ރައީސް މުއިއްޒު ޑިކްޓޭޓަރެއްގެ ސިފައިގައި މަސައްކަތް ކުރަމުންދާތީ، ރިފެރެންޑަމަށް ނޫނެކޭ ބުނަން ޖެހޭ: ސަނީފް

ރައީސް ޑރ.މުހައްމަދު މުއިއްޒު ޑިކްޓޭޓަރެއްގެ ސިފައިގައި މަސައްކަތް ކުރަމުންދާތީ، ކުރިއަށް މިއޮތް ރިފެރެންޑަމަށް ނޫނެކޭ ރައްޔިތުން ބުނަން ޖެހޭ ކަމަށް ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ގެނެސްދިން ނޫނެކޭ ޕްރޮގްރާމްގައި ސަނީފް ވިދާޅުވީ ލޯކަލް ކައުންސިލް އިންތިޚާބާއެކު ނަގާ، ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ނަގާ ރިފެރެންޑަމަށް ނޫނެކޭ ބުނަން ޖެހޭ ކަމަށެވެ.  

ރިފެރެންޑަމަށް ނޫނެކޭ ބުނަން ޖެހޭ ގިނަ ސަބަބުތަކެއް އެބަހުރިކަން ފާހަގަކުރައްވައި ސަނީފް ވިދާޅުވީ އިންތިޚާބުތަކާ ދިމާކޮށް ސިޔާސީ ހަލަބޮލިކަން ގައުމަށް ކުރިމަތިވާ ކަމަށް ބުނެ ސަރުކާރުން ދައްކަމުންދަނީ ހުސް ބަހަނާ ކަމަށާއި، އެއީ ރައްޔިތުންގެ އަތުގައި އޮތް ބާރެއް ނިގުޅައިގަތުމަށް ސަރުކާރުން ކުރަމުންދާ މަސައްކަތެއް ކަމަށެވެ. އަދި ވިދާޅުވީ ސަރުކާރަށް ރިފެރެންޑަމް ކާމިޔާބު ވެއްޖެނަމަ ރާއްޖޭގެ ރައްޔިތުންގެ މަޖިލިސް އުވާލެވޭ ކަމަށާއި، މި ސުވާލު ވެސް ރައްޔިތުން އުފައްދަން ޖެހޭ ކަމަށެވެ. 

މީގެ އިތުރުން ސަނީފް ވިދާޅުވީ ރައީސް މުއިއްޒު މަސައްކަތް ކުރައްވަނީ ޑިކްޓޭޓަރެއްގެ ސިފައިގައި ހުންނަވައިގެން ކަމަށާއި، ޚުދުމުޚުތާރު ދިގު ވެރިކަމަކަށް މިސްރާބު ޖަހާފައިވާ ކަމަށެވެ.

އެގޮތުން ގާނޫނީ ރުކުންތަކުގެ ތެރެއިން ފަހަރަކު ރުކުނެއް ބަދަލު ކުރަމުންދާ ކަމަށާއި، ރާއްޖޭގެ ދުސްތޫރީ ނިޒާމު އެއްކޮށް ހަލާކު ކުރަމުންދާ ކަމަށް އޭނާ ވިދާޅުވި އެވެ. އަދި ވިދާޅުވީ މިއަދު ރައްޔިތުންގެ އަތުގައި ބާރު އެބައޮތް ކަމަށާއި، އެބޭރުގެ ބޭނުންކޮށް ރިފެރެންޑަމަށް ނޫނެކޭ ބުނަން ޖެހޭ ކަމަށެވެ. 

ދެން ފުރަތަމަ ކަމަކީ، ގާނޫނުގައި އެ މި ބޭފުޅުން މިއަދު ހުށަހަޅައިގެން އުޅޭ މައިގަނޑު ޕޮއިންޓަކަށް މި އޮންނަނީ، ދެ އިންތިޚާބު އެއްކުރުމާއި މަޖިލީހުގެ މުއްދަތު ގުނުމުގައި. ހަގީގަތުގައި ދެ އިންތިޚާބު އެކުރުމަކަށް ރައްޔިތުންގެ ވޯޓަކަށް އަންނާކަށް ނުޖެހޭ. އެހެންނަމަވެސް، ދިވެހިރާއްޖޭގެ ރައްޔިތުންގެ މަޖިލިސް އެބަ އުވައިލެވޭ. އާދެ. ކާކުތޯ މި އެ ވާހަކަ ދައްކަނީ؟ ހަ މަސްދުވަސް ވިޔަސް، އެއް އަހަރު ވިޔަސް، މަޖިލީހުގެ ޓާމަކަށް ހޮވިފައި ހުވާކޮށްގެން ތިބި މެންބަރުން ތަކެއްގެ މުއްދަތުން ބައެއް އުނިވެގެން އެ މަޖިލިސް އުވުމަކީ މިއީ ރައްޔިތުންގެ ރިފެރެންޑަމަކަށް ދާންޖެހޭ ސަބަބު. ގާނޫނުގައި ކަނޑައެޅިގެން ބަޔާންކޮށްފައި އެބައޮތް. އަޅުގަނޑަށް ހީވާ ގޮތުގައި 179 ކަންނޭނގެ މަޖިލީހުގެ ރައްޔިތުންގެ މަޖިލީހުގެ އިންތިޚާބު ބާއްވަން ޖެހޭނެ ދުވަހާއި ރައްޔިތުންގެ މަޖިލީހުގެ މެންބަރުން ހުވާކުރަން ޖެހޭނެ ދުވަސް ކަނޑައެޅިފައި އެބައޮތް. މި އުޅެނީ ދެ އިންތިޚާބު އެއް ކުރުމުގެ މައްސަލައެއް ނޫން. އުޅެނީ ކަނޑައެޅިގެން ތިން ބާރު، ވަކިވެފައި އޮތް ބާރުތަކެއް އެއްކުރުމަށްޓަކައި ކުރަމުންދާ މަސައްކަތެއް.

ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް

މީގެ އިތުރުން ސަނީފް ވިދާޅުވީ ސަރުކާރުގެ ސުޕަ މެޖޯރިޓީ އޮތް ރައްޔިތުންގެ މަޖިލީހަށް ވެސް ފާޑު ވިދާޅުވެފަ އެވެ. 

އޭނާ ވިދާޅުވީ މިއަދު އެ މެންބަރުންގެ މިނިވަންކަން ނެތް ކަމަށާއި، ގާނޫނީ ބުރަދަނެއް ނެތް ކަމަށެވެ. އަދި ގާނޫނު އަސާސީއަށް ބަދަލު ގެނައުމަށް އެ މެންބަރުން ކުރަމުންދާ މަސައްކަތްތަކާ މެދު ސުވާލު އުފެދޭ ކަމަށް ސަނީފް ވިދާޅުވި އެވެ.