މިއަދުގެ ހާލަތަކީ، ކޮންމެ ދުވަހެއްގެ އިރު އޮއްސެނީ ޤާނޫނީ ވެރިކަމަށް އެތައް ސުވާލެއް ކުރިމަތި ކުރުވާފައި: ރައީސް ސޯލިހު
އައްޑޫ ސިޓީގެ ތަރައްޤީއަށް ނިމިދިޔަ އެމްޑީޕީ ސަރުކާރުން 8 ބިލިއަން ރުފިޔާ ހޭދަކުރިކަން ފާހަގަކުރައްވައި، ތަރައްޤީ ގެނެވޭނީ ލާމަރުކަޒީ ނިޒާމުގެ ތެރެއިން ރައްޔިތުންގެ ބައިވެރިވުމާ އެކު ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވި. އަދި މިހާރުގެ ސަރުކާރުން މުއައްސަސާތަކުގެ ބާރުތައް ކަނޑުވާލަމުންދާ ކަމަށް ތުހުމަތުކުރައްވައި، ޤާނޫނީ ވެރިކަމާ މެދު އުފެދިފައިވާ ސުވާލުތަކަށް ކުރިއަށް އޮތް އިންތިޚާބުގައި ރައްޔިތުން ޖަވާބުދޭންޖެހޭނެ ކަމަށް އެމަނިކުފާނު ވިދާޅުވި.
އައްޑޫ ސިޓީގެ "އަފިރިންގެ އައްޑޫ" މެނިފެސްޓޯ ލޯންޗްކުރުމުގެ ރަސްމިއްޔާތުގައި ކުރީގެ ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގަންނަވަނީ. 26.03.2026 | ރާއްޖެ އެމްވީ
މިއަދުގެ ހާލަތު އޮތް ގޮތުން ކޮންމެ ދުވަހެއްގެ އިރު އޮއްސެނީ ޤާނޫނީ ވެރިކަމަށް އެތައް ސުވާލެއް ކުރިމަތި ކުރުވާފައި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް ސޯލިހު އެފަދައިން ވިދާޅުވީ "އަފިރިންގެ އައްޑޫ" މެނިފެސްޓޯ ލޯންޗްކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ރައީސް ސޯލިހު އެފަދައިން ވިދާޅުވީ ރައީސް ޑރ. މުހައްމަދު މުއިއްޒުގެ ވެރިކަމުގައި މިނިވަން މުއައްސަސާތަކާއި އިދާރާތަކަށް ނުފޫޒު ފޯރުވަމުންދާ މިންވަރާއި މެދު ކަންބޮޑުވުން ފާޅުކުރައްވައި ވާހަކަދައްކަވަމުންނެވެ. ރައީސް ސޯލިހު ވަނީ ކުރިއަށް އޮތް އިންތިޚާބާއި ދިމާކޮށް ރިޝްވަތުގެ ގޮތުގައި ސަރުކާރުން އެތައް ވަޒީފާ އެއް ބަހަމުންދާ ކަމަށާއި މި އިންތިޚާބުގައި ދޭ ވޯޓަކީ އެކަމަށް ނޫނެކޭ ބުނުމަށް ދޭ ވޯޓަކަށް ހަދަން ޖެހޭ ކަަމަށެވެ.
އައްޑޫ އަށް ލިބިފައިވާ ކުރިއެރުމާއި އެ ސިޓީގައި ކުރެވިފައިވާ ކަންތައްތަކަކީ އައްޑޫގެ ވިސްނުމާއި ފިކުރާއި އެކު ކުރެވިފައިވާ ކަންތައްތަކެއް ކަމަށް ފާހަގަކުރައްވައި ރައީސް ސޯލިހު ވިދާޅުވީ ރަށެއް ނުވަތަ ސިޓީ އަކަށް ތަރައްޤީ ގެނެވޭނީ އެތަނެއްގެ ރައްޔިތުންގެ ވިސްނުމާއި ފިކުރާއި އެކީގައި ކަމަށެވެ. އައްޑޫ ސިޓީގެ ތަރައްޤީ އަށް ނިމިދިޔަ އެމްޑީޕީގެ ވެރިކަމުގައި 8 ބިލިއަން ރުފިޔާ ހޭދަކޮށްފައިވާ ކަމަށް އެ މަނިކުފާނު ފާހަގަކުރެއްވި އެވެ.
ރާއްޖެ ތަރައްޤީކޮށް ކުރި އެރުވޭނީ ލާމަރުކަޒީ ނިޒާމާއި އެކު ބާރުތައް ދޫކޮށްލައިގެން ކަމަށް އެމްޑީޕީ އިން ގަބޫލުކުރި ނަމަވެސް މިހާރު އޮތް ޕީއެންސީގެ ސަރުކާރުގެ ވިސްނުމަކީ އެއީ ނޫން ކަމަށް އެމަނިކުފާނު ވިދާޅުވި އެވެ. މި ވެރިކަމުގައި ރައްޔިތުންގެ ބާރުވެރިކަމާއި ކުރިއެރުމަށްޓަކައި ކުރެވުނީ ކޮން ކަމެއްތޯ ރައީސް ސޯލިހު ވަނީ ސުވާލު އުފައްދަވާފަ އެވެ.
"ކޮންމެ ދުވަހަކު އިރު އެރުމާއި އެކު ފެންނަނީ ކޮންމެވެސް މުއައްސަސާ އެއްގެ ބާރު ކަނޑުވާލާތަން. ކޮންމެ ދުވަހެއްގެ އިރު އޮއްސެނީ ޤާނޫނީ ވެރިކަމަށް އެތައް ސުވާލެއް ކުރިމަތި ކުރުވާފައި. މިއަށް އެޕްރިލް 4ގައި ޖަވާބުދޭން މި ޖެހެނީ." ރައީސް ސޯލިހު ވިދާޅުވި އެވެ.
އެޕްރިލް 4 ވަނަ ދުވަހު ބާއްވާ ކައުންސިލް އަދި ޑަބްލިއުޑީސީ އިންތިޚާބަކީ ވަރަށް މުހިންމު އިންތިޚާބެއް ކަމަށާއި އެއީ އެންމެން އެއްކޮށް ގެނައި ހެޔޮ ވެރިކަން އަނބުރާ ހޯދުމަށް އެޅޭ ފިޔަވަޅެއް ކަަމަށް ރައީސް ސޯލިހު ވަނީ ވިދާޅުވެފަ އެވެ. ލާމަރުކަޒީ ނިޒާމް އުފައްދާ ދަމަހައްޓާ ބަޔަކީ އެމްޑީޕީ ކަމަށާއި ކުރިއަށް އޮތް އިންތިޚާބުގައި އެމްޑީޕީ އަށް ވޯޓު ދޭން ޖެހެނީ އެ ސަބަބާއި ހުރެ ކަމަށް ރައީސް ސޯލިހު ވިދާޅުވި އެވެ.
މީގެ އިތުރުން ބަދަހި އައްޑޫ އެއް ބޭނުންވާ ކަމަށް ވާނަމަ އައްޑޫ އިން ހޮވަންވީ އެމްޑީޕީ ކަމަށް ރައީސް ސޯލިހު ވިދާޅުވި އެވެ. އައްޑޫގެ މެނިފެސްޓޯ އަށް ރައީސް ސޯލިހުގެ ފުރިހަމަ ތާއީދު އޮތްކަމަށާއި އެއީ ހާސިލް ކުރެވޭނެ ފުރިހަމަ މެނިފެސްޓޯ އެއް ކަމަށް އެ މަނިކުފާނު ވަނީ ސިފަކުރައްވާފަ އެވެ.
