ބަނދަރުތަކުން ފެށި ވާހަކަ، ނިމުނީ މޭވާ އާއި ތަރުކާރީގެ ވާހަކަ އިން!

އިޤްތިޞާދޭ ބުންޏަސް ހިތަށް އަރަނީ ސައީދު އެވެ. އެހެން ނުވާންވީ ސަބަބެއް ނެތެވެ. ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ އިޤްތިޞާދީ ވަޒީރު މުޙައްމަދު ސައީދު އަކީ، މާ މޮޅު އިކޮނޮމިސްޓެކެވެ. އެހެންޏާ އެހެން ނުވާންވީ ސަބަބެއް ވެސް ނެތެވެ. ދެ ސަރުކާރެއްގައި އިޤްތިޞާދީ ވަޒީރުކަން ކޮށްލެވޭ ބޭފުޅަކަށް މި ރާއްޖޭގައި ހުންނެވީ ސައީދު އެކަނި އެވެ. އެހާ ވެސް ސައީދު މޮޅީ އެވެ. ކުރީގެ ރައީސް ޢަބްދުﷲ ޔާމީންގެ ވެރިކަމުގައި ވެސް ސައީދު އެވެ. އޭގެ ފަހުން މިހާރު، ރައީސް މުޢިއްޒުގެ ވެރި ކަމުގައި ވެސް ސައީދު އެވެ. ސައީދުގެ ނަމުގެ ކުރިއަށް އިކޮނޮމިސްޓް ހިމަނައި، ނަމުގެ ގޮތުގައި އިކޮނޮމިސްޓް މުޙައްމަދު ސައީދު ކިޔާ ވަރު ވެސް ވެއްޖެ އެވެ.

ވެރިކަން ކުރާ ޕީއެންސީ އިން އައްޑޫގައި ބޭއްވި ކެމްޕެއިން ޖަލްސާއެއްގައި ސައީދު ދެއްކެވި ވާހަކަ ކޮޅެއް އަޑު އެހީމެވެ. އެ ވާހަކަ ފަށަނީ ރާއްޖޭގެ ބަނދަރު ތަކާ ހިސާބުންނެވެ. އަމިއްލަ ފަރާތްތަކުން މަދު މަދުން ބަނދަރު ތަކެއް އޮޕަރޭޓު ކުރި ނަމަވެސް، ގިނަ ބަނދަރު ތަކެއް އޮޕަރޭޓު ކުރަނީ ސަރުކާރުން ކަމަށް ސައީދު ވިދާޅުވެ އެވެ. ވިޔަފާރި ވެރިން ބޭނުން ވަނީ އައްޑޫ އަށް ފަސޭހަ އިން މުދާ ގެންނަން ކަމަށާއި، ވިއްސާރަޔަސް، ކަނޑު ގަދަޔަސް އެކަން ކުރަން ވިޔަފާރިވެރިން ބޭނުންވާ ކަމަށާއި، އެކަން އެގޮތަށް ކުރަން ޖެހޭ ކަމަށް ވެސް ސައީދު ވިދާޅުވެ އެވެ. 

އެކަމުގައި ފައިދާ ބޮޑީ ޕްރައިވެޓް ސެކްޓާ އިން ވިޔަފާރި ބަނދަރުތައް ހިންގުންތޯ، ނުވަތަ ސަރުކާރުން އެކަން ކުރުންތޯ ބައްލަވައި، އެކަމުގެ "ޑިބޭޓް" އަކަށް ދާން ބޭނުން ނުވާ ކަމަށް ސައީދު ވިދާޅުވި އެވެ. އެކަމުގައި ސައީދު ވަކި ފަޅިއެއް ނުނެންގެވި ނަމަވެސް، މާލޭގެ ވިޔަފާރި ބަނދަރުން މުދާ ނަގައިގެން، އައްޑޫ ސިޓީ އާއި، ކުޅުދުއްދުށި ސިޓީ އަދި ރާއްޖޭގެ އެހެން ހިސާބު ތަކަށް ވެސް މުދާ ގެންގޮސް ހަދަ އެވެ. މިވީހާ ދުވަހަށް އެ ކަންތައް ގެންދަނީ ކުރަމުންނެވެ. 

އަގު ހެޔޮކޮށް މުދާ ގެންނަން ވިޔަފާރިވެރިން ބޭނުންވާ ވާހަކަ އާއި، އަގު ހެޔޮ މުދާ ރައްޔިތުން ބޭނުންވާ ވާހަކަ ސައީދު ދައްކަވާއިރު، އަގު ބޮޑު ވަނީ ސަރުކާރުގެ ކުންފުންޏަކުން ލޮޖިސްޓިކްގެ މަސައްކަތް ނުކުރާތީ ހެއްޔެވެ؟ ސައީދު ވިދާޅުވާން އެ އުޅުއްވަނީ އެ ވާހަކަ ހެއްޔެވެ؟ އެހެން ވެއްޖިއްޔާ ދަންނަވަންތޯ އެވެ. މިއަދު ރައްޔިތުން ކަރަންޓު ބިލު ބޮޑުވާ ވާހަކަ އާއި، ފެން ބިލު ބޮޑުވާ ވާހަކަ ދައްކަމުން އަންނަނީ، ކޮން ބައެއް އެ ޚިދުމަތް ދޭތީ ހެއްޔެވެ؟ އެ ޚިދުމަތް ދެނީ ސަރުކާާރުގެ ކުންފުނި ތަކަކުން ނޫން ހެއްޔެވެ؟ ސައީދުމެން ދައްކާ ވާހަކަ ކޮންމެ ވެސް ވަރަކަށް ދެކޮޅު ޖެހެން ޖެހޭނެ ނޫން ހެއްޔެވެ؟

ސައީދު ދައްކަވަން ބޭނުންވާ ވާާހަކައެއް ދައްކަވަން ނުކެރި، ވަރަށް ދުރު ދުރުން ވިދާޅުވާން އުޅޭހެން ވެސް ހީވި އެވެ. އެހެން ހީވާން ޖެހުނީ، ބަނދަރުން ސައީދު ފެއްޓެވި ވާހަކަ އާއި، ބަނދަރު ހިންގުމުގެ ވާހަކަ ގޮސް ނިމުނީ، މޭވާ އާއި ތަރުކާރީގެ ވާހަކަ އިންނެވެ. ދެން ސައީދު ދެއްކެވީ ހަނޑުލާއި، ހަކުރާއި ފުށް، އަދި ރައްޔިތުންނަށް ބޭނުންވާ 10 ބާވަތުގެ މޭވާ އާއި، 10 ބާވަތުގެ ތަރުކާރީ އަދި އިތުރު ތިން ބާވަތެއްގެ ކާނާ ހިމަނައިގެން ޕެކޭޖު ފުޅާ ކުރުމުގެ ވާހަކަ އެވެ. ދެން ވިދާޅުވީ، ކޮންމެ މުސޫމެއްގައި ވިޔަސް، ރައްޔިތުންނަށް އެ ތަކެތި ފޯރުކޮށްދިނުމަކީ ސަރުކާރުގެ ވާޖިބެއް ކަމަށެވެ. 

އެއްވެސް ވަރަަކަށް ސައީދު ވިދާޅުވާން އުޅޭ އެއްޗެއް ފަހުމެއް ނުވި އެވެ. ރާއްޖޭގައި ވިޔަފާރީގެ ބަނދަރުތައް ހިންގުމުން ފެށި ވާހަކަ، ސައީދު އެ ނިންމަވާލެއްވީ 23 ބާވަތުގެ ކާނާ އިންނެވެ. ސަރުކާރުން ބޭނުން ވަނީ 10 ބާވަތުގެ މޭވާ އާއި، 10 ބާވަތުގެ ތަރުކާރީ އާއި، އިތުރު ތިން ބާވަތާ އެކު، ހަނޑުލާއި، ހަކުރު އަދި ފުށް ރައްޔިތުން ކައިގެން ބޮއެގެން ތިބުން ކަށަވަރު ކުރުމުގެ ވާހަކަ ސައީދު މި ދެއްކެވީ، ސަރުކާރުން ހެދި ލޮޖިސްޓިކް ކުންފުނި ދިފާއު ކުރުމަށެވެ.