ބަޖެޓުން ބޭރުން ހޯމް މިނިސްޓަރު އަލީ އިހުސާން މަސްލަހަތު އޮންނަ ކުންފުންޏަކަށް 50 މިލިއަން ރުފިޔާ ދީފައިވޭ: މެންބަރު ޝަމްހީދު

ބަޖެޓުން ބޭރުން ހޯމް މިނިސްޓަރު އަލީ އިހުސާނުގެ މަސްލަހަތު އޮންނަ ކުންފުންޏަކަށް 50 މިލިއަން ރުފިޔާ ދީފައިވާ ކަމަށް ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަހްމަދު ޝަމްހީދު ވިދާޅުވެއްޖެ އެވެ.

ބުދަ ދުވަހުގެ ރޭ ބޭއްވި އައްޑޫ ހުޅުދޫ-މީދޫ "އުންމީދެއްގައި" ޖަލްސާގައި މެންބަރު ޝަމްހީދު ވިދާޅުވީ، 2023 ވަނަ އަހަރު ލިބުނު އާމްދަނީއަށްވުރެ މިދިޔަ އަހަރު ލިބުނު އާމްދަނީ 8 ބިލިއަން އިތުރު ކަމަށާއި، ޑޮލަރު ވެސް އިތުރަށް ލިބިފައިވާ ކަމަށެވެ. 

ނަމަވެސް ތަރައްގީގެ މަޝްރޫއެއް ނުހިނގާ ކަމަށާއި، ބަޖެޓަށް ވީ ގޮތް ނޭނގޭ ކަމަށް އޭނާ ވިދާޅުވި އެވެ. އަދި ވިދާޅުވީ މިދިޔަ އަހަރުގެ ބަޖެޓު ބޯހިޔާވަހިކަމަށް ޚާއްޞަ ކުރި ނަމަވެސް ބޯހިޔާވަހިކަމާ ގުޅުންހުރި އެއްވެސް މަޝްރޫއެއް ހިންގާފައިނުވާ ކަމަށެވެ.

މީގެ އިތުރުން ޝަމްހީދު ވިދާޅުވީ މިނިސްޓަރު އިހުސާން ހިންގާ ކުންފުންޏެއް ކަމުގައިވާ ޓްރޭޑް ނެޓް ކިޔާ ކުންފުންޏަކަށް ވެސް ބަޖެޓުން ބޭރުން 50 މިލިއަން ޑޮލަރު ޖަމާކުރި ކަމަށެވެ. އެއީ ފަހަރުގައި މޯލްޑިވްސް 2.0 ސޮފްޓްވެއަރ އަށް ދިން ފައިސާ ކަމަށް ވެދާނެ ކަމަށާއި، ނަމަވެސް އޭގެ ތަފްސީލު ސަރުކާރުން ހާމަ ކޮށްފައި ނުވާ ކަމަށް އޭނާ ވިދާޅުވި އެވެ.

ޑޮލަރުން އެކަނި އާމްދަނީ އިތުރަށް ލިބުނު 850 މިލިއަން ޑޮލަރު މިއީ އިތުރަށް ލިބުނު އާމްދަނީގެ ވާހަކަ އެއް. މި އަހަރު މިހާތަނަށް ވެސް ފުރަތަމަ ދެ މަސްދުވަހު 1.7 ބިލިއަން ރުފިޔާ މި ބޭފުޅުންނަށް އިތުރަށް ލިބުނު. މި ހުރިހާ ފައިސާ އެއް ލިބުނުއިރު މީގެ އެއްވެސް ކަމެއް މިއަދާ ހަމައަށް، ރައްޔިތުންގެ ތަރައްގީގެ އެއްވެސް ކަމެއް ނުވެ އޮތީ، ނޫނީ ދަރަނި ނުދެއްކި އޮތީ ކީއްވެތޯއޭ އަޅުގަނޑުމެން ބަލައިލަން އެބަޖެހޭ. އަޅުގަނޑު ކުރިން ދެންނެވިހެން މި ބޭފުޅުންގެ މި ފައިސާތައް ހުރީ ދައުލަތުގެ އެކިއެކި ކުންފުނިތަކުގެ އެކައުންޓަށް ޖަމާކޮށް ދެން އެއަށް ވީ ނުވީ ގޮތެއް އަޅުގަނޑުމެންނަށް ނޭނގޭ ގޮތަށް ގެއްލުވައިލާފަ. އަޅުގަނޑަށް އިނގޭ އެކަމަކު، މިނިސްޓަރު އިހުސާނުގެ ކުންފުންޏަކަށް އިހުސާނު، ހަވާލުވެފައި އޮންނަ ކުންފުންޏަކަށް، ޓްރޭޑް ނެޓް ކިޔާ ކުންފުންޏަކަށް ވެސް ބަޖެޓުން ބޭރުން ފަންސާހަކަށް މިލިއަން ޑޮލަރު އޮތް ޖަމާކޮށްފަ. ފަހަރެއްގައި ވެދާނެ އެ މޯލްޑިވްސް 2.0 ސޮފްޓްވެއާ ގަންނަން ދެއްވި ކަމަށް ވެސް. އެކަމަކު އެވެސް ރައްޔިތުންނަށް އެނގެންޖެހޭނެ. ބޯހިޔާވަހިކަމަށް ޖެހި ފައިސާ ސޮފްޓްވެއަރ އެއް ގަންނަން ހޭދަކޮށްފިކަން. އެކަމަކު އެވަރެއް ބުނައެއް ނުދޭ.

ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަހްމަދު ޝަމްހީދު

ދިވެހި ދައުލަތަށް ލިބޭ ހުރިހާ ފައިސާއެއް މިސަރުކާރުން ހޭދަކުރަމުން ދަނީ ތިން ކަމަކަށްކަން ފާހަގަކުރައްވައި މެންބަރު ޝަމްހީދު  ވިދާޅުވީ، އެއީ ޕީއެންސީ ހިންގުމާއި، އިތުރު ވަޒީފާތައް އުފައްދާ ވަޒީފާތަކަށް މީހުން ނެގުމުގެ އިތުރުން ރާއްޖެއަކީ މިލިޓަރީ ގޮތުން ބާރުވެރި ދައުލަތަކަށް ހެދުމަށް ރައީސް މުއިއްޒު ގެންގުޅުއްވާ ތަސައްވުރަށް ކަމަށެވެ.

މެންބަރު ޝަމްހީދު ވިދާޅުވީ ތަރައްގީގެ މަޝްރޫއުތަކުގެ ތެރެއިން ހޭދަ ކޮށްފައި ވަނީ ހަމައެކަނި ރަސްމާލެ މަޝްރޫއަށް ކަމަށާއި، މިދިޔަ ދެ އަހަރު ރައްޔިތުންނަށް އޮޅުވާލައިގެން އެތައް ހޭދައެއް ކޮށްފައިވާ ކަމަށެވެ. އަދި ވިދާޅުވީ މިހުރިހާ ކަމެއް ރައްޔިތުންނަށް ހާމައަށް ފެންނަން ހުރުމުން ރައްޔިތުން މިއަދުގެ ސަރުކާރު ބަލައި ނުގަންނަ ކަމަށެވެ.