ޓްރަމްޕްގެ ސޮއި އެމެރިކާގެ ޑޮލަރުގައި ހިމެނުމަށް ނިންމައިފި

އެމެރިކާގެ ރައީސް ޑޮނަލްޑް ޓްރަމްޕްގެ ސޮއި އެ ޤައުމުގެ ފައިސާ ނުވަތަ ޑޮލަރުގައި ހިމެނުމަށް ނިންމައިފި އެވެ. 

މިއީ އެމެރިކާގެ ތާރީޚުގައި ވެސް މަގާމުގައި ހުންނެވި ރައީސެއްގެ ސޮއި، އެ ޤައުމުގެ ފައިސާގައި ހިމަނާ ފުރަތަމަ ފަހަރެވެ. އެމެރިކާގެ ޓްރެޒަރީ ޑިޕާޓްމަންޓް އިން ހާމަ ކޮށްފައިވާ ގޮތުގައި، ޓްރަމްޕްގެ ސޮއި ފައިސާގައި ހިމެނުމަށް ނިންމާފައި ވަނީ އެމެރިކާގެ މިނިވަން ކަމަށް 250 އަހަރު ފުރުން ފާހަގަ ކުރުމުގެ ގޮތުން ނިންމާފައިވާ ނިންމުމެއް ކަމަށެވެ. 

އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ވިދާޅުވީ، އެމެރިކާގެ ފަޚުރުވެރި ކާމިޔާބީ ތަކާއި، ރައީސް ޓްރަމްޕްގެ ޚިދުމަތްތައް ފާހަގަ ކުރުމަށްޓަކައި އެމެރިކާގެ ޑޮލަރުގައި އޭނާގެ ނަން ހިމެނުމަށް ވުރެ ވަކިން ބާރުގަދަ ގޮތެއް ނެތް ކަމަށެވެ. އާންމު އުސޫލުން އެމެރިކާގެ ފައިސާގައި ސޮއި ކުރައްވަނީ ޓްރެޒަރީގެ އިސް އޮފިޝަލުންނެވެ. ނަމަވެސް، އައު ނިންމުމާ އެކު ޓްރަމްޕްގެ ސޮއި ފެންނަން ހުންނާނީ ޓްރެޒަރީ ސެކްރެޓަރީ ބެސެންޓުގެ ސޮޔާ އެކު އެވެ.

މި ނިންމުމުގެ ދަށުން ޓްރަމްޕް އާއި، ބެސެންޓުގެ ސޮއި ހިމެނޭ ފުރަތަމަ 100 ޑޮލަރުގެ ނޫޓޫތައް ޗާޕު ކުރަން ފަށާނީ މިއަހަރުގެ ޖޫން މަހު އެވެ. އޭގެ ފަހުން އެހެނިހެން އަދަދު ތަކުގެ ނޫޓުތައް ޗާޕު ކުރާނެ އެވެ. މިހާރު ބޭނުން ކުރަމުންދާ ނޯޓު ތަކުގައި ހުންނަނީ ކުރީގެ ރައީސް ޖޯ ބައިޑަންގެ ސަރުކާރުގެ ޓްރެޒަރީ ސެކްރެޓަރީ ޖެނެޓް ޔެލެން އަދި ޓްރެޒަރާ ލިން މަލާބާގެ ސޮއެ އެވެ. 1861 ވަނަ އަހަރުން ފެށިގެން އެމެރިކާގެ ފައިސާގައި ޓްރެޒަރާގެ ސޮއި ހިމެނުމަށް އޮންނަ ސަގާފަތް، ޓްރަމްޕްގެ ސަރުކާރުގެ މި ނިންމުމާ އެކު ނިމުމަކަށް އަންނާނެ އެވެ. 

އެމެރިކާގެ މިހާރުގެ ޓްރެޒަރާ ބްރެންޑަން ބީޗް ވިދާޅުވީ، އެމެރިކާގެ ފައިސާ އަކީ އެ ޤައުމުގެ ތަނަވަސްކަމާއި، ވަރުގަދަކަމާއި، އަދި އެމެރިކާގެ ރައްޔިތުންގެ ގުޑުމެއް ނެތް އަޒުމު ރަމްޒު ކޮށްދޭ އެއްޗެއްގެ ގޮތުގައި ދެމި އޮންނާނެ ކަމަށެވެ. މިއަހަަރަކީ އިނގިރޭސިވިލާތުގެ ކިބައިން އެމެރިކާގެ 13 ކޮލޮނީ އަކުން މިނިވަންކަން އިއުލާން ކުރިތާ 250 އަހަރު ފުރޭ އަހަރެވެ. މި މުނާސަބަތާ ގުޅުވައިގެން ޓްރަމްޕްގެ ސޫރަ ހިމެނޭ 24 ކެރަޓްގެ ރަނުގެ ފައިސާ ފޮއްޗެއް ނެރުމަށް ވެސް ފެޑަރަލް އާޓްސް ކޮމިޝަން އިން މި މަހުގެ ކުރީ ކޮޅު ހުއްދަ ދީފަ އެވެ. 

މި ނިންމުމާ ގުޅިގެން އިދިކޮޅު ޑިމޮކްރަޓިކް ޕާޓީ އަށް ނިސްބަތްވާ ކެލެފޯނިއާގެ ގަވަރުނަރު އަދި ޓްރަމްޕް އަށް ވަރަށް ބޮޑަށް ފާޑު ވިދާޅުވާ ގެވިން ނިއުސަމް ވަނީ ނުރުހުން ފާޅު ކުރައްވައިފަ އެވެ. އޭނާ ވިދާޅުވީ ކާބޯ ތަކެއްޗާއި، ތެލާއި، ކުއްޔާއި، އަދި ޞިއްޙީ ޚިދުމަތް ތަކުގެ އަގު ބޮޑުވަމުންދާއިރު އެކަމުގެ ޒިންމާ އުފުލަން ޖެހޭ ފަރާތަކީ ކާކުކަން މިހާރު އެމެރިކާގެ ރައްޔިތުންނަށް ސާފު ނުވާ ކަމަށެވެ. 

މިއީ ސަރުކާރުގެ އެކި މަޝްރޫއު ތަކާއި، އިމާރާތް ތަކުގައި ޓްރަމްޕް ނަން ބޭނުން ކުރުމަށް އޭނާގެ ސަރުކާރުން ކުރަމުންދާ މަަސައްކަތް ތަކުގެ ތެރެއިން ނިންމާފައިވާ ނިންމުމެއް ކަމަށެވެ. މީގެ ކުރިން ޓްރަމްޕް ރިޔާސީ ފުރަތަމަ ދައުރުގައި، ކޮވިޑް-19 ގެ ބަލި މަޑުކަމާ ގުޅިގެން އެމެރިކާގެ އެތައް މިލިއަން ރައްޔިތުންނަށް ފޮނުވި އެހީގެ ޗެކް ތަކުގައި ވެސް ޓްރަމްޕްގެ ނަން ހިމަނާފައިވެ އެވެ.