މި ހަފުތާގެ ތެރޭގައި އީރާންއާ އެކު ބައްދަލުވުމެއް ބޭއްވޭނެ ކަމަށް އެމެރިކާ ސަރުކާރުން އުންމީދު ކުރޭ
28 މާރިޗު 2026 | ހޮނިހިރު 07:50ޓްކޮފް ވިދާޅުވީ، އެމެރިކާގެ ރައީސް ޓްރަމްޕް ބޭނުންފުޅު ވަނީ ސުލްޙައިގެ އެއްބަސްވުމެއް ޤާއިމު ކުރަން ކަމަށް. ނަމަވެސް، އެ ސުލްޙަ އަކީ ބާރުވެރިކަމާ އެކު ހޯދާ ސުލްޙަ އަކަށް ވާން ޖެހޭނެ ކަމަށް ޓްރަމްޕް ޤަބޫލުފުޅު ކުރައްވާ ކަމަށާއި، ޕްރެޝަރެއް ނެތި އެއްވެސް ބަޔަކު މަޝްވަރާގެ މޭޒަށް ނާންނާނެ ކަމަށް ވެސް އޭނާ ވިދާޅުވި.
އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް. | ގެޓީ އިމޭޖަސް
އީރާން އާއެކު މި ހަފުތާގެ ތެރޭގައި ބައްދަލުވުމެއް ބޭއްވޭނެ ކަމަށް އެމެރިކާ ސަރުކާރުން އުންމީދު ކުރާ ކަމަށް، އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް ވިދާޅުވެއްޖެ އެވެ.
އެފްއައިއައި ސަމިޓުގައި ވާހަކަ ދައްކަވަމުން ވިޓްކޮފް ވިދާޅުވީ، އީރާން އާއެކު އެއްވެސް މަޝްވަރާއެއް ކުރިއަށް ނުދާ ކަމަށް އެ ޤައުމުގެ ބައެއް ފަރާތް ތަކުން ބުނި ނަމަވެސް، ދެ ޤައުމުގެ ދެ މެދުގައި މަޝްވަރާތައް ކުރިއަށްދާކަން އެންމެނަށް ވެސް އިނގޭ ކަމަށެވެ.
އެ ސަމިޓުގައި ވާހަކަ ދައްކަވަމުން ވިޓްކޮފް ވަނީ، ހޮރްމޫޒް ކަނޑު އޮޅިން ބައެއް އުޅަނދު ފަހަރު ދަތުރު ކުރުމުގެ ފުރުސަތު ލިބިގެން ދިޔުމަކީ ވަރަށް ރަނގަޅު ނިޝާނެއްގެ ގޮތުގައި ސިފަ ކުރައްވައިފަ އެވެ. އެއާ އެކު ވިޓްކޮފް ވިދާޅުވީ، އެމެރިކާގެ ރައީސް ޓްރަމްޕް ބޭނުންފުޅު ވަނީ ސުލްޙައިގެ އެއްބަސްވުމެއް ޤާއިމު ކުރަން ކަމަށެވެ. ނަމަވެސް، އެ ސުލްޙަ އަކީ ބާރުވެރިކަމާ އެކު ހޯދާ ސުލްޙަ އަކަށް ވާން ޖެހޭނެ ކަމަށް ޓްރަމްޕް ޤަބޫލުފުޅު ކުރައްވާ ކަމަށާއި، ޕްރެޝަރެއް ނެތި އެއްވެސް ބަޔަކު މަޝްވަރާގެ މޭޒަށް ނާންނާނެ ކަމަށް ވެސް އޭނާ ވިދާޅުވި އެވެ.
ވިޓްކޮފް އަކީ އެމެރިކާގެ ރައީސް ޓްރަމްޕްގެ ވަރަށް އަރިސް ބޭފުޅަކަށް ވާއިރު، އޭނާ ވަނީ އީރާން އާއެކު ކުރިއަށްދާ މަޝްވަރާ ތަކުގައި އެމެރިކާ އިން ދޫ ނުދޭނެ ބައެއް ކަންކަން، ނުވަތަ ބައެއް ރަތް ރޮނގުތައް ހާމަ ކުރައްވައިފަ އެވެ. އޭގެ ތެރޭގައި އީރާން އިން ޔުރޭނިއަމް މުއްސަނދި ކުރުން ހުއްޓާލުމާއި، އެކި ޤައުމު ތަކުގައި ޙަރަކާތްތެރިވާ ހަތިޔާރު އެޅި ޖަމާއަތް ތަކަށް އެހީތެރިކަން ފޯރުކޮށްދިނުން ހުއްޓާލުން ހިމެނެ އެވެ.
މީގެ އިތުރުން އީރާންގެ މައްސަލަ ތަކަށް ހަލެއް ހޯދުމަށްޓަކައި، 15 ނުކުތާގެ މައްޗަށް އެކުލެވޭ ޕްލޭނެއް އެމެރިކާ އިން ހުށަހަޅާފައިވާ ކަމަށާއި، އެ ޕްލޭން އީރާން އަށް ލިބިފައިވާތާ ދުވަސް ކޮޅެއް ވެފައިވާ ކަމަށް ވިޓްކޮފް ވިދާޅުވި އެވެ. އެމެރިކާ އިން އުންމީދު ކުރަނީ އީރާން އިން އެ ޕްލޭން އަށް ޖަވާބު ދޭނެ ކަމަށާއި، އޭގެ ސަބަބުން ހުރިހާ މައްސަލަ ތަަކަކަށް ހައްލެއް ލިބިގެންދާނެ ކަމަށް އޭނާ ފާހަގަ ކުރެއްވި އެވެ.
ވިޓްކޮފްގެ ވާހަކަ ނިންމާލަމުން އޭނާ ވިދާޅުވީ، މި ހަފުތާގެ ތެރޭގައި ދެ ޤައުމުގެ ދެ މެދުގައި ބައްދަލުވުން ތަކެއް ބޭއްވޭނެ ކަމަށް ވަރަށް ބޮޑަށް ބެލެވޭ ކަމަށެވެ. އެކަމަށް އެމެރިކާ ސަރުކާރުން ވަރަށް ބޮޑަށް އުންމީދު ކުރާ ކަމަށް ވެސް އޭޏާ ވިދާޅުވި އެވެ.
މަސްދަރު: ރޮއިޓާސް
