ދެ ވަނަ ފަހަރަށް މަދޫރޯ ޝަރީއަތަށް ހާޒިރު ކުރަނީ

އެމެރިކާގެ އަސްކަރިއްޔާ އިން ވެނެޒުއެލާގައި ހިންގި ޚާއްސަ އޮޕަރޭޝަނެއްގައި ހައްޔަރު ކޮށްފައިވާ އެ ޤައުމުގެ ކުރީގެ ރައީސް ނިކޮލަސް މަދޫރޯ، ދެ ވަނަ ފަހަރަށް ނިއުޔޯކްގެ ކޯޓަކަށް ހާޒިރު ކުރަން ނިންމައިފި އެވެ. 

މި އަޑު އެހުން އޮތީ ބުދަ ދުވަހުގެ މެންދުނު އެމެރިކާ ގަޑިން 11:00 ޖަހާއިރު އެވެ. މިއީ އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް މަދޫރޯ ހައްޔަރު ކުރި ފަހުން، އޭނާ ކޯޓަށް ހާޒިރު ކުރާ ދެ ވަނަ ފަހަރެވެ. 

އުމުރުން 63 އަހަރުގެ މަދޫރޯ އާއި، އޭނާގެ އަނބިކަނބަލުން ސީލިއާ ފްލޯރެސް ހައްޔަރު ކޮށްފައި ވަނީ މިއަހަރުގެ ޖަނަވަރީ މަހުގެ ކުރީ ކޮޅު އެވެ. އެއީ ވެނެޒުއެލާގައި ރިޔާސީ ގަނޑުވަރަށް ވަދެ، އަސްކަރިއްޔާ އިން ހިންގި ޚާއްސަ އޮޕަރޭޝަނެއްގަ އެވެ. މި އޮޕަރޭޝަނަށް ފަހ، ފާއިތުވި ތިން މަސް ދުވަހު މަދޫރޯ ހައްޔަރު ކޮށްފައި ހުރީ ބްރޫކްލިންގެ ޖަލެއްގަ އެވެ. 

2013 ވަނަ އަހަރުން ފެށިގެން ވެނެޒުއެލާގައި ވެރިކަން ކުރަމުން އައި މަދޫރޯ މަގާމުން ދުރު ކުރުމާ އެކު، ތެލުގެ މުއްސަނދިކަން ލިބިފައިވާ އެ ޤައުމު މިހާރު އޮތީ އެމެރިކާގެ ރައީސް ޓްރަމްޕްގެ ނުފޫޒުގެ ދަށުގަ އެވެ. މަދޫރޯ ހައްޔަރު ކުރުމާ އެކު، އޭނާގެ ނައިބު ރައީސާގެ މަގާމުގައި ހުންނެވި ޑެލްސީ ރޮޑްރިގޭޒް ވަނީ ވެނެޒުއެލާގެ ވަގުތީ ރައީސާގެ މަގާމާ ހަވާލުވެ ވަޑައިގެންފަ އެވެ. 

މަދޫރޯއާ ދެކޮޅަށް އެމެރިކާ އިން ވަނީ ހަތަރު ދައުވާއެއް އުފުލައިފަ އެވެ. އޭގެ ތެރޭގައި ނާާކޯ ޓެރަރިޒަމްގެ ރޭވުންތައް ރޭވުމާއި، ކޮކެއިން އެތެރެ ކުރުމަށް ރޭވުމާއި، މެޝިން ބަޑި އާއި ގޮވާ ތަކެތި ގެންގުޅުމުގެ އިތުރުން، އެފަދަ ހަތިޔާރު ހޯދުމަށް ރޭވުމުގެ ދައުވާ ހިމެނެ އެވެ. ނަމަވެސް މަދޫރޯ ވަނީ، އޭނާ އަކީ ހަނގުރާމައިގެ އަސީރެއް ކަަމަށް ވިދާޅުވެ، ހުރިހާ ދައުވާ ތަކަކަށް އިންކާރު ކުރައްވައިފަ އެވެ. 

ބުރާސްފަތި ދުވަހު އޮންނަ އަޑު އެހުމުގައި މަދޫރޯގެ ފަރާތުން މި މައްސަލަ ބާތިލު ކުރުމަށް އެދޭނެ ކަމަށް ބެލެވެ އެވެ. މަދޫރޯގެ ޤާނޫނީ ވަކީލު، ބެރީ ޕޮލަކް ވިދާޅުވި ގޮތުގައި، ވެނެޒުއެލާގެ ސަރުކާރުން ވަކީލުންގެ ފީ ދައްކަން ބޭނުންވި ނަމަވެސް، އެމެރިކާގެ ދަތި ކުރުމުގެ ފިޔަވަޅު ތަކުގެ ސަބަބުން އެކަމަށް ބޭނުންވާ ހުއްދަ މިހާތަނަށް ލިބިފައި ނުވެ އެވެ. މިއީ ޤާނޫނީ ވަކީލެއްގެ އެހީތެރިކަން ހޯދުމަށް މަދޫރޯ އަށް ލިބިގެންދާ ދުސްތޫރީ ހައްގަށް އަރައި ގަތުން ކަމަށް ބުނެ، އިޖުރާއީ ގޮތުން މައްސަލަ ބޭރު ކޮށްލުމަށް ވަކީލުން ދަނީ ވަކާލާތު ކުރަމުންނެވެ.