އީރާނާ އެކު އެއްބަސްވުމެއް ބޭނުން، 3،554 އަމާޒެއް ހުރީ އެމެރިކާގެ ރާޑަރުގައި: ޓްރަމްޕް

އީރާން އާއެކު މަޝްވަރާތައް ކުރިއަށް ގެންދަމުން އަންނަ ކަމަށާއި، އީރާން އިން ހޮރްމޫޒް ކަނޑު އޮޅި އަލުން ހުޅުވާލަން ޖެހޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ފްލޮރިޑާގެ މިއާމީގައި ބޭއްވި އެފްއައިއައި ސަމިޓުގައި ބައިވެރިވެ ވަޑައިގެން ވާހަކަ ދައްކަވަމުން ޓްރަމްޕް ވިދާޅުވީ، މީގެ ހަތަރު ހަފުތާ ކުރިން އޭނާ ކަނޑަ އެޅުއްވި އަސްކަރީ ހުރިހާ މަޤުޞަދު ތަކެއް މިހާރު ހާސިލުވަމުންދާ ކަމަށެވެ. އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފަށާފައި ވަނީ ފެބްރުވަރީ މަހުގެ 28 ވަނަ ދުވަހު އެވެ. 

އެ ތަޤުރީރުގައި ޓްރަމްޕް ވިދާޅުވީ، އީރާން އާއެކު މަޝްވަރާތައް ކުރިއަށްދާއިރު، އެ ޤައުމުގެ އިޤްތިޞާދާއި ބާރުތައް ވަރަށް ބޮޑަށް ހީނަރުވަމުން އަންނަ ކަމަށެވެ. އަދި މިހާރު ބޭނުން ވަނީ، އީރާން އާއެކު އެއްބަސްވުމަކަށް އަންނަން ކަމަށް ވެސް ޓްރަމްޕް ވިދާޅުވި އެވެ. އެކަން ފާހަގަ ކުރައްވައި ޓްރަމްޕް ވިދާޅުވީ، އީރާންގައި ހުރި 3،554 އަމާޒެއް އަދި ވެސް އެމެރިކާގެ ރާޑަރަށް އަރާފައިވާ ކަމަށެވެ. 

އެ ސަމިޓުގައި ވާހަަކަފުޅު ދައްކަވަމުން ޓްރަމްޕް ވަނީ، ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން އާއި، އެކުވެރި އަރަބި އިމާރާތް (ޔޫއޭއީ) އާއި، ޤަތަރު އަދި ބަހްރެއިން ފަދަ ގަލްފުގެ ޤައުމު ތަކުގެ ލީޑަރުންނަށް ވަރަށް ބޮޑަށް ތައުރީފު ކުރައްވައިފަ އެވެ. އަދި އެ ޤައުމު ތަކުން އެމެރިކާ އަށް ދެމުން އަންނަ އެއްބާރުލުން ވެސް ޓްރަމްޕް ފާހަގަ ކުރެއްވި އެވެ. 

މި ސަމިޓުގައި ޓްރަމްޕް ދެއްކެވި ވާހަކަ ތަކުން ސާފު ވަނީ، އެމެރިކާ އިން އޮތީ އަދިވެސް އީރާން އަށް ފިއްތުންތައް އިތުރު ކުރުމުގެ ވިސްނުމުގަ އެވެ. އަދި އެމެރިކާ އިން މަސައްކަތް ކުރަނީ އެ ޤައުމުގެ ބާރުގެ ދަށަށް ހޮރްމޫޒް ކަނޑު އޮޅި ގެނައުމަށެވެ. މެދު އިރުމަތީގެ ޤައުމު ތަކާ އެކު އޮންނަ ގުޅުން ވަރުގަދަކޮށް، އީރާންގެ ނުފޫޒު ކުޑަ ކުރުމަކީ ވެސް، ޓްރަމްޕްގެ ސަރުކާރުގެ މައިގަނޑު އެއް އަމާޒު ކަމަށް ސިޔާސީ ދާއިރާާ ދިރާސާ ކުރާ ފަރާތްތަކުން ފާހަގަ ކުރެ އެވެ.