އޭޕްރީލް 4 ގައި ބާއްވާ އިންތިޚާބުތައް ކާމިޔާބު ކުރުމަށް ސަރުކާރުން ދަނީ ނުރަނގަޅު މައުލޫމާތު ފޯރުކޮށްދެމުން: އެމްޑީޕީ
އަބްދުﷲ ރަޝީދު ހަސަން ވިދާޅުވީ ކުރިއަށް އޮތް އިންތިޚާބުގައި ވޯޓުލާނެ ގޮތުގެ ނުރަނގަޅު މައުލޫމާތު ފަތުރައި، ރައްޔިތުންނަށް ކަންކަން އޮޅުވާލުމަށް ސަރުކާރުން މަސައްކަތް ކުރަމުންދާ ކަމަށް. އޭނާ ވިދާޅުވީ ގިނަ އަދަދެއްގެ ވޯޓު ބާތިލުކުރުވުމަށް ސަރުކާރުން ރާވައިގެން މަސައްކަތް ކުރަމުންދާއިރު، ދައުލަތުގެ މީޑިއާއިން ވެސް ރައްޔިތުން ހޭލުންތެރިކުރުވުމަށް އިހުމާލުވަމުންދާ ކަމަށް. އެހެންކަމުން، ސިނާއީ ރަށްތަކާއި ރިސޯޓުތަކުގައި ވޯޓު ފޮށި ނުބެހެއްޓި ނަމަވެސް، ސަރުކާރަށް "ނޫނެކޭ" ބުނުމަށްޓަކައި ހުރިހާ ރައްޔިތުން ވެސް ވޯޓުލުމަށް އޭނާ ގޮވާލެއްވި.
އާދިއްތަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ގައުމީ މަޖިލީހުގެ މެންބަރު އަބްދުﷲ ރަޝީދު ހަސަން ވާހަކަ ދައްކަވަނީ. | ރާއްޖެއެމްވީ
މިސަރުކާރުން ކުރިއަށް އޮތް ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބު ކާމިޔާބު ކުރުމަށްޓަކައި ވޯޓު ބާތިލުވާ ގޮތަށް ނުރަނގަޅު މައުލޫމާތު ފޯރުކޮށްދެމުންދާ އެމްޑީޕީން ބުނެފި އެވެ.
އާދިއްތަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ގައުމީ މަޖިލީހުގެ މެންބަރުން އަބްދުﷲ ރަޝީދު ހަސަން ވިދާޅުވީ އޭޕްރީލް މަހުގެ 4 ވަނަ ދުވަހު ކުރިއަށް ގެންދާ އިންތިޚާބުތައް ސަރުކާރުން ކާމިޔާބު ކުރުމަށް ފުރިހަމަ މައުލޫމާތުތައް ރައްޔިތުންނަށް ފޯރުކޮށް ނުދޭ ކަމަށާއި، ރައްޔިތުން ހޭލުންތެރި ނުކުރުވާ ކަމަށެވެ.
ވޯޓު ކަރުދާސްކޮޅުގައި ފާހަގަ ޖަހާނެ ގޮތް ވަރަށް ބޮޑަށް އޮޅުވާލާފައިވާކަން ފާހަގަކުރައްވައި އޭނާ ވިދާޅުވީ ގިނަ ވޯޓުތަކެއް ބާތިލްވުމަކީ މިސަރުކާރުގެ ބޭފުޅުން ބޭނުންވާ ގޮތް ކަމަށާއި، ދައުލަތުގެ މީޑިއާއިން މިފަދަ މައުލޫމާތުތައް އާއްމު ނުކުރާ ކަމަށެވެ.
އެޕްރީލު މަހުގެ ހަތަރު ވަނަ ދުވަހު މި ނެގޭ ވޯޓުގައި ވަނީ ވޯޓު ކަރުދާސްކޮޅެއް އިލެކްޝަންސް ކޮމިޝަނުން ތައްޔާރުކޮށްފައި އާއްމުކޮށްފައި. މި ވޯޓު ބާތިލުވާނެ ގޮތާއި، ސައްހަވާނެ ގޮތްތަކުގެ މައުލޫމާތު ވެސް އިލެކްޝަންސް ކޮމިޝަންގެ ވެބްސައިޓުން ފެންނަން އެބަހުރި. އެހެންނަމަވެސް، އާއްމު ރައްޔިތުންނަށް މިކަމުގެ މައުލޫމާތާއި، ސަރުކާރަށް ނިސްބަތްވާ އެކިއެކި ބޭފުޅުން އެކިއެކި ބައްދަލުވުންތަކުގައާއި، އެކިއެކި ޖަލްސާތަކުގައި، ޚާއްސަކޮށް ޑޯޓުބްރޯތަކުގައި މި ދަނީ ދޮގު މައުލޫމާތުދީ، އެކަން އޮޅުވާލުމަށް މަސައްކަތްކުރަމުން.އެމްޑީޕީ ގައުމީ މަޖިލީހުގެ މެންބަރުން އަބްދުﷲ ރަޝީދު ހަސަން
މީގެ އިތުރުން މި އިންތިޚާބުތަކުގައި ގިނަ ރައްޔިތުން ވޯޓުން މަހުރޫމްވެފައިވާތީ އެކަމުގެ ކަންބޮޑުވުން ފާޅު ކުރައްވައި އަބްދުﷲ ރަޝީދު ހަސަން ވިދާޅުވީ ހީލަތްތެރިކަމާއެކު ވޯޓު ކާމިޔާބު ކުރުމަށް ސަރުކާރުން ކުރާ މަސައްކަތްތަކަށް ރައްޔިތުން ވަރަށް ބޮޑަށް ފާރަވެރިވާން ޖެހޭ ކަމަށެވެ. އަދި ސިނާއީ ރަށްތަކާއި ރިސޯޓުތަކުގައި ވޯޓު ފޮށި ނުބެހެއްޓި ނަމަވެސް ސަރުކާރަށް ނޫނެކޭ ބުނުމަށްޓަކައި ވޯޓު ލުމަށް އޭނާ ގޮވާލެއްވި އެވެ.
