މުޅި ސަރުކާރުން ފާޅުގައި ރިޝްވަތު ބަހާއިރު، ހުރިހާ މިނިވަން މުއައްސަސާ އެއް އޮތީ ނިދާފައި: ޝާތިރު
29 މާރިޗު 2026 | އާދީއްތަ 08:52ކުރިއަށް އޮތް އިންތިޚާބުތަކަށް ނުފޫޒު ފޯރުވުމަށް ސަރުކާރުން ފާޅުގައި ރިޝްވަތު ހުށަހަޅަމުންދާއިރު، މިނިވަން މުއައްސަސާތަކުން އެކަންކަން ނުބަލައި ހަނު ތިބޭތީ އެމްޑީޕީން ވަނީ ކަންބޮޑުވުންފާޅު ކޮށްފައި. އީސީއާއި އޭސީސީގެ ޒިންމާ އަދާނުކުރާކަން ފާހަގަކުރައްވައި، ޝާތިރު ވަނީ އެކަން ކުށްވެރި ކުރައްވާފައި. ޝާތިރު ވިދާޅުވީ މިއަދު މިނިވަން މުއައްސަސާތަކުން މިކަމާ ދެކޮޅަށް ބަހެއް ނުބުނާއިރު، މިކަން ބަދަލު ކުރުމުގެ ބާރު ވެސް ރައްޔިތުން އަތުގައި އެބަ އޮތް ކަމަށް. އަދި އިންތިޚާބުގައި ސަރުކާރަށް ނޫނެކޭ ބުނުމަށް އޭނާ ގޮވާލެއްވި.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެޕާޓީގެ ގައުމީ މަޖިލީހުގެ މެންބަރު ޝާތިރު އަބްދުއްރަހްމާން ވާހަކަ ދައްކަވަނީ. | ރާއްޖެއެމްވީ
އޭޕްރީލް މަހުގެ 4 ގައި ބާއްވާ އިންތިޚާބުތަކާ ގުޅިގެން ފާޅުގައި ސަރުކާރުން ރިޝްވަތު ހުށަހަޅަމުންދިޔަ ނަމަވެސް ހުރިހާ މިނިވަން މުއައްސަސާ އެއް އޮތީ ނިދާފައި ކަމަށް އެމްޑީޕީ ގައުމީ މަޖިލީހުގެ މެންބަރު ޝާތިރު އަބްދުއްރަހްމާން ވިދާޅުވެއްޖެ އެވެ.
އާދިއްތަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ޝާތިރު ވިދާޅުވީ، ކުރިއަށް އޮތް ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބު މިސަރުކާރުން ކާމިޔާބު ކުރުމަށް އެކި ގޮތްގޮތަށް ރިޝްވަތު ބަހަމުންދާ ކަމަށާއި، އިންތިޚާބަށް ނުފޫޒު ފޯރުވުމުގެ މަސައްކަތް ވެސް ވަރަށް ބޮޑަށް ކުރިއަށް ގެންދާ ކަމަށެވެ.
ޝާތިރު ވިދާޅުވީ ފާޅުގައި ރިޝްވަތުގެ އަމަލުތައް ހިންގަމުން ދިޔަ ނަމަވެސް މިއަދު މި ގައުމުގައި މިނިވަންކަމާއެކު ބަސް ބުނާނެ އަދި އެކަން ކުށްވެރި ކުރުމަށްފަހު ބަޔާނެއް ނެރޭނެ މިނިވަން މުއައްސަސާއެއް ނެތް ކަަމަށެވެ. އަދި މިއީ ވަރަށް ކަންބޮޑުވާ މައްސަލައެއް ކަމަށާއި، މިކަން ހަރުކަށި އިބާރާތުން ކުށްވެރި ކުރާ ކަމަށް އޭނާ ވިދާޅުވި އެވެ.
ކުރިއަށް އޮތް އިންތިޚާބުތަކާމެދު ވެސް ސުވާލު އުފެދޭކަން ފާހަގަކުރައްވައި ޝާތިރު ވިދާޅުވީ ލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު އަކީ މިސަރުކާރުގެ އަޅެއް ކަމަށެވެ.
އެހެންވީމާ، ޒާހިދަކަށް އެކަމެއް ނުފެންނާނެ. މަގުމައްޗަށް ނުކުތަސް އަޅުގަނޑަށް ހީވަނީ ފައިގެ ބޮޑުބައި އިނގިލީގެ ކުރިއަށް ބައްލަވައިގެންކަށް ނޭނގެ ހިންގަވާ ވަޑައިގަންނަވާނީ. އެ ހާލަތުގައި އިލެކްޝަންސް ކޮމިޝަންގެ ރައީސް އެ ހުންނެވީ. އިއްޔެ އަޅުގަނޑުމެންނަށް ފެނުނީ އަނެއްކާވެސް ރަށްރަށަށް ކެމްޕެއިނަށް ވަޑައިގަންނަވާފައި ޕީއެންސީގެ ޕީ.ޖީ ލީޑަރު ވިދާޅުވަނީ، އިންތިޚާބު ކާމިޔާބު ކޮށްދީފިއްޔާ މިވެނި ބަޔަކަށް، މިވެނި އަދަދަކަށް، އެވެނި ބަޔަކަށް، އެވެނި އަދަދަކަށް ތިމަންނަމެން ލާރި ދޭނަމޭ. ނަތީޖާ އެ އިއުލާނުކުރާއިރަށް ލާރި ދޭނަމޭ. މިއީ ކޮންވާހަކައެއްތޯ މި ދައްކަނީ؟ މިއީ ރިޝްވަތެއް ނޫންތޯ؟ ރިޝްވަތު ހުށަހަޅާފައި ވޯޓުދޭށޭ މި ބުނަނީ މީޑިއާގައި ޕަބްލިކުގައި މި ހިސާބަށް ދާއިރު، އޭސީސީއާއި އިލެކްޝަންގެ ކޮމިޝަން ނިދާފައި އޮތީމާ ދެން އެ ބޭފުޅުން މީޑިއާއިން ނުކުމެ ކޮންމެ ވާހަކައެއް ދެއްކިޔަސް، ރައްޔިތުން ކިހިނެއްތޯ އެކަން ގަބޫލުކުރަނީ؟ އެ ބޭފުޅުންގެ ގާނޫނުން ލާޒިމުކުރޭ އަޅުގަނޑުމެން ތަންޑިއާ ލާފައި ގެންގޮސް ބޮޑު ޕްރިންޓުކޮށްގެން ބޮޑު މައްސަލައެއް އެތަނަށް ހުށަނޭޅިޔަކަސް، ސަރުކާރުން ނުކުމެ ޕަބްލިކު މީޑިއާގައި ރިޝްވަތު ހުށަހަޅަން ފެށީމަ އެކަންކަން ބަލަން .އެއީ އެ ބޭފުޅުންނަށް ގާނޫނުން ލާޒިމުކުރާ ކަމެއް.އެމްޑީޕީ ގައުމީ މަޖިލީހުގެ މެންބަރު ޝާތިރު އަބްދުއްރަހްމާން
ޝާތިރު ވިދާޅުވީ މިސަރުކާރުން އިންތިޚާބަށް ހުރިހާ ގޮތަކުން ނުފޫޒު ފޯރުވުމަށް މިކުރަމުން ގެންދާ މަސައްކަތަކީ މުޑުދާރު އަމަލެއް ކަމަށެވެ. އަދި މިއަދު މިނިވަން މުއައްސަސާތަކުން މިކަމާ ދެކޮޅަށް ބަހެއް ނުބުނާއިރު، މިކަން ބަދަލު ކުރުމުގެ ބާރު ވެސް ރައްޔިތުން އަތުގައި އެބަ އޮތް ކަމަށާއި، އިންތިޚާބުގައި ސަރުކާރަށް ނޫނެކޭ ބުނުމަށް އޭނާ ގޮވާލެއްވި އެވެ.
