ހަނގުރާމައިގެ ތެރެއަށް ވަދެ، ހޫޘީން އިޒްރޭލަށް ފުރަތަމަ ފަހަރަށް ހަމަލާ ދީފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުންދާ ހަނގުރާމައިގެ ތެރެއަށް ރަސްމީކޮށް ވަދެ، ޔަމަންގެ ހޫޘީން ފުރަތަމަ ފަހަރަށް އިޒްރޭލް އަށް ވަރުގަދަ މިސައިލް ހަމަލާ ތަކެއް ދީފައިވާކަން އެ ޖަމާއަތުން ކަށަވަރު ކޮށްދީފި އެވެ.

މި ހަމަލާ ދީފައިވާކަން ހޮނިހިރު ދުވަހު ހޫތީން އިއުލާން ކުރިއިރު، އިޒްރޭލްގެ އަސްކަރިއްޔާ އިން ވެސް ވަނީ ޔަމަން އިން ފޮނުވާލި މިސައިލެއް ދެނެގަނެވިފައިވާ ކަމަށް ބުނެފަ އެވެ. މިއީ މި ހަނގުރާމަ ފެށުނު ފަހުން ޔަމަން އިން އިޒްރޭލް އަށް މިސައިލް ހަމަލާއެއް އަމާޒު ކުރި ފުރަތަމަ ފަހަރެވެ. 

ހޫތީން ނެރުނު ބަޔާނެއްގައި ބުނެފައި ވަނީ، އިޒްރޭލް އަށް އަމާޒުކޮށް ގިނަ އަދަދެއްގެ މިސައިލް ހަމަލާ ތަކެއް ދީފައި ވަނީ، އީރާން އާއި، ލުބުނާން އާއި، އިރާގުގެ އިތުރުން ފަލަސްޠީނުގެ ބިން ތަކުގެ އުމްރާނީ ވަސީލަތް ތަކަށް އިޒްރޭލް އިން މެދު ނުކެނޑި ދެމުންދާ ހަމަލާ ތަކުގެ ބަދަލު ހިފުމުގެ ގޮތުން ކަމަށެވެ. އަދި ހުރިހާ ފްރަންޓު ތަކެއްގައި އިޒްރޭލް އިން ހިންގަމުންދާ އުދުވާާންތައް ހުއްޓާލަންދެން، އެ ޖަމާއަތުގެ އަސްކަރީ އޮޕަރޭޝަންތައް ކުރިއަށް ދާނެ ކަމުގެ އިންޒާރު ވެސް ހޫތީން ވަނީ ދީފަ އެވެ. 

މި ހަމަލާ ދިނުމުގެ މަދު ގަޑިއިރު ތަކެއް ކުރިން، ހުކުރު ދުވަހު ހޫތީން ވަނީ އީރާާން އާއި، "އެކްސިސް އޮފް ރެސިޓެންސް"އާ ދެކޮޅަށް އިޒްރޭލް އިން ހިންގާ ހަރަކާތްތައް ވަރުގަދަ ކުރާ ނަމަ، އެކަމަށް ރައްދު ދިނުމަށް ތައްޔާރަށް އޮތް ކަމަށް ބުނެފަ އެވެ. ނަމަވެސް، އެ ރައްދު އަންނާނެ ގޮތެއް އޭރު ހާމަ ކޮށްފައި ނުވެ އެވެ. އިޒްރޭލްގެ އަސްކަރިއްޔާ އިން ހޮނިހިރު ދުވަހުގެ ހެނދުނު ބުނި ގޮތުގައި، ޔަމަން އިން ފޮނުވާލި މިސައިލް ދެނެ ގަނެވިފައި ވަނީ ހަނގުރާމަ ފެށުނު ފަހުން ފުރަތަމަ ފަހަރަށެވެ. 

މި ހަނގުރާމައިގެ ތެރެއަށް ހޫތީން ރަސްމީކޮށް ވަނުމާ އެކު، މުޅި ސަރަހައްދަށް ހަނގުރާމަ ފެތުރިގެން ދިޔުމުގެ ބިރު މި ވަނީ ވަރަށް ބޮޑަށް އިތުރުވެފަ އެވެ. ޚާއްސަކޮށް ޔަމަންއާ ދުރުގައި ހުންނަ އަމާޒު ތަަކަށް ހަަމަލާ ދިނުމުގެ ޤާބިލުކަން ހޫތީންގެ ކިބައިގައި ހުރުމާއި، އަރަބި ކަނޑާއި، ރަތް ކަނޑުގެ ދަތުރު ފަތުރުގެ މަގު ތަކަށް ހުރަސް އެޅުމުގެ ބާރު އެ ޖަމާއަތަށް ލިބިފައިވުމުން، މިއީ ބައިނަލްއަޤުވާމީ މުޖުތަމައުން ކަންބޮޑުވާ ކަމެކެވެ.