ކުޑަ ކުއްޖަކު ދިރިހުންނަން ބޭނުންވާ ކުޑަ ހޮޅިކޮޅެއް އެންސްޕާ މެދުވެރިކޮށް ގެނެސްދިނުމުގެ ހުއްދަ ނުދީ އޮއްވާ ކުއްޖާ ނިޔާވެއްޖެ

ކުޑަ ކުއްޖަކު ދިރިހުންނަން ބޭނުންވާ ކުޑަ ހޮޅިކޮޅެއް އެންސްޕާ މެދުވެރިކޮށް ގެނެސްދިނުމުގެ ހުއްދަ ނުދީ އޮއްވާ ކުއްޖާ ނިޔާވެއްޖެ އެވެ. 

މި މައްސަލަ ފެންމަތިވީ އެ ކުއްޖާގެ މަންމަ އެ ވާހަކަތަކައް ސޯޝަލް މީޑިއާގައި ހިއްސާ ކުރި ހިސާބުންނެވެ. އެކުއްޖާގެ މަންމަ އާމިނަތު ޔަޝްފާ ކުރި ޕޯސްޓެއްގައި ބުނެފައިވަނީ އެނާގެ ދަރިފުޅު އިބްރާހިމް އަޒާން ސުހައިލް އަށް ސެރެބްރަލް ޕަލްސީ ޖެހިފައިވާކަން އެނގުނީ އޭނާއަށް އެއްޗެހި ދިރުވަން އުނދަގޫވެ، ގިނައިން ހޮޑުލެވި ކަންކަން ދިމާވުމުންނެވެ. އެގޮތުން މިދިޔަ އަހަރުގެ ޖުލައި މަހު އޭނާ އެވާހަކަ ފޭސްބުކުގައި ހިއްސާ ކުރި އެވެ. 

ނަމަވެސް މި މަހުގެ 16 ވަނަ ދުވަހު އާންމުންގެ ސަމާލުކަމަށް ޔަޝްފާ ގެނެސް ވަނީ ކާއެއްޗެހި ގޮހޮރަށް ފޮނުވަން ބަނޑަށް ލައްވަންޖެހޭ ހޮޅި ކޮޅެއް ނުލިބި 8 މަސްވެފައިވާ ކަމުގެ ކަންބޮޑުވުން ހިއްސާ ކޮށްފަ އެވެ. އޭނާ ބުނީ މިދިޔަ އަހަރުގެ އޮގަސްޓް މަހު އޭގެ 2 ހޮޅިކޮޅު އެސްޓީއޯ މެދުވެރިކޮށް ގެނަންނަން އޯޑަރު ޖެހި ކަމަށެވެ. އަދި 8 މަސް ވެގެން ދިޔަ އިރުވެސް ހޮޅިކޮޅު ނުގެނެސްދިން ކަމަށެވެ. އަދި އެހެންގޮތެއް ހޯދަން އެސްޓީއޯއަށް ގުޅި ކަމަށާއި، ފާމަސީތައް ވެސް ބެލި ކަމަށެވެ. އަދި ކުރިން ލައްވާފައި ހުރި ހޮޅި ކޮޅު ވަގުތުން ބަދަލުކުރަން ޖެހިފައިވާ އިރު، ހޮޅިކޮޅު ނުލިބި ގޮތް ހުސްވެފައިވާ ކަމަށް މި މަހުގެ 16 ވަނަ ދުވަހު ޔަޝްފާގެ ޕޯސްޓުގައި ލިޔެފައިވެ އެވެ. 

އޭނާ ބުނީ 16 ވަނަ ދުވަހު އެސްޓީއޯ ފާމަސީއިން އެ ދުވަހު ގުޅި ކަމަށެވެ. އަދި އެންސްޕާއިން އެ ހޮޅިކޮޅު ގެންނަން ހުއްދަ ދީފައި ނުވާ ކަމަށެވެ. އެހެންކަމުން އަދިވެސް ހޮޅިކޮޅު ގެންނަން އޯޑަރު ޖަހާފައި ނުވާ ކަމަށެވެ. އަދި މިހާ ދުވަސްވި އިރު ވެސް އެސްޓީއޯ އިން ޖަވާބެއް ދީފައި ނުވަނީ ކީއްވެގެންތޯއާއި އެންސްޕާއިން ހުއްދަ ނުދޭންވީ ސަބަބެއް ނެތް ކަމަށް އޭނާ ބުނެފައިވެ އެވެ. 

މިއީ މިކުއްޖާ ކެއިންބުއިން އެތެރެވާ ހަމައެކަނި މަގު

އައިމިނަތު ޔަޝްފާ - ކުއްޖާގެ މަންމަ

ޔަޝްފާގެ ޕޯސްޓުގައި އެސްޓީއޯ އަދި ރައީސް ޑރ. މުހައްމަދު މުއިއްޒު ވެސް ޓެގްކޮށްފައި އިނެވެ.

މައުލޫމާތު ލިބިފައިވާ ގޮތުގައި މި ހޮޅިކޮޅު ސަރުކާރުގެ މައި ހޮސްޕިޓަލް އައިޖީއެމްއެޗް ގައި ވެސް ލިބެން ނެތެވެ. އެއީ ސްޓޮކް ހުސްވެފައި ހުރުމުންނެވެ. އަދި އެހެން ފާމަސީތަކުގައި ވެސް ނެތެވެ. މީގެ ކުރިން އެސްޓީއޯ ފާމަސީ އިން އެ ހޮޅިކޮޅު ބޭސް ސިޓީއަށް ލިބެ އެވެ. ނަމަވެސް ފަހުން އިންޑިއާއިން 100 ޑޮލަރަށް ލިބޭ ހޮޅި ކޮޅު 13،000 ދިވެހި ރުފިޔާއަށް ވިއްކަމުން ދިޔަ ކަމަށް ބައެއް ފަރާތްތަކުން ހުރީ ޝަކުވާ ކޮށްފަ އެވެ. 

ނަމަވެސް އެންސްޕާއިން ހޮޅި ކޮޅު ގެންނަން ހުއްދަ ނުދީގެން އެސްޓީއޯ ފާމަސީއިން އެ ހޮޅިކޮޅު ނުގެނެސްދީ އުޅެނިކޮށް އެ ކުއްޖާ ވަނީ ބުދަ ދުވަހު ނިޔާވެފަ އެވެ. އެކުއްޖާގެ މަންމަ ބުދަ ދުވަހުގެ ހެނދުނު ބުނީ ދަރިފުޅުގެ ހާލަތު ވަރަށް ކްރިޓިކަލް ކަމަށެވެ. އަދި ދިރިހުންނާނެ ކަމުގެ އުއްމީދު ނެތް ކަމަށާއި، ފަހު ނޭވާ ގުނަމުން އަންނަ ކަމަށެވެ. އަދި ކުރިން ދުވަހަކު އެ ހޮޅިކޮޅު ލިބިއްޖެ ކަމަށް އައިޖީއެމްއެޗްގެ ޕްރޮކިއުމެންޓް އިން ބުނެފައިވީ ނަމަވެސް މިހާރު ވަގުތު ފާއިތުވެއްޖެ ކަމަށް ކުއްޖާގެ މަންމަ ޔަޝްފާ ވަނީ ބުނެފަ އެވެ. 

ދަރިފުޅު މިހާރު އޮތީ ގާތްގަނޑަކަށް ގޮސްފައި. އޭނާ އެދަނީ އެންމެ ފަހު ނޭވާ ލަމުން. އައިޖީއެމްއެޗްގައި އޮތީ. ކުރީ ދުވަހު އައިޖީއެމްއެޗް ޕްރޮކިއުމެންޓް އިން ގުޅާފައި ބުނި އޭތި ލިބިއްޖެޔޭ. އެބައޮތް ލިބިފައި. އެކަމަކު މިހާރު މާ ލަސްވެއްޖެ. ހާލު ދެރަވީމަ ނުގުޅޭނެ. 

އައިމިނަތު ޔަޝްފާ - ކުއްޖާގެ މަންމަ

އެނގިފައިވާ ގޮތުގައި އެންސްޕާއިން ހުއްދަ ނުދޭކަން ވެސް އަދި އެސްޓީއޯ ފާމަސީއިން އެ އޯޑަރު ނުކުރާކަންވެސް މިދިޔަ 8 މަސް ތެރޭގައި އޮތީ ކުއްޖާގެ މަންމައަށް ނާންގަ އެވެ. 

މި މައްސަލައިގައި އެންސްޕާއިން އަންނަނީ އެސްޓީއޯ ކުށްވެރި ކުރަމުންނެވެ. އެންސްޕާއިން ބުނަނީ އެކަމާއި ގުޅިގެން އަންގަންޖެހޭ ކަންކަން އެސްޓީއޯއަށް އަންގާފައިވާ ކަމަށެވެ. އަދި ލަސްވުމެއް އުޅެނީ އެސްޓީއޯ ފަޅިންނެވެ. ނަމަވެސް އެސްޓީއޯއިން ބުނަނީ އެންސްޕާއިން ހުއްދަ ނުދީގެންނެވެ. 

ނަމަވެސް މިހާތަަނަށް އައި އިރު އެސްޓީއޯ އަދި އެންސްޕާއިން ވެސް މިކަމާއި ގުޅިގެން އެއްވެދް ބަހެއް ބުނެފައި ނުވެ އެވެ. މިކަމުގައި އިހުމާލުވި ފަރާތެއް ވެސް ނެތެވެ. އަދި 6 އަހަރު ކުޑަކުއްޖަކު ހޮޅި ކޮޅެއް ނުލިބިގެން ދުނިޔެ ދޫކުރި އިރު، އެ ހޮޅި ކޮޅު ގެނެސްދޭން އެދި މަޔަކު ދިޔައީ އާދޭސް ކުރަމުންނެވެ. ނަމަވެސް ދައުލަތުގައި އެކަމަށް އަޅާލި އެއްވެސް އިދާރާއެއް ނެތެވެ. 

އަޒާންގެ ކަށުކަމާކެމީގެ ކަންކަން ހަމަޖެހިފައި އޮތީ އާ ސަހަރާގަ އެވެ. އަދި ކަށުނަމާދު އޮތީ އިޝާނަމާދަށްފަހު އާސަހަރާ މިސްކިތުގަ އެވެ.