ވޯޓު ހޯދަން ސަރުކާރުން ދީނީ ކާޑު ކުޅޭ ކަމުގެ ހެކި އެންމެ ބެނާ އަކުން!

ހުޅުމާލެ އިން ބްރިޖް ހައިވޭ އަށް އަރަން ދުއްވާފައި އަންނަ މަގުގައި ދަމާފައި ހުރި ބެނާއެއް ދުށީމެވެ. ބެނާ ތައްޔާރު ކޮށްފައި ހުރި ކުލަ ފެނުމާ އެކު، އެއީ ސަރުކާރު ޕާޓީ އިން ދަމާފައިވާ ބެނާއެއްކަން އެނގިއްޖެ އެވެ. ބެނާއާ ކައިރި އަށް ޖެހިލާފައި އޭގައި ލިޔެފައި އޮތް އެއްޗެއް ވެސް ބަލާލީމެވެ. އެ ކިޔަމުން ހިތައް އެރި އެވެ. އަބަދު ވެސް ދީނީ ކާޑު ކުޅޭ މީހުން ހަމަ ކުޅޭނެ އެވެ. އެކަން ކޮށްގެން ވެސް ބަލާނީ ވޯޓު ހޯދޭތޯ އެވެ. 

ބެނާގައި ލިޔެފައި އޮތީ، "ޤުރުއާން ހިތު ދަސްކުރަން ދޭ ސަމާލުކަން އިތުރުވެއްޖެ" މިހެންނެވެ. މިއީ ކުރިއަށް އޮތް ކައުންސިލް އިންތިޚާބާއި، ދެ އިންތިޚާބު އެއްކޮށްލަން ނަގާ ވޯޓުގެ ކެމްޕެއިން އަށް ސަރުކާރުން ދަމާފައި ހުރި ބެނާ އެކެވެ. ޤުރުއާން ހިތު ދަސް ކުރަން ދޭ ސަމާލުކަން އިތުރުވުމުން، ސަރުކާރަށް ކައުންސިލް ދޭންވީ ހެއްޔެވެ؟ ޤުރުއާން ހިތު ދަސް ކުރަން ދޭ ސަމާލުކަން އިތުރުވުމުން، ސަރުކާރުން ބޭނުންވާ ގޮތަށް ދެ އިންތިޚާބު އެއްކޮށްލަން އާނއެކޭ ބުނަަންވީ ހެއްޔެވެ؟ ހައްދުން ނެއްޓިޔަސް ތަން ކޮޅެއް ބޮޑު ވަރެވެ.

ޤުރުއާން ހިތުު ދަސް ކުރުމަކީ ޒަމާނުއްސުރެ މި ރާއްޖޭގައި ކުދިން އަދި ބޮޑެތި މީހުން ވެސް ކުރަމުން އައި ކަމެކެވެ. ޚާއްސަކޮށް ދަރިވަރުންގެ ހިތް ތަކުގައި ޤުރުއާނަށް އޮންނަ ލޯބި ޖެއްސުމާއި، ޤުރުއާން ކިޔެވުމަށް ބާރު އެޅުން އަދި ޤުރުއާން ހިތު ދަސް ކުރުމަކީ މައިންބަފައިން ޚާއްޞަ ސަމާލު ކަމެއް ދީގެން ކުރަމުން އަންނަ ކަމެކެވެ. އެއީ ވަކި ޕާޓީއެއްގެ ވެރި ކަމެއް، ނުވަތަ ވަކި ބޭފުޅަކު ވެރިކަމުގައި ހުންނަވައިގެން ވާ ކަމެއް ވެސް ނޫނެވެ. 

މިދިޔަ ދިގު ތާރީޚުގައި މި ރާއްޖޭގައި ޤުރުއާން ހިތުދަސް ހާފިޒުން އުފެދިއްޖެ އެވެ. ކިތަންމެ ކިތަންމެ ދަރިވަރަކު ޤުރުއާން ހިތު ދަސްކޮށްގެން، ޙާފިޒު ކަމުގެ ސަނަދު ހާސިލު ކޮށްފި އެވެ. ބައިނަލްއަޤުވާމީ މުބާރާތް ތަކުގައި ވާދަކޮށް، ކިތަންމެ ދަރިވަރުން ތަކެއް ރަން ވަނަ ތަކެއް ހޯދައިި، ޤައުމަށް ރީތި ނަމާއި ޝަރަފު ވެސް ހޯދައިދީފި އެވެ. އެކަމަކު، މިއީ ސަރުކާާރަކުން އެކަން ބެނާ އަކަށް ތިލަ ކޮށްގެން، ރައްޔިތުންގެ ވޯޓު ހޯދަން އުޅޭ ފުރަތަމަ ފަހަރެވެ. މި ރާއްޖޭގައި ހުދުމުޚުތާރު ވެރިކަމެއް އޮތް ކަމަށް ބުނާ ޒަމާނުގައި ވެސް، މިޒާތުގެ ކަމެއް ހިނގާފައި ހުރިހެނެއް ހިއެއް ނުވެ އެވެ. 

އަނެއްކޮޅުން ކީރިތި ޤުރުއާން އާއި، ދީނީ ކަންކަމަކީ އިންސާނާ އާާއި އިންސާނާ ހެއްދެވި ފަރާތާ ދެމެދު އޮންނަ މަތިވެރި ކަމެކެވެ. އެއީ ވަކި މީހަކު މެދުވެރި ވެގެން އޮންނަ ގުޅުމެއް ވެސް ނޫނެވެ. އެއީ އިންސާނާ ﷲ ސުބުހާނަހޫ ވަތައާލާ އަށް ކުށްތަންވެ، ދީނީ ކަންކަމާއި އަޅުކަން ކުރުމުގައި ޝާމިލުވެ އުޅުނު މިންވަރަކާއި، ދީނީ އަޤީދާ އާއި، ދީނީ ކަންކަމަށް އޮންނަ ސަމާލުކަން ވެސް އިތުރު ވެގެންދާ މިންވަރަކުން ޙާޞިލުވާ ކަމެކެވެ.

މިއީ އިންތިޚާބުތަކާ ދިމާކޮށް ކުރަން ހެޔޮވާ ވަރުގެ ކަމެއް ވެސް ނޫނެވެ. ދީނީ ކާޑު ކުޅުމާއި، ދީނީ ކަންކަން ބޭނުން ކޮށްގެން ވޯޓު ހޯދަން މަސައްކަތް ކުރުމަކީ އޮންނަ ގޮތެއް ވެސް ނޫނެވެ. ވޯޓު ހޯދަން ވިއްކަން ޖެހޭނީ ތިމާމެންގެ ސިޔާސަތެވެ. ތިމާމެން ކޮށްފައި ހުރި ކަންކަމެވެ. ތިމާމެން ކޮށްދޭނެ ކަންކަމެވެ. ރައީސް ޑޮކްޓަރު މުޙައްމަދު މުޢިއްޒު އާއި، ޕީއެންސީގެ ސަރުކާރުން ރައްޔިތުންނަށް ކަމެއް ނުކޮށްދޭއިރު، ވޯޓު ހޯދަން ދީނީ ކާޑު ކުޅުމަކީ އިންތިހާ އަށް ލަދުވެތި ކަމެކެވެ.