ދުބާއީ ގައި ޔޫކްރެއިންގެ ޑްރޯން ހަމަލާތަކުން ދިފާއުވާ ނިޒާމުތައް ރައްކާކޮށްފައި ހުރި ގުދަނެއް ސުންނާފަތިކޮށްލާފައިވާ ކަމަށް އީރާނުން ބުނެފި
ދުބާއީގައި ހުރި އެމެރިކާގެ އަސްކަރީ މަރުކަޒުތަކާއި ޔޫކްރެއިންގެ އެންޓި-ޑްރޯން ނިޒާމުތައް ރައްކާކޮށްފައި ހުރި ގުދަނަކަށް އީރާނުން ވަރުގަދަ މިސައިލް ހަމަލާތަކެއް ދީފި. އީރާނުން ދިން މި ހަމަލާގައި ޔޫކްރެއިންގެ 21 މީހަކު މަރުވެފައިވާ ކަމަށް ބެލެވޭ ކަމަށް އައި.އާރު.ޖީ.ސީ އިން ބުނޭ. މި އޮޕަރޭޝަނަކީ އެމެރިކާގެ އަސްކަރީ ބާރުތަކަށް އަމާޒުކޮށް އީރާނުގެ ކަނޑުގެ ސިފައިންނާއި އެއިރޯސްޕޭސް ފޯސް ގުޅިގެން ހިންގި ހައިބްރިޑް ހަރަކާތެއް.
އީރާނުން ފޮނުވާލި މިސައިލެއް، ދުބާއީގެ ޕާމް ޖުމެއިރާގެ އަގުބޮޑު ސަރަހައްދަކަށް އަމާޒުވެފައި. | އެކްސް
ޔުނައިޓެޑް އަރަބް އެމިރޭޓްސްގެ ދުބާއީގައި ހިންގި މިސައިލް އޮޕަރޭޝަނެއްގައި ޔޫކްރެއިންގެ ޑްރޯން ހަމަލާތަކުން ދިފާއުވާ ނިޒާމުތައް ރައްކާކޮށްފައި ހުރި ގުދަނެއް، ސުންނާފަތިކޮށްލާފައިވާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން އިއުލާނުކޮށްފިއެވެ.
އީރާނުގެ ޚާތަމުލް އަންބިޔާ ސެންޓްރަލް ހެޑްކުއާޓާސްގެ ތަރުޖަމާނު ހޮނިހިރު ދުވަހު ވިދާޅުވީ، ދުބާއީގައި ތިބި އެމެރިކާގެ ކޮމާންޑަރުންނާއި ސިފައިން ތިބޭ ތަންތަނަށް އަމާޒުކޮށް ދިން ހަމަލާތަކާ އެކުއެކީގައި، އެމެރިކާ ސިފައިންނަށް އެހީތެރިވުމަށް ޔޫކްރެއިންއާ ގުޅުންހުރި އެންޓި-ޑްރޯން ނިޒާމުތައް ރައްކާކޮށްފައި ހުރި ގުދަނަކަށް ވެސް ހަމަލާދީފައިވާ ކަމަށެވެ. މި ހަމަލާތަކުގައި އެމެރިކާ ސިފައިންނަށް ބޮޑެތި ގެއްލުންތަކެއް ލިބިފައިވާއިރު، ޔޫކްރެއިންގެ މި ގުދަން ހަލާކުކޮށްލާފައިވަނީ އައި.އާރު.ޖީ.ސީގެ އެއިރޯސްޕޭސް ފޯސް އާއި ކަނޑުގެ ސިފައިން ގުޅިގެން ހިންގި ހައިބްރިޑް އޮޕަރޭޝަނެއްގައެވެ. އަދި އެ ވަގުތު އެ ސަރަހައްދުގައި ޔޫކްރެއިންގެ 21 މީހަކު ތިބިކަން ވެސް ތަރުޖަމާނު ފާހަގަކުރެއްވިއެވެ.
ތަރުޖަމާނު އިތުރަށް ވިދާޅުވީ، އެ ގުދަނުގައި ތިބި ޔޫކްރެއިންގެ ސިފައިންނަށް ވީނުވީއެއް އެނގެން ނެތް ނަމަވެސް، ބޮޑަށް ބެލެވެނީ އެ އެންމެން ވެސް މި ހަމަލާގައި މަރުވެފައިވާ ކަމަށެވެ.
