ދެ އިންތިޚާބު އެއްކޮށްލުމަކީ ވެރިކަން ދަންމާލާ، ރައީސް މުއިއްޒުގެ އީގޯ އަށް ފީޑްކުރުމަށް ކުރާ ކަމެއް: އައިކު
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ބާއްވާ ރެފަރެންޑަމަކީ ރައްޔިތުންނަށް ފުރިހަމަ މައުލޫމާތު ނުދީ، އޮޅުވާލުމުގެ ތެރެއިން ބާއްވާ ވޯޓެއް ކަމަށް ބުނެ ގާނޫނީ ވަކީލުން ދަނީ ކަންބޮޑުވުން ފާޅުކުރަމުން. މިކަމުގެ ސަބަބުން ރައްޔިތުންގެ ބާރުތައް ހަނިވެ، އިންތިޚާބީ ނިޒާމަށް ނޭދެވޭ އަސަރުތަކެއް ކޮށްފާނެ ކަމަށް ވަކީލުން ފާހަގަކުރޭ.
ރާއްޖެޓީވީގެ ނޫނެކޭ ކެމްޕެއިން ޕްރޮގްރާމް | ރާއްޖެ އެމްވީ
ދެ އިންތިޚާބު އެއްކޮށްލުމަކީ ވެރިކަން ދަންމާލާ، ރައީސް މުއިއްޒުގެ އީގޯ އަށް ފީޑްކުރުމަށް ކުރާ ކަމެއް ކަމަށް ޤާނޫނީ ވަކީލް އައިކު އަހުމަދު އީސާ ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަމުންނެވެ.
ދެ އިންތިޚާބު އެއްކޮށްލުމަށް ނޫނެކޭ ބުނަން ޖެހޭ އެންމެ ބޮޑު ސަބަބަކީ މިއީ މުޅި ދައުލަތް ބޭނުންކޮށްގެން އޮޅުވާލައިގެން ބާއްވާ އިންތިޚާބަކަށް ވުން ކަމަށް އޭނާ ވިދާޅުވި އެވެ. އައިކު ވިދާޅުވީ މި އިންތިޚާބާއި ގުޅޭ ގޮތުން ކޯޓުގައި އިލެކްޝަންސް ކޮމިޝަނުން ދެއްކި ވާހަކަތަކަށް ބަލާ އިރު އެ ކޮމިޝަން އަމިއްލަ އަށް ފެއިލްވެފައި ވާ ކަމަށެވެ. މިފަދަ ވޯޓެއް ނަގާ އިރު ވޯޓާއި ގުޅުން ހުރި ހުރިހާ ވާހަކަ އެއް ހުންނަން ވާނީ އާއްމުންނަށް ސާފު ވެފައި ކަމަށް އޭނާ ވިދާޅުވި އެވެ. އަދި ދެ އިންތިޚާބު އެއްކޮށްލަން ޖެހޭ ކަމަށް ބުނެ ދައްކާ ހުއްޖަތުތައް ވެސް މިހާރު ހުންނަން ވާނީ ސާފު ވެފައި ކަމަށް އައިކު ވަނީ ވިދާޅުވެފަ އެވެ.
"ބާކީ ތިބި އެންމެން ކަރަށް ފައިން އަރާފައި، ވަޒީފާ އެއްގައި ތިނަދޫގައި ހުރި މީހެއް ވިއްޔާ އިހަވަންދޫ އަށް ބަދަލުކޮށްފައި މިގޮތަށް ނަގާ ވޯޓަކީ ހަގީގަތުގައި ރައްޔިތުންގެ އިންޓްރެސްޓްގައި ކުރެވޭ ކަންކަމެއް ނޫން. މިއީ ޑރ.މުއިއްޒުގެ އީގޯ އަށް ފީޑްކުރަން ކުރާ ކަމެއް. " އައިކު ވިދާޅުވި އެވެ.
އައިކު ވަނީ މިއީ ރައީސް ޑރ.މުހައްމަދު މުއިއްޒުގެ ބާރުތައް ދަމަހައްޓަން ކުރާ ކަމެއް ކަމަށް ވެސް ވިދާޅުވެފަ އެވެ.
އެ ޕްރޮގްރާމްގައި ވާހަކަދައްކަވަމުން އިދިކޮޅު އެމްޑީޕީގެ ލީގަލް ޑިރެކްޓަރ އަހުމަދު މައުރޫފް ވިދާޅުވީ ލޯކަލް ކައުންސިލް އިންތިޚާބު ގާތް ވެގެން އަންނަ އިރު ވާދަވެރިކަން ބޮޑު ދެ އިންތިޚާބު އެއްކޮށްލާ ސަބަބެއް ސާފު ނުވާ ކަމަށެވެ. އަދި ދެ އިންތިޚާބު އެއްކޮށްލުމާއި މެދު ބާއްވާ ރެފަރެންޑަމް އެހެން ވޯޓަކާއި އެއްކޮށްލައިގެން ބާއްވާ ނިޔަތާއި މެދު އޭނާ ވަނީ ސުވާލު އުފައްދަވާފަ އެވެ. އޭގެ ބޭނުމަކީ ރައްޔިތުންގެ ފޯކަސް އެހެން ކަމަކަށް ހުރި ވަގުތު ބެލުމަށް ފަހު، ރަނގަޅު މައުލޫމާތު ނުދީ ރެފަރެންޑަމް ބޭއްވުން ކަމަށް އޭނާ ވިދާޅުވި އެވެ.
"އެއްވެސް މައުލޫމާތެއް ނުދީ ރައްޔިތުން މެނިޕިއުލޭޓްކޮށްގެން ބާއްވާ އިންތިޚާބެއް މިއީ. ވަރަށް ބޮޑަށް ބިރު އެބަ އޮތް މިހެން މިކަން ވެއްޖެ ނަމަ އަސާސީ ހައްގުތައް ހަނިވެ ދެން އިތުރު ވޯޓެއް ނުލެވުމުގެ ފުރުސަތު ވެސް އެބަ އޮތް." މައުރޫފް ވިދާޅުވި އެވެ.
ރައްޔިތުންގެ ހިޔާލު ހޯދުމުގެ ވޯޓުގައި އަހާ ސުވާލު އިބާރާތްކޮށްފައިވަނީ ގާނޫނުއަސާސީއާ ހިލާފަށްކަމަށް ޤާނޫނީ ވަކީލުން ދަނީ ބުނަމުންނެވެ. އަދި ރިޔާސީ އިންތިޚާބާއި ކައުންސިލް އިންތިޚާބާއި އެއްކޮށްލުމަކީ ރައްޔިތުންގެ ބާރު ނަގާލުން ކަމަށް ވެސް މިކަމާއި ދެކޮޅަށް ވަކާލާތު ކުރާ ފަރާތްތަކުން ބުނެ އެވެ.
