އެމްއެމްއޭގެ ތިޖޫރީގައި އޮތީ ދެ ޕެކެޓް ކަރުބޮލަ، އަންނަ މަހު 4 ގެ ފަހުން ހުރިހާ ރަށަކުން ކަރަންޓު ކަނޑާނެ: ގަފޫރު

މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތިޖޫރީގައި އޮތީ ދެ ޕެކެޓް ކަރުބޮލަކް ކަމަށާއި، އަންނަ މަހު 4 ގެ ފަހުން ހުރިހާ ރަށަކުން ކަރަންޓު ވެސް ކަނޑަން ފަށާނެ ކަމަށް އެމްޑީޕީގެ ވަގުތީ ޗެއަރޕާސަން އަބްދުލް ޣަފޫރު މޫސާ (ގަޕޯ) ވިދާޅުވެއްޖެ އެވެ.

ހުކުރު ދުވަހުގެ ރޭ ފުވައްމުލަކު ސިޓީގައި އެމްޑީޕީން ބޭއްވި ޖަލްސާގައި ހަނިމާދޫ ދާއިރާގެ ރައްޔިތުންގެ މަޖިލީހުގެ މެންބަރުގެ ގޮތުގައި ވެސް ހުންނެވާ ޣަފޫރު ވިދާޅުވީ، ފެހި ގާނޫނު އަސާސީއާއެކު ރާއްޖޭގެ ވެރިކަމަށް އައި އެއްވެސް ސަރުކާރަކަށް ބަޖެޓު ނުދޭ މިންވަރަށް ރައީސް ޑރ. މުހައްމަދު މުއިއްޒުގެ ސަރުކާރަށް ބޮޑު ބަޖަޓެއް ދީފައިވާ ކަމަށާއި، ނަމަވެސް ރައްޔިތަކަށް އަދި ރަށަކަށް ވެސް އެއްވެސް ކަމެއް ކޮށްދީފައިނުވާ ކަމަށެވެ.

ނަމަވެސް ބަޖެޓު ހުސްވެފައިވާ ކަމަށާއި، ފާޅުގައި މުޅި ދައުލަތުން ވައްކަން ކުރަމުންދާ ކަމަށް ގަފޫރު ވިދާޅުވި އެވެ. އަދި ވިދާޅުވީ ވައްކަން ކުރުމަކީ ޕީއެންސީގެ ސަރުކާރުގެ އިސް ބޭފުޅުންގެ ޑީއެންއޭގައި ހަރުލާފައިހުރި ކަމެއް ކަމަށާއި، އެ ރޮނގުން އެބޭފުޅުންނަށް ޕީއެޗްޑީ ލިބޭނެ ކަމަށެވެ. 

މެދުއިރުމަތީގެ ހަނގުރާމައަށް އިޝާރާތް ކުރައްވައި ޣަފޫރު ވިދާޅުވީ ހަރުދަނާ އެއްވެސް ފިޔަވަޅެއް މިހާރު ނޭޅި ނަމަވެސް އޭޕްރީލް 4 ގައި ބާއްވާ އިންތިޚާބު ތަކަށް ފަހު ރައްޔިތުންނަށް ދަތި ކުރާނެ ކަމަށާއި، ހުރިހާ ރަށަކުން ކަރަންޓު ވެސް ކަނޑާނެ ކަމަށެވެ. އަދި ސެންޓަރަލް ބޭންކުގައި ފައިސާއެއް ނެތް ކަމަށާއި، ތިޖޫރީގައި އޮތީ ދެ ޕެކެޓް ކަރަބޮލަކް ކަމަށެވެ. 

ދައުލަތުގެ ހުރިހާ ފައިސާއެއް ހުސްވެއްޖެ. ސެންޓްރަލް ބޭންކުގެ ތިޖޫރީގައި ދެ ޕެކެޓް ކަރުބޮލަކު ނޫން އެހެން އެއްޗެއް ނެތް. ސެންޓްރަލް ބޭންކުގެ ތިޖޫރީގައި ދެ ޕެކެޓު ކަރުބޮލަކު ނޫން އެހެން އެއްޗެއް ނެތް. ތިބޭފުޅުން އަޅުގަނޑު މިހެން ބުނީތި އަޑުއަހަން ތިބޭ. އެޕްރީލު މަހުގެ ހަތަރު ވަނަ ދުވަހަށް ފަހު މި ގައުމުގައި ހުރިހާ ރަށަކުން، މި ފުވައްމުލައް ވެސް ހިމެނޭ ގޮތަށް ކަރަންޓު ކަނޑަން ފަށްޓާނީ. މިއަދު ވެސް މި ގައުމުގައި 30 ރުފިޔާއަށް ޕެޓްރޯލް ލީޓަރެއް ވިއްކަމުން އެ ދަނީ. ވޯޓަށް ޓަކައި ބައެއް ތަންތަނުގައި އަގުހެޔޮކޮށް އެ ދެނީ. ހަމަ 4 ވަނަ ދުވަހަށް ފަހު ހުރިހާ ތަނެއްގައި ޕެޓްރޯލުގެ އަގު ބޮޑުވެގެންދާނެ.

އެމްޑީޕީގެ ވަގުތީ ޗެއަރޕާސަން އަބްދުލް ގަފޫރު މޫސާ (ގަޕޯ)

މީގެ އިތުރުން ޣަފޫރު ވިދާޅުވީ މިސަރުކާރުން މިގައުމު ފަސާދަކޮށް، ހަލާކުކޮށް، ވައްކަމުގެ ހާއްޔަކަށް ބަދަލު ކޮށްފައިވާ ކަމަށެވެ. އަދި މިހާލަތުގައި ރިފެރެންޑަމް ވޯޓެއް ނަގަނީ ރައްޔިތުންގެ ބާރު އެކުއެކީގައި ނިގުޅައިގަތުމަށް ކަމަށާއި، މިވޯޓަށް ފާޅުގައި ރައްޔިތުން ނުކުމެ ނޫނެކޭ ބުނަން ޖެހޭ ކަމަށް އޭނާ ވިދާޅުވި އެވެ. ޣަފޫރު އިތުރަށް ވިދާޅުވީ ރައްޔިތުންނަށް ބިރު ނުދެއްކޭނެ ކަމަށާއި، ބިރު ދައްކާ ބޭފުޅުންނަށް މާދަމާ އޮންނާނީ ޖަލު ކަމަށެވެ.