ޕެރިހުގައި ހުންނަ ބޭންކް އޮފް އެމެރިކާ ގޮއްވާލަން އުޅެފި

ފަރަންސޭސިވިލާތުގެ ވެރިރަށް ޕެރިހުގައި ހުންނަ ބޭންކް އޮފް އެމެރިކާގެ އިމާރާތެއްގެ ބޭރުގައި ބޮމުގެ ހަމަލާއެއް ދޭން އުޅުނު ކަމަށް ތުހުމަތުކުރެވޭ ބަޔަކު ފަރަންސޭސި ފުލުހުން ހުއްޓުވައިފިއެވެ. މި ހާދިސާއާ ގުޅިގެން އެކަކު ހައްޔަރުކޮށްފައިވާއިރު، ދެވަނަ މީހާ ވަނީ ފިލާފައެވެ.

ފަރަންސޭސިވިލާތުގެ ގައުމީ އެންޓި-ޓެރަރިޒަމް ޕްރޮސެކިއުޓާގެ އޮފީސް (ޕީ.އެން.އޭ.ޓީ) އިން އެސޯސިއޭޓެޑް ޕްރެސް (އޭޕީ) އަށް މައުލޫމާތު ދެމުން ބުނެފައިވަނީ، ޓެރަރިޒަމާ ގުޅުންހުރި ކުށްތަކެއްގެ ތުހުމަތުގައި މި މައްސަލައިގެ ތަހުގީގު މިހާރު ފަށާފައިވާ ކަމަށެވެ.

މި މައްސަލައިގައި ތުހުމަތުކުރެވޭ ކުށްތަކުގެ ތެރޭގައި، އަލިފާން ބޭނުންކޮށްގެން ނުވަތަ ނުރައްކާތެރި ވަސީލަތެއް ބޭނުންކޮށްގެން ގެއްލުން ދޭން އުޅުމާއި، ގޮވާތަކެތި ނުވަތަ އަލިފާން ރޯކުރާ ފަދަ އާލާތެއް އުފެއްދުމާއި، ނުރައްކާތެރި ގެއްލުމެއް ދިނުމުގެ ނިޔަތުގައި އެފަދަ ތަކެތި ގެންގުޅުމާއި އުފުލުމުގެ އިތުރުން، ޓެރަރިސްޓް ޖަމާއަތަކާ ގުޅިގެން މަސައްކަތް ކުރުން ހިމެނެއެވެ.

މި ހާދިސާއާ ގުޅިގެން އެކަކު މިހާރު ހުރީ ފުލުހުންގެ ބަންދުގައެވެ.

ފަރަންސޭސި ދާޚިލީ ވަޒީރު ލޯރެންޓް ނޫނޭޒް ވިދާޅުވީ، ރޭގަނޑުގެ ވަގުތެއްގައި ޕެރިހުގައި ދޭން އުޅުނު ޓެރަރިސްޓް ހަމަލާއެއް ހުއްޓުވުމުގައި ޕެރިސް ފުލުހުންގެ ޔުނިޓަކުން ދެއްކި ހުށިޔާރުކަމަށް ސާބަސް ދެއްވާ ކަމަށެވެ.

މީގެ އިތުރުން ނޫނޭޒް ވިދާޅުވީ، ސަލާމަތީ ކަންކަން ބެލެހެއްޓުމުގައި ވަރަށް މަތީ ދަރަޖައަކަށް ސަމާލުވެ ތިބި ކަމަށެވެ. އަދި މިހާރު ދުނިޔޭގެ މަސްރަހު އޮތް ގޮތުން، އޭނާގެ ބެލުމުގެ ދަށުން ހަރަކާތްތެރިވާ ސަލާމަތީ އަދި ޖާސޫސީ ހުރިހާ ބާރުތަކުން ކުރަމުންދާ މަސައްކަތްތައް ފާހަގަކޮށް އެ ފަރާތްތަކަށް ތައުރީފު ކުރައްވާ ކަމަށްވެސް އޭނާ ވިދާޅުވިއެވެ.

އާރް.ޓީ.އެލް ރޭޑިއޯއިން ފުލުހުންގެ މަސްދަރުތަކާ ހަވާލާދީ ރިޕޯޓުކޮށްފައިވާ ގޮތުގައި، މި ހާދިސާ ހިނގާފައިވަނީ ހޮނިހިރު ދުވަހުގެ ފަތިހުގެ ވަގުތެއްގައެވެ. އެގޮތުން ޕެރިހުގެ އަށްވަނަ އަވަށުގައި ހުންނަ ބޭންކް އޮފް އެމެރިކާގެ އިމާރާތް ކައިރިން ކޮތަޅެއް ހިފައިގެން ދިޔަ ދެ މީހަކު ފުލުހުންނަށް ވަނީ ފެނިފައެވެ.

އާރް.ޓީ.އެލް އިން ބުނި ގޮތުގައި، އޭގެ ތެރެއިން އެކަކު އަތުގައި އޮތް ލައިޓަރަކުން އެއްޗެއްގައި ރޯކުރަން އުޅެނިކޮށް ފުލުހުން ވަނީ އޭނާ ހުއްޓުވާފައެވެ. ނަމަވެސް ދެވަނަ މީހާ ވަނީ އެ ސަރަހައްދުން ފިލާފައެވެ. 

އިރާނުގެ ހަނގުރާމަ ފެށުނު ފަހުން، ފަރަންސޭސިވިލާތުގައި ތިބި އިރާނުގެ ސަރުކާރާ އިދިކޮޅު ބައެއް ފަރާތްތަކުގެ ސަލާމަތީ ކަންކަން ވަރުގަދަކޮށް، އެމެރިކާގެ މަސްލަހަތު އޮތް ތަންތަނާއި ޔަހޫދީ މުޖުތަމައުއާ ގުޅުންހުރި ތަންތަން ހިމެނޭހެން، ހަމަލާއެއް އަމާޒުވެދާނެ ފަދަ ތަންތަނުގެ ސަލާމަތީ ކަންކަން ވަރުގަދަކޮށްފައިވާ ކަމަށް މި ހަފުތާގެ ކުރީކޮޅު ނޫނޭޒް ވަނީ ވިދާޅުވެފައެވެ.