނިހިރު ދުވަހު މި އެއްވުން އޮންނައިރު، ޙަރަކާތް އިންތިޒާމު ކުރާ ފަރާތުން ބުނެފައިވާ ގޮތުގައި ހުރިހާ ސްޓޭޓެއް ހިމެނޭ ގޮތަަށް، 3،200 އަށް ވުރެ ގިނަ ސަރަަހއްދުގައި އެއްވުންތައް ބޭއްވުމަށް ރޭވިފައިވާ ކަމަށެވެ. މިއީ އެމެރިކާގެ ތާރީޚުގައި ވެސް، އެއް ދުވަހެއްގެ ތެރޭގައި ބާއްވާ އެންމެ ބޮޑު ސުލްޙަވެރި އިހުތިޖާޖަށް ވެގެންދާނެ ކަމަށް އުންމީދު ކުރާ ކަމަށް ވެސް، މި ޙަރަކާތް އިންތިޒާމު ކުރާ ފަރާތް ތަކުން ވަނީ ބުނެފަ އެވެ. 

މި ޙަރަކާތުގެ މައި އެއްވުންތައް ނިއުޔޯކް، ލޮސް އެންޖެލިސް، ވޮޝިންޓަން ޑީސީ އަދި މިނެސޯޓާގެ ޓްވިން ސިޓީސްގައި ބޭއްވުމަށް ވަނީ ހަމަޖެހިފަ އެވެ. ނަމަވެސް، މިފަހަރުގެ މުޒާހަރާގެ ބައިވެރިންގެ ތެރެއިން ތިން ބައި ކުޅަ ދެ ބައި މީހުންނަކީ ބޮޑެތި ސިޓީ ތަކުން ބޭރުގައި ދިރިއުޅޭ މީހުން ކަމަށް ލަފާ ކުރެވެ އެވެ. މިއީ މިދިޔަ އަހަރުގެ ޖޫން މަހު ބޭއްވި ފުރަތަމަ މުޒާހަރާއާ އަޅާ ބަލާއިރު، ކުދި އަވަށް ތަކުން ބައިވެރިވާ މީހުންގެ އަދަދު 40 އިންސައްތަ އިތުރުވުމެވެ. 

މި ޙަރަކާތް ފެށި "އިންޑިވިޒިބަލް" ގްރޫޕުގެ ކޯ ފައުންޑާ ލިއާ ގްރީންބާގް ވިދާޅުވީ، މި ހޮނިހިރު ދުވަހުގެ މުޒާހަރާގެ އެންމެ މުހިންމު ކަމަކީ މުޒަހަރާ ކުރާ މީހުންގެ އަދަދު އެކަނި ނޫން ކަަމަށާއި، މުޒާހަރާ ކުރިއަށްދާ ސަރަހައްދުތައް ވެސް މުހިންމު ކަމަށެވެ. 

މިއަހަރުގެ ފަހު ކޮޅު އެމެރިކާގެ މިޑްޓާމް އިންތިޚާބު އޮންނައިރު، ވެރިކަން ކުރާ ރިޕަބްލިކަން ޕާޓީގެ ބާރުގަދަ އައިޑަހޯ، ވައޯމިން، މޮންޓާނާ އަދި ޔޫޓާ ފަދަ ސްޓޭޓް ތަކުގައި ވެސް މުޒާހަރާ އިިންތިޒާމު ކުރުމާއި، ބައިވެރިވުމަށް ރަޖިސްޓްރީވާ މީހުންގެ އަދަދު ވަރަށް ބޮޑަށް އިތުރުވެފައިވާ ކަމަށް އިންތިޒާމު ކުރާ ފަރާތް ތަކުން ފާހަގަ ކުރެ އެވެ. 

މީގެ އިތުރުން އިންތިޚާބުގެ ނަތީޖާ އަނބުރާލުމުގައި މުހިންމު ދައުރެއް އަދާ ކުރާ ޕެންސިލްވޭނިއާ އާއި، ޖޯޖިއާ އަދި އެރިޒޯނާގެ ސަބާބަން ސަރަހައްދު ތަކުގައި ވެސް މި ޙަރަކާތަށް އޮތް ޝައުޤުވެރިކަން ބޮޑުވެފައިވާ ކަމަށް ގްރީންބާގް ވިދާޅުވި އެވެ. އޭނާ ވިދާޅުވީ، އިންތިޚާބު ތަކުގެ ނަތީޖާ ކަނޑައަޅާ ވޯޓުލާ މީހުން މިހާރު ތިބީ ވަރަށް ބޮޑަށް ކޯފާވެފައި ކަމަށާއި، އެ މީހުން މަގު ތަކަށް ނިކުމެ އިހުތިޖާޖު ކުރަމުންދާ ކަމަށެވެ. 

މި މުޒާހަރާއާ ގުޅޭ ގޮތުން އެމެރިކާގެ ރިޔާސީ ގަނޑުވަރު، ވައިޓް ހައުސްގެ ތަރުޖަމާނު އެބިގޭލް ޖެކްސަން ނެރުއްވި ބަޔާނެއްގައި ވިދާޅުވީ، މިއީ ހަަމައެކަނި ނޫސްވެރިންގެ ޝައުޤުވެރިކަން އޮތް "ޓްރަމްޕް ޑިރޭންޖްމަންޓް ތެރަޕީ ސެޝަން ތަކެއް" ކަމަށެވެ. މި ހޮނހިރު ދުވަހަކީ ނޯ ކިންގްސް ހަރަކާތުގެ ތިން ވަނަ ބޮޑު އެއްވުމެވެ. މި ޙަރަކާތް ފުރަތަމަ ފަށާފައި ވަނީ 2025 ވަނަ އަހަރުގެ ޖޫން މަހުގެ 14 ވަނަ ދުވަހު އެވެ. އެ އަހަރު ޙަރަކާތް ފަށާފައި ވަނީ ޓްރަމްޕްގެ އުފަން ދުވަހާ ދިމާކޮށެވެ. 

އެފަހަރު 2،100 ސަރަހައްދެއްގައި ހަތަރު މިލިއަނާއި، ހަ މިލިއަނާ ދެމެދުގެ އަދަދަކަށް މީހުން ބައިވެރިވި އެވެ. އަދި އޮކްޓޫބަރު މަހު ބޭއްވި ދެ ފަހަ މުޒާހަރާގައި 2،700 އަށް ވުރެ ސިޓީ އިން ހަތް މިލިއަނެއްހާ މީހުން ބައިވެރިވި ކަމަށް ތަފާސް ހިސާބު ތަކުން ދައްކަ އެވެ. 

އޮކްޓޫބަރު މަހުގެ މުޒާހަރާ ބޮޑަށް އަމާޒުވީ ސަރުކާރު ބަންދު ކުރުމާއި، އިމިގްރޭޝަން އިދާރާ ތަކުން ހިންގި ހަރުކަށި އޮޕަރޭޝަން ތަކާއި، ބޮޑެތި ސިޓީ ތަކަށް ނެޝަނަލް ގާޑް ސިފައިން ފޮނުވުމާ ދެކޮޅަށެވެ. ނަމަވެސް، މިފަހަރުގެ މުޒާހަރާގެ މައިގަނޑު ސަބަބަކީ، އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައާ ދެކޮޅަށް އަޑު އުފުލުމެވެ. 

އެމެރިކާގެ ސިވިލް ލިބަޓީސް ޔޫނިއަން (އޭސީއެލްޔޫ)ގެ ޗީފް ޕޮލިޓިކަލް އެންޑް އެޑްވޮކަސީ އޮފިސަރު ޑިއާޑްރާ ޝިޕެލިން ވިދާޅުވީ، މިފަދަ މުޒާހަރާ ތަކުގެ ސަބަބުން ހެޔި ބަދަލު ތަކެއް އަންނަ ކަމަށެވެ. އޭނާ މިސާލު ދެއްކެވީ ލިސް އެންޖެލިސް އަށް ނެޝަނަލް ގާޑް ފޮނުވުމާއި، މިނިއަޕޮލިސްގައި އައިސީއީ އެޖެންޓުން އެމެރިކާގެ ދެ ރައްޔިތަކު މަރާލުމާ ގުޅިގެން ކުރި މުޒާހަރާ ތަކަށް ފަހު، ސަރުކާރުން އެ ނިންމުންތައް ބަދަލު ކުރި ކުރުމަށެވެ. ޝިޕެލިން ވިދާޅުވީ، ރައީސް ޓްރަމްޕް ބާރުގެ ބޭނުން ނަހަމަ ގޮތުގައި ހިއްޕަވާއިރު، އެކަމާ ދެކޮޅަށް ތެދުވުމުން ޓްރަމްޕް ފަހަތަށް ޖެހިވަޑައިގަންނަވާ ކަަމަށެވެ.