ސަލްމާގެ ބަޔާނަކީ ދިވެހި ރައްޔިތުންގެ ބަހެއް ނޫން، އެއީ ދިވެހިންގެ ސްޓޭންޑެއް ވެސް ނޫން!

ރާއްޖޭގެ ނޫސް ތަކުގެ ފަލަ ސުރުޚީގައި އޮތީ، އދ. ގެ ހިއުމަން ރައިޓްސް ކައުންސިލްގައި ރާއްޖެ އިން ދެއްކި ވާހަކަ އެވެ. ޖެނީވާގައި ހުންނަ އދ. ގެ އޮފީހަށް ރާއްޖެ އިން ކަނޑައަޅުއްވާފައި ހުންނަވާ ދާއިމީ މަންދޫބު ސަލްމާ ރަޝީދު ދެއްކެވި ވާހަކަ އަށް ސަމާލުކަން ލިބުނީ، އެ ވާހަކަ މޮޅު ކަމަކުން ނޫނެވެ. އެ ވާހަކައިގެ ގަޓު ކަމަކުން ވެސް ނޫނެވެ. ހުތުރު ކަމުންނެވެ. ލަދުވެތި ކަމުންނެވެ. ބައިނަލްއަޤުވާމީ މައިދާނުގައި ރާއްޖެ އަށް އިސް ޖަހަން ސަލްމާ އާއި ދިވެހި ސަރުކާރުން މަޖުބޫރު ކުރުވީތީ އެވެ. 

 ސަލްމާ ދެއްވި ބަޔާނުގައި މުޅިން ވެސް ދައްކަވާފައި ވަނީ، ރައްދުގައި އީރާން އިން ދެމުން އަންނަ ހަމަލާ ތަކުގެ ވާހަކަ އެވެ. އެގޮތުން ރައްދުގައި އީރާން އިން ދެމުން އަންނަ ހަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރި ކުރައްވާ ކަމަށް ސަލްމާ ވިދާޅުވި އެވެ. އަދި އީރާން އިން ދެމުން އަންނަ ހަމަލާ ތަކުގެ ސަބަބުން، ބައިނަލްއަޤުވާމީ ކަނޑުގެ ދަތުރު ފަތުރަށް ވެސް ހުރަސް އެޅެމުން އަންނަ ކަމަށް ފާހަގަ ކޮށްފައިވެ އެވެ. މި ބަޔާނުގައި އެމެރިކާ އާއި އިޒްރޭލްގެ ނަން ވެސް ހިމަނަން ދިވެހި ސަރުކާރަށް ނުކެރުނެވެ.

އެކަމަކު، ހަގީގަތަކީ މިއީ އެމެރިކާ އާއި އިޒްރޭލް އިން ފެށި ހަނގުރާމަ އެއް ކަމެވެ. އިސްވެ ހަމަލާ ދޭން ފެށީ ވެސް އެމެރިކާ އާއި އިޒްރޭލް އިންނެވެ. އެމެރިކާ އާއި އިޒްރޭލްގެ ހަމަލާ ތަކުގައި އީރާންގެ ކުށެއް ނެތް، މައުސޫމު އެތައް ބަޔަކު ޝަހީދުވެއްޖެ އެވެ. އަންހެން ކުދިން ކިޔަވަމުން ދިޔަ ސްކޫލަކަށް އަމާޒުކޮށް ހަމަލާ ދީ، 160 އަށް ވުރެ ގިނަ ކުދިން ޝަހީދު ކޮށްލި އެވެ. އީރާންގެ ރޫހީ ލީޑަރުގެ އިތުރުން، ސަރުކާރުގެ އިސްވެރިން އަވަހާރަ ކޮށްލި އެވެ. ނަމަވެސް، ދިވެހި ސަރުކާރުގެ ފަރާތުން ސަލްމާ އިއްވެވި ބަޔާނުގައި މީގެ އެއްވެސް ވާހަކައެއް ނެތެވެ. މިއީ އިންތިހާ އަށް ލަދުވެތި ކަމެކެވެ.

މިއީ ދިވެހި ރައްޔިތުންގެ ފަރާތުން ސަލްމާ އިއްވެވި ބަޔާނެއް ނޫނެވެ. މިއީ ދިވެހި ރައްޔިތުންގެ ޝުއޫރެއް ވެސް ނޫނެވެ. ދިވެހި ރައްޔިތުން ތިބި ސްޓޭންޑެއް ވެސް ނޫނެވެ. ދިވެހި ރައްޔިތުންގެ ޝުއޫރު ހުރި ގޮތެއް ވެސް ނޫނެވެ. ދިވެހި ރައްޔިތުން ޤަބޫލު ކުރާ ގޮތެއް ވެސް ނޫނެވެ. ފަހަރުގައި ދިވެހި ސަރުކާރާއި، ސަލްމާ އަށް އެކަން ނޭނގުނަސް، ސަލްމާގެ ބަޔާނާ ގުޅިގެން ސޯޝަލް މީޑިއާ ބަލައިލުމުން އެކަން ސާފު ވާނެ އެވެ. ބައިނަލްއަޤުވާމީ މުޖުތަމައުގައި ރާއްޖެ އިން ހިފަހައްޓަމުން އައި ރީތި ނަމާއި، އިންސާނިއްޔަތުގެ ސިފަތައް މިއަދު ސަލްމާ އާއި ދިވެހި ސަރުކާރުން ފަހަތަށް ވައްޓާލައިފި އެވެ.

ތުއްތު ކުދިންނަށް އަމާޒުކޮށް ދިން ހަމަލާ ނުފެނުނީ ސަލްމާ އާއި، ދިވެހި ސަރުކާރަށެވެ. ސްކޫލަށް އަމާޒުކޮށް ދިން ހަަމަލާ ވެސް ނުފެނުނީ ސަލްމާ އާއި ދިވެހި ސަރުކާރަށެވެ. ކުށެއް ނެތް އެތައް ބަޔަކާ ދެކޮޅަށް ދެމުން އަންނަ ހަމަލާތައް ނުފެނުނީ ސަލްމާ އަށާއި، ދިވެހި ސަރުކާރަށެވެ. އިންސާނިއްޔަތުގެ އަގުތަކާއި، އިންސާނިއްޔަތުގެ ސިފަތައް ފުނޑު ފުނޑު ކުރަމުންދާކަން ނޭނގުނީ ވެސް ސަލްމާ އަށާއި ދިވެހި ސަރުކާރަށެވެ. އެކަމަކު، ސަލްމާ އާއި ދިވެހި ސަރުކާރަށް ފެނުނީ އެންމެ ކަމެކެވެ. އީރާންގެ އަމިއްލަ ޤައުމާއި، ރައްޔިތުންނާއި، ޤައުމުގެ މިނިވަންކަމާއި، ސިޔާސަތު އަދި އިސްލާމީ އުންމަތުގެ ހައްގުގައި ޔަހޫދީންނާ ދެކޮޅަށް އީރާން އިން ދޭ ހަމަލާ އެވެ. 

އީރާން އިން ހަމަލާ ދެނީ އިޒްރޭލް އަށާއި، އެމެރިކާގެ އަމާޒު ތަކަށެވެ. މެދު އިރުމަތީގެ ޤައުމު ތަކަށް އަމާޒުކޮށް އީރާން އިން ހަމަލައެއް ނުދެ އެވެ. އީރާން އިން ހަމަލާ ދެނީ މެދު އިރުމަތީގައި ހުރި އެމެރިކާގެ އަސްކަރީ ބޭސް ތަަކަށެވެ. އެމެރިކާގެ އެމްބަސީ ތަކަށާއި، އަމާޒު ތަކަށެވެ. މިކަން ނޭނގުނީ ދިވެހި ރައްޔިތުންނަކަށް ނޫނެވެ. ސަލްމާ އަށާއި، ދިވެހި ސަރުކާރަށެވެ. މިއީ ލަދުވެތި ކަމުގެ އިންތިހާ ނޫން ދެން ކޮން ކަމެއް ހެއްޔެވެ؟