އިންތިޚާބާ ދިމާކޮށް "ހަމައެއް ލަމައެއް" ނެތި އާރްޑީސީގެ މުވައްޒަފުންނަށް ޕްރޮމޯޝަން ދޭތީ މަޖިލީހަށް މައްސަލަ އެއް ހުށަހަޅައިފި

ލޯކަލް ކައުންސިލްތަކުގެ އިންތިޚާބު ބޯމަތިވެފައި ވަނިކޮށް، ރޯޑް ޑިވަލޮޕްމަންޓް ކޯޕަރޭޝަން (އާރްޑީސީ) ގެ މުވައްޒަފުންނަށް އެއްވެސް އުސޫލެއް ނެތި ކުރިއެރުން ނުވަތަ ޕްރޮމޯޝަން ދެމުންދާ ކަމަށް ބުނެ އެ މައްސަލަ ބަލައިދިނުމަށް އެދި ރައްޔިތުންގެ މަޖިލީހަށް ހުށަހަޅައިފި އެވެ.

މި މައްސަލަ މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މީކާއީލް އަޙްމަދު ނަސީމެވެ.

މަޖިލީހުގެ ރައީސް ޢަބްދުއްރަޙީމް ޢަބްދުﷲ އަށް މީކާއީލް ފޮނުއްވި ސިޓީއެއްގައި ބަޔާންކޮށްފައިވަނީ، އަންނަ މަހުގެ ހަތަރުވަނަ ދުވަހު ބޭއްވުމަށް ހަމަޖެހިފައިވާ އިންތިޚާބާ ދިމާކޮށް، އާރްޑީސީގެ މުވައްޒަފުންނަށް އެއްވެސް ހަމައެއް ލަމައެއް ނެތި ޕްރޮމޯޝަން ދެމުންދާ ކަމުގެ ޝަކުވާ ލިބެމުންދާ ކަމަށެވެ. އެހެންކަމުން، މިނިވަން މުއައްސަސާތަކުގެ ކޮމިޓީ މެދުވެރިކޮށް އެ ކުންފުނީގެ ގިނަ މައުލޫމާތުތަކެއް ސާފުކޮށްދިނުމަށް މީކާއީލް ވަނީ އެދިވަޑައިގެންފަ އެވެ.

މީކާއީލް އެދިވަޑައިގެންފައިވަނީ 28 ނޮވެންބަރު 2023 އިން ފެށިގެން މި ހިނގާ މާރިޗު މަހުގެ 10 ވަނަ ދުވަހުގެ ނިޔަލަށް ކުންފުނީގެ ހިންގުމާ ގުޅޭ މުހިންމު ތަފުސީލުތައް ހޯދުމަށެވެ. އޭގެ ތެރޭގައި އާރްޑީސީގައި ޕްރޮމޯޝަން ދޭ އުސޫލުތަކާއި މިންގަނޑުތަކުގެ އިތުރުން، ކުންފުނީގެ ހިންގުމުގެ އޮނިގަނޑާއި، މުވައްޒަފުންގެ އަދަދާއި، ވަޒީފާތަކުގެ ގިންތިތައް ކަނޑައަޅާފައިވާ ގޮތް ހިމެނެ އެވެ. އަދި ވޭތުވެދިޔަ ދެ އަހަރުގެ ބަޖެޓާ ގުޅޭގޮތުން ކުންފުނީގެ ބޯޑުން ނިންމާފައިވާ ނިންމުންތައް ހޯދުމަށްވެސް ވަނީ އެދިފަ އެވެ.

މީގެ އިތުރުން، ކުރީގެ މުވައްޒަފުންގެ ތަފުސީލާއި، ޕްރޮމޯޝަން ދިން ގޮތުގެ ތަފުސީލާއި، މެނޭޖިން ޑިރެކްޓަރުގެ ބިއުރޯގައި ތިބި މުވައްޒަފުންގެ މައުލޫމާތު ހޯދުމަށްވެސް މީކާއީލް ވަނީ ހުށަހަޅުއްވާފަ އެވެ. ހަމައެއާއެކު، އެކި ސެކްޝަންތަކާއި ޑިޕާޓްމަންޓުތަކުގެ ވެރިންގެ ތަފުސީލާއި، މިދިޔަ ޖުލައި މަހުން ފެށިގެން މި މަހުގެ 10 ވަނަ ދުވަހާ ހަމައަށް ބޯޑުން ނިންމި ހުރިހާ ނިންމުންތަކެއް ހޯދައި، މަޖިލީހުގެ ސްޓޭޓް އޯންޑް އެންޓަޕްރައިސަސް (އެސްއޯއީ) ކޮމިޓީގެ ބައްދަލުވުމެއް ވީހާވެސް އަވަހަށް ބާއްވައިދިނުމަށް އޭނާ ވަނީ އެދިވަޑައިގެންފަ އެވެ.

އާރްޑީސީ އަށް ކޮރަޕްޝަންގެ ބޮޑެތި ތުހުމަތުތަކެއް ކުރެވެމުންދާ ދަނޑިވަޅެއްގައި، އެ ކުންފުނިން ވަނީ މި މަހުގެ 14 ވަނަ ދުވަހު ގިނަ އަދަދެއްގެ މުވައްޒަފުން ހޯދުމަށްވެސް އިއުލާނުކޮށްފަ އެވެ. އެގޮތުން ރާއްޖޭގެ ހަ ރަށެއްގެ ސައިޓުތަކަށް ބޭނުންވާ 150 ވަޒީފާއަކަށް މުވައްޒަފުން ހޯދުމަށް ވަނީ ހުޅުވާލާފަ އެވެ. މިއީވެސް އިންތިޚާބާ ދިމާކޮށް ނުފޫޒު ފޯރުވުމަށް ކުރާ ކަމެއްގެ ގޮތުގައި ގިނަ ބަޔަކު ދަނީ ތުހުމަތު ކުރަމުންނެވެ.

އާރްޑީސީން ކުރި އިއުލާނުތަކަށް ބަލާއިރު، އެންމެ ގިނަ މުވައްޒަފުން ހޯދަނީ ހއ. އުލިގަމާއި އއ. ރަސްދޫ އަށެވެ. އެއިން ކޮންމެ ރަށަކަށް 50 މުވައްޒަފުން ހޯދުމަށް ވަނީ އިއުލާނުކޮށް ފައެވެ. މީގެ އިތުރުން ކ. ކާށިދޫ އަށް 24 މުވައްޒަފުން، ތ. މަޑިފުށްޓަށް 13 މުވައްޒަފުން، ޅ. ނައިފަރަށް 12 މުވައްޒަފުން އަދި ޅ. ހިންނަވަރަށް އެއް މުވައްޒަފަކު ހޯދުމަށް ވަނީ ހަމަޖެހިފަ އެވެ.

އެޕްރީލް 4 ވަނަ ދުވަހު ބާއްވާ ލޯކަލްކައުސިލްް ތަކުގެ އިންތިހާބާއި، ދެ އިންތިހާބު އެއްކޮށްލުމަށް ނަގާ ފެންނަ ނުފެންނަ ވޯޓު ކާމިޔާބު ކުރުމަށްޓަކާ، ރައީސް މުއިއްޒު ގެންދަވަނީ ސަރުކާރުގެ ވަސީލަތްތަކާއި ކުންފުނިތައް ބޭނުންކޮށްގެން، ވޯޓަށް ނުފޫޒު ފޯރުވުމުގެ އެތައް އަމަލެއް ހިންގަމުން ކަމަށް އިދިކޮޅު ފަރާތްތަކުން ތުހުމަތު ކުރެ އެވެ.