ޤައުމުގެ އިސްތިޤުލާލަށް އަރައިގެންފައިވާ ކަމަށް ބުނެ، މަދޫރޯ މިނިވަން ކުރުމަށް ވެނެޒުއެލާގެ ފޮރިން މިނިސްޓަރު އެމެރިކާ އަށް ގޮވާލައްވައިފި

އެމެރިކާ އިން ހައްޔަރުކޮށް، އަދި ވެރިކަމުން ދުރުކޮށްފައިވާ ވެނެޒުއެލާގެ ރައީސް ނިކޮލަސް މަދޫރޯ ވަގުތުން މިނިވަން ކުރުމަށް، ވެނެޒުއާލެގެ ފޮރިން މިނިސްޓަރު އިވާން ގިލް ގޮވާލައްވައިފި އެވެ.

އޭނާ މިހެން ގޮވާލައްވާފައި ވަނީ ސްވިޒަލެންޑުގެ ޖެނީވާގައި ކުރިއަށް ދިޔަ އދ. ގެ އިންސާނީ ހައްގުތަކާ ބެހޭ މަޖިލީހުގައި ވާހަކަ ދައްކަވަމުންނެވެ. 

ހޯމަ ދުވަހު ކުރިއަށް ދިޔަ އެ ބައްދަލުވުމުގައި ވާހަކަ ދައްކަވަމުން ފޮރިން މިނިސްޓަރު ވިދާޅުވީ، ވެނެޒުއެލާގެ ޤާނޫނީ ރައީސް މަދޫރޯ އާއި އޭނާގެ އަނބިކަނބަލުން ސީލިއާ ފްލޮރެސް އެމެރިކާ އިން ވަގުތުން މިނިވަަން ކުރަން ޖެހޭ ކަމަށެވެ. ފޮރިން މިނިސްޓަރުގެ ވާހަކައިގައި ވަނީ، މަދޫރޯ އަކީ ވެނެޒުއެލާގެ ދުސްތޫރީ ހަމަތަކުގެ މަތިން އިންތިޚާބުވެފައިވާ ރައީސްކަން ފާހަގަ ކުރައްވައިފަ އެވެ. 

މިދިޔަ ޖަނަވަރީ މަހުގެ ތިން ވަނަ ދުވަހު އެމެރިކާގެ އަސްކަރިއްޔާ އިން ހިންގި އޮޕަރޭޝަންގައި މަދޫރޯ ހައްޔަރު ކޮށްފައިވާއިރު، އޭނާ ހައްޔަރު ކޮށްފައި ވަނީ ބައިނަލްއަޤުވާމީ ޤާނޫނު ތަކާ ޚިލާފަށް ކަމަށް ވެނެޒުއެލާގެ ސަރުކާރުން ދަނީ ބުނަމުންނެވެ. މި ހާދިސާއާ ގުޅިގެން ވެނެޒުއެލާ އާއި، އެމެރިކާއާ ދެމެދު އޮތް ސިޔާސީ ގުޅުމަށް ވަނީ ނުތަނަވަސްކަން ކުރިމަތިވެފަ އެވެ. 

އދ.ގެ އިންސާނީ ހައްގުތަކާ ބެހޭ މަޖިލީހުގައި ވެނެޒުއެލާގެ ފޮރިން މިނިސްޓަރު މި މޭރުމުން ވާހަކަ ދެއްކެވިއިރު، މިއީ މަދޫރޯ ހައްޔަރު ކުރި ފަހުން ބައިނަލްއަޤުވާމީ މައިދާނެއްގައި އެ ޤައުމުން މި މައްސަލައިގެ އަޑު މިހާ ބޮޑަށް އުފުލި ފުރަތަމަ ފަހަރެވެ. ފޮރިން މިނިސްޓަރު ގިލް ވަނީ، އެމެރިކާގެ މި އަމަލަކީ އެހެން ޤައުމެއްގެ އިސްތިޤުލާލަށް އަރައި ގަތުން ކަމަށް ސިފަ ކުރައްވައިފަ އެވެ. 

ގިލްގެ ވާހަކަތަކާ ގުޅިގެން އެމެރިކާ އިން މިހާތަނަށް ރަސްމީކޮށް ވަކި އެއްޗެއް ބުނެފައި ނުވެ އެވެ. މަދޫރޯ ހައްޔަރު ކުރި އޮޕަރޭޝަނަކީ ވެނެޒުއެލާގައި ޑިމޮކްރަސީ ޤާއިމު ކުރުމަށް އެޅި ފިޔަވަޅެއްގެ ގޮތުގައި އެމެރިކާގެ ބައެއް ފަރާތްތަކުން ވަނީ ބުނެފަ އެވެ. ވެނެޒުއެލާގެ ވަގުތީ ސަރުކާރުން ދަނީ މަދޫރޯ މިނިވަން ކުރުމަށް ބައިނަލްއަޤުވާމީ މުޖުތަމައާ ގުޅިގެން މަސައްކަތް ވެސް ކުރަމުންނެވެ.