އީރާނުގެ ހެކަރުން، އެފްބީއައިގެ ޑިރެކްޓަރުގެ އީމެއިލް ހެކްކޮށްފި

އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި)ގެ ޑިރެކްޓަރު ކޭޝް ޕަޓޭލްގެ އަމިއްލަ އީމެއިލް އެކައުންޓުތައް، އީރާންއާ ގުޅުން އޮންނަ ހެކަރުންގެ ގުރޫޕަކުން ހެކްކޮށް، އޭގައި ހުރި ބައެއް ފޮޓޯ ތަކާއި، ލިޔެ ކިޔުންތައް އާންމު ކޮށްފި އެވެ. 

މިކަން ސީއެންއެން އަށް ކަށަވަރު ކޮށްދިން މަސްދަރަކުން ބުނެފައިވާ ގޮތުގައި، ހެކަރުން އާންމު ކޮށްފައި ވަނީ ޕަޓޭލް އެފްބީއައިގެ ޑިރެކްޓަރުގެ މަގާމާ ހަވާލުވެ ވަޑައިގެންނެވުމުގެ ކުރީގެ ފޮޓޯ ތަކެކެވެ. 

ސީއެންއެން އާއި މިނިވަން ސައިބާ ސެކިއުރިޓީ ދިރާސާވެރިޔަކު ކުރި ތަހުގީގުން އެނގޭ ގޮތުގައި، ވަގަށް ނަގާފައިވާ އީމެއިލް ތަކަކީ، 2011 ވަނަ އަހަރާއި، 2022 ވަނަ އަހަރާ ދެމެދުގެ މުއްދަތެއްގައި ހުރި ތަކެއްޗެވެ. އޭގެ ތެރޭގައި ޕަޓޭލްގެ އަމިއްލަ ދިރިއުޅުމާ ގުޅޭ މައުލޫމާތު ތަކާއި، ވިޔަފާރި އަދި ދަތުރު ފަތުރުގެ މައުލޫމާތު ވެސް ހިމެނެ އެވެ. 

ސައިބާ ސެކިއުރިޓީ ދިރާސާވެރިޔާ ރޮން ފަބޭލާ ބުނި ގޮތުގައި، މިއީ އެފްބީއައިގެ ވަރުގަދަ ނިޒާމަށް ދިން ހަމަލާއެއްގެ ގޮތުގައި ހެކަރުން ސިފަ ކުރި ނަމަވެސް، އެއީ ހަމައެކަނި އަމިއްލަ މީހެއްގެ މެއިލްގައި ހުރި އާންމު މައުލޫމާތު ތަކެވެ. އޭގެ ތެރޭގައި އާއިލީ ފޮޓޯ ތަކާއި، ކުރިން އެޕާޓްމަންޓެއް ހޯދުމަށް ކޮށްފައިވާ މުއާމަލާތް ފަދަ، ބޭކާރު ތަކެތި ހިމެނޭ ކަމަށް އޭނާ ފާހަގަ ކުރި އެވެ. 

މިކަމާ ގުޅިގެން އެފްބީއައި އިން ނެރުނު ބަޔާނެއްގައި ބުނެފައި ވަނީ، ޑިރެކްޓަރު ޕަޓޭލްގެ އަމިއްލަ އީމެއިލުގެ މައުލޫމާތަށް އަމާޒު ކޮށްގެން ހިންގި މި އަމަލު އެ އިދާރާގެ ސަމާލު ކަމަށް އައިސްފައިވާ ކަަމަށެވެ. އަދި އެކަމުގެ ސަބަބުން ކުރިމަތިވެދާނެ ނުރައްކާތައް ކުޑަ ކުރުމަށް އަޅަން ޖެހޭ ހުރިހާ ފިޔަވަޅެއް އަޅާފައިވާ ކަމަށާއި، ސަރުކާރުގެ ސިއްރު އެއްވެސް މައުލޫމާތެއް ހެކަރުންނަށް ލިބިފައި ނުވާ ކަމަށް ވެސް އެފްބީއައި އިން ކަށަވަރު ކޮށްދީފައިވެ އެވެ. 

މީގެ އިތުރުން މި ހަމަލާގެ ފަހަތުގައިވާ "ހަންޑަލާ ހެކް ޓީމު" ދެނެ ގަތުމަށް އެހީތެރިވާ މައުލޫމާތު ފޯރުކޮށްދޭ ފަރާތް ތަކަށް 10 މިލިއަން އެމެރިކާ ޑޮލަރުގެ އިނާމެއް ދޭނެ ކަަމަށް ވެސް، އެފްބީއައި އިން ވަނީ އިއުލާން ކޮށްފަ އެވެ. 

އެމެރިކާގެ އިންޓެލިޖެންސް އިދާރާ ތަކުން މީގެ ކުރިން ވެސް ވަނީ، އީރާނަށް އަމާޒުކޮށް އެމެރިކާ އާއި އިޒްރޭލުން ދިން ޙަމަލާ ތަކުގެ ބަދަލު ހިފުމުގެ ގޮތުން އީރާންއާ ގުޅުން ހުރި ހެކަރުން ހަމަލާ ދީފާނެ ކަމުގެ އިންޒާރު ދީފަ އެވެ. މިއީ ޕަޓޭލްގެ އަމިއްލަ މައުލޫމާތަށް އީރާންގެ ހެކަރުން އަމާޒު ކުރި ފުރަތަމަ ފަހަރެއް ނޫނެވެ. 2024 ވަނަ އަހަރުގެ ފަހު ކޮޅު، ޕަޓޭލް އެފްބީއައިގެ ވެރިޔަކަށް އައްޔަން ކުރުމުގެ ހަފުތާ ތަކެއް ކުރިން ވެސް، އޭނާގެ މައުލޫމާތު ތަކަށް ހެކަރުން ވަދެފައިވާ ކަމުގެ މައުލޫމާތު އޮފިޝަލުންނަށް ވަނީ އޭނާ ދީފަ އެވެ.