އީރާން އިން ބޭނުންވީ ރޫހީ ލީޑަރަކަށް އަހަރެން ގެންނަން: ޓްރަމްޕް

އީރާން އިން ބޭނުންވީ އެ ޤައުމުގެ ރޫހީ ލީޑަރުގެ މަޤާމަށް އޭނާ ގެންނަން ކަމަށާއި، ނަމަވެސް އޭނާ އެކަމަށް އިންކާރު ކުރެއްވީ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެމެރިކާގެ ވެރި ރަށް ވޮޝިންޓަންގައި އޮތް ރިޕަބްލިކަލް ޕާޓީގެ ޙަރަކާތެއްގައި ބައިވެރިވެ ވަޑައިގެން ވާހަކަ ދައްކަވަމުން ޓްރަމްޕް ވިދާލުވީ، މަސް ދުވަހަށް ދެމިގެންދާ މި ހަނގުރާމަ ނިންމުމަށް އީރާން އިން ވަރަށް ބޮޑަށް ބޭނުންވާ ކަމަށެވެ. 

ޓްރަމްޕް ވިދާޅުވީ، އެމެރިކާ އާއި އިޒްރޭލް ގުޅިގެން ދިން ހަމަލާ ތަކެއްގައި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަވުމަށް ފަހު، އީރާންގެ އިސްވެރިން ބޭނުންވީ އެ ޤައުމުގެ ރޫހީ ލީޑަރަކަށް އޭނާ ގެންނަން ކަމަށެވެ. އެގޮތުން އީރާންގެ ރޫހީ ލީޑަރަކަށް ވުމުގެ ފުރުސަތު ނުރަސްމީ ގޮތެއްގައި އޭނާ އަށް ދެއްވި ކަމަށާއި، ނަމަވެސް އޭނާ އެ ހުށަހެޅުން ބަލައިނުގަތީ ކަމަށް ޓްރަމްޕް ވިދާޅުވި ެވެ. 

އެކަން ފާހަގަ ކުރައްވައި ޓްރަމްޕް ވިދާޅުވީ، އީރާންގެ ވެރިޔަކަށް ވުމުގެ ފުރުސަތު ލިބި، އެކަން ބޭނުން ނުވި މީހަކު އޭނާ ނޫނީ ނުހުންނަވާނެ ކަމަށެވެ. އަދި އީރާން އިން ބޭނުން ވަނީ އެ ޤައުމުގެ ވެރިޔަކަށް އޭނާ ވަޑައިގަންނަވަން ކަަމަށް ބުނާ ވާހަކަ ވަރަށް ސާފުކޮށް އަޑު އިވޭ ކަމަށް ވެސް ޓްރަމްޕް ވިދާޅުވި އެވެ. 

އެމެރިކާ އާއި އިޒްރޭލް އިން ދިން ހަމަލާ ތަކެއްގައި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލިއިރު، އޭގެ ހަފުތާއެއް ފަހުން އީރާން އިން ވަނީ އައު ރޫހީ ލީޑަރަކު އައްޔަން ކޮށްފަ އެވެ. އެގޮތުން އައު ރޫހީ ލީޑަރުގެ ގޮތުގައި އައްޔަން ކުރައްވާފައި ވަނީ އާޔަތުﷲ އަލީ ޚާމަނާއީގެ ދަރިކަލުން، މުޖުތަބާ ޚާމަނާއީ އެވެ. 

މީގެ ކުރިން ޓްރަމްޕް ވަނީ، އީރާންގެ ރޫހީ ލީޑަރަަކަށް ހަމަޖައްސަން ޖެހޭނީ ވެސް، އޭނާ އާއި އެމެރިކާ އިން ރުހޭ މީހެއް ކަމަށް ވިދާޅުވެފަ އެވެ. އެހެން ނޫން ނަމަ، އެ މީހަކަށް ވެސް މާ ގިނަ ދުވަހު އެ މަގާމުގައި ނުހުންނެވޭނެ ކަމުގެ އިންޒާރު ވެސް ޓްރަމްޕް ދެއްވާފައިވެ އެވެ. ނަމަވެސް އީރާން އިން ބުނެފައި ވަނީ، އެ ޤައުމުގެ ރޫހީ ލީޑަރަކަށް ގެންނާނެ މީހަކު ކަނޑަ އަޅާނީ އެ ޤައުމުން ކަމަށެވެ.