ވަލީ އަހުދު މުޙައްމަދަކީ ވަރަށް ގާތް އެކުވެރިއެއް، އެއީ ސައުދީ އިން ފަޚުރުވެރިވާން ޖެހޭ ލީޑަރެއް: ޓްރަމްޕް

ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން އަކީ ވަރަށް ގާތް އެކުވެރިއެއް ކަމަށާއި، އޭނާ އަކީ ސައުދީ އިން ފަޚުރުވެރިވާން ޖެހޭ ލީޑަރެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އެމެރިކާގެ ފްލޮރިޑާގެ މިއާމީގައި އޮތް އެފްއައިއައި ސަމިޓުގައި ދެއްވި ތަޤުރީރުގައި ޓްރަމްޕް ވަނީ، ސައުދީގެ ވަލީ އަހުދު މުޙައްމަދާ ގުޅޭ ގޮތުން ވާހަކަ ދައްކަވައިފަ އެވެ. ޓްރަމްޕް ވިދާޅުވީ، މުޙައްމަދު ބިން ސަލްމާން އަކީ ސައުދީ އަރަބިއްޔާ ފަޚުރުވެރިވާން ޖެހޭ ފަދަ ލީޑަރެއް ކަމަށެވެ. އަދި އީރާންގެ މައްސަލައިގައި އެމެރިކާ އިން ގެން ގުޅޭ ހަރުކަށި ސިޔާސަތު ތަކަށް ގަލްފުގެ ޤައުމު ތަކުން ދެމުން އަންނަ އެއްބާރުލުން ވެސް ޓްރަމްޕް ވަނީ ސިފަ ކުރައްވައިފަ އެވެ. 

ޓްރަމްޕްގެ ވާހަަކަފުޅުގައި އޭނާ ވަނީ، ސައުދީގެ ވަލީ އަހުދު މުޙައްމަދަކީ އޭނާގެ ވަރަށް ގާތް އެކުވެރިއެއް ކަމަށް ސިފަ ކުރައްވައިފަ އެވެ. މިއީ ޓްރަމްޕް މިފަދައިން ވިދާޅުވި ފުރަތަމަ ފަހަރެއް ވެސް ނޫނެވެ. މީގެ ކުރިން ވެސް ޓްރަމްޕް ވަނީ، ވަލީ އަހުދު މުޙައްމަދަކީ އޭނާގެ ވަރަށް ގާތް އެކުވެރިއެއް ކަަމަށް ވިދާޅުވެ، މުޙައްމަދަށް ވަރަށް ބޮޑަށް ތައުރީފު ކުރައްވައިފަ އެވެ. 

އެމެރިކާާގެ ރައީސް ކަމުގެ ދެ ވަނަ ދައުރެއް ޓްރަމްޕް ފުރުއްވަމުން ގެންދަވާއިރު، ޓްރަމްޕް އާއި ސައުދީގެ ވަލީ އަހުދު މުޙައްމަދާ ދެމެދު ވަރަށް ގާތް ގުޅުމެއް އޮވެ އެވެ. 2025 ވަނަ އަހަރުގެ ޖަނަވަރީ މަހު ވެރި ކަމުގެ ހުވާ ކުރެއްވި ފަހުން، ޤައުމުން ބޭރަށް ކުރެއްވި ފުރަތަމަ ރަސްމީ ދަތުރުފުޅުގައި ވެސް ޓްރަމްޕް ވަޑައިގެންނެވި މެދު އިރުމަތީގެ ޤައުމު ތަކަށެވެ. އެ ދަތުރުފުޅުގައި ޓްރަމްޕް ވަނީ ސައުދީ އާއި، ޤަތަރު އަދި އެކުވެރި އަރަބި އިމާރާތް (ޔޫއޭއީ) އަށް ވަޑައިގެންފަ އެެވެ.

އޭގެ ފަހުން 2025 ވަނަ އަހަރުގެ ނޮވެމްބަރު މަހުގެ ތެރޭގައި ވަލީ އަހުދު މުޙައްމަދު ވަނީ އެމެރިކާގެ ރިޔާސީ ގަނޑުވަރު، ވައިޓް ހައުސް އަށް ވަޑައިގެން ޓްރަމްޕްއާ ބައްދަލު ކުރައްވައިފަ އެވެ. ގިނަ ކަންކަމުގައި ޓްރަމްޕް އާއި މުޙައްމަދު މަޝްވަރާ ކުރައްވާއިރު، ސައުދީ އަކީ އެމެރިކާގެ ގާތް އެކުވެރި އެކެވެ.