އެމެރިކާގައި ވެސް ރާއްޖޭގައި ވެސް އޮތީ ސުޕްރީމް ކޯޓެއް، ރާއްޖޭގައި ނެތިގެން މިއުޅެނީ އިޚުލާސްތެރި ކަމާއި، ތެދުވެރިކަން

ދުނިޔޭގެ އެންމެ ބޮޑު ޑިމޮކްރަސީ އޮތް އެއް ޤައުމު އެމެރިކާގައި ވެސް އޮތީ ސުޕްރީމް ކޯޓެވެ. ޑިމޮކްރަސީގެ ޅަފަތުގައި އޮތް މި ދިވެހި ރާއްޖޭގައި ވެސް އޮތީ ސުޕްރީމް ކޯޓެވެ. އެމެރިކާ އަށް ވުރެ ރާއްޖޭގެ ޑިމޮކްރަސީ ޅަވިޔަސް، އެމެރިކާ އަށް ވުރެ ރާއްޖޭގެ އާބާދީ މަދުވިޔަސް އަދި އެމެރިކާގެ ސުޕްރީމް ކޯޓުގައި ތިބޭ ފަނޑިޔާރުންގެ އަދަދަށް ވުރެ ރާއްޖޭގެ ސުޕްރީމް ކޯޓުގައި ތިބޭ ފަނޑިޔާރުންގެ އަދަދު މަދުވިޔަސް، ސުޕްރީމް ކޯޓުގެ ބާރާއި، އެ ކޯޓުގެ އިޙްތިޞާސް އޮތީ ހަމަ އެއް މިންވަރަކަށެވެ. 

އެހެނީ، އެމެރިކާގެ ސުޕްރީމް ކޯޓަކީ އެންމެ ފަހު ބަސް އިއްވާ މަރުޙަލާ ކަމަށްވާއިރު، ރާއްޖޭގެ ސުޕްރީމް ކޯޓަކީ ވެސް އެންމެ ފަހު ބަސް އިއްވާ މަރުޙަލާ އެވެ. ތިން ބާރު ވަކިވެފައި އޮންނަ މި ނިޒާމުގައި، ސުޕްރީމް ކޯޓުގެ އެންމެ ބޮޑު މަސްއޫލިއްޔަތަކީ އަދުލު އިންޞާފު ޤާއިމުކޮށް، ޤައުމުގައި ހިނގާ ނޭއްގާނީ ކަންކަމާއި، ސަރުކާރުގެ އެތެރޭގައި ހިނގާ ވިޔާނުދާ ކަންކަން ހުއްޓުވުމެވެ. ތިން ބާރު ވަކިކޮށް، ސުޕްރީމް ކޯޓުގައި އިންނަވާ އުއްތަމަ ފަނޑިޔާރަކީ ދައުލަތުގެ ވެރިއެއްގެ ގޮތުގައި ހުންނަވަނީ ސަމާސާ އަކަށް، ނުވަތަ ކުޅޭ ކުޅިވަރަކަށް ނޫނެވެ.

މިދިޔަ ބުރާސްފަތި ދުވަހު އެމެރިކާގެ ސުޕްރީމް ކޯޓުން އެ ނިންމީ ވަރުގަދަ އަދި ހައިރާން ކުރުވަނިވި ނިންމުމެކެވެ. އެ ޙުކުމަކީ، ދެ ވަނަ ދައުރަކަށް ވެރިކަން ކުރައްވަމުން އަންނަ އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރަށް، މިހާތަނަށް ކުރިމަތިވި އެންމެ ބޮޑު ނާކާމިޔާބީ އެވެ. އެންމެ ބޮޑު ގޮންޖެހުމެވެ. އެމެރިކާ އަށް އެތެރެ ކުރާ މުދަލުން ޓެރިފް، ނުވަތަ ޑިއުޓީ ނަގަން ޓްރަމްޕް ނިންމެވި ނިންމުމަކީ، ޣައިރު ޤާނޫނީ ނިންމުމެއް ކަމަށް ކަނޑައެޅީ ސުޕްރީމް ކޯޓުގެ ހަ ފަނޑިޔާރުންގެ އަޣުލަބިއްޔަތުންނެވެ. ނުވަތަ ފަނޑިޔާރުންގެ ތެރެއިން ހަ ފަނޑިޔާރުން އެކަމާ ދެކޮޅަށް ވޯޓު ދެއްވިއިރު، ތިން ފަނޑިޔާރަކު އެއްކޮޅަށް ވޯޓު ދެއްވި އެވެ. 

އެ ޙުކުމުން އެންމެ ގިނަ ބަޔަކަށް ހައިރާާންކަން ލިބުނީ، ޙުކުމް ކުރެއްވި ފަނޑިޔާރުންގެ ތެރޭގައި ވެރިކަން ކުރާ ރިޕަބްލިކަން ޕާޓީގެ ރައީސުން އައްޔަން ކުރައްވާފައިވާ ފަނޑިޔާރުން ވެސް ހިމެނުނީތީ އެވެ. ޚާއްސަކޮށް، 2017 ވަނަ އަހަރު އުފެދުނު ޓްރަމްޕްގެ ރިޔާސީ ފުރަތަމަ ދައުރުގެ ތެރޭގައި، ސުޕްރީމް ކޯޓަށް ޓްރަމްޕް އައްޔަން ކުރެއްވި ދެ ފަނޑިޔާރުން ވެސް ވަނީ އޭނާގެ ޓެރިފްގެ ސިޔާސަތާ ދެކޮޅަށް ޙުކުމް ކުރެއްވުމަށް ވޯޓު ދެއްވައިފަ އެވެ. އެއީ ފަނޑިޔާރު  ނީލް ގޯސަޗް އަދި ފަނޑިޔާރު ކޯނީ ބްރެޓް އެވެ.

ގިނަ ބަޔަކު މި ޙުކުމް ސިފަ ކުރީ، ޤާނޫނީ އިންތައް ދަމަހައްޓައި، ސަރުކާރުން ޤާނޫނާ ޚިލާފަށް ކުރަމުން އަންނަ ކަންކަން ހުއްޓުވުމަށް ސުޕްރީމް ކޯޓުން ކުރެއްވި ވަރުގަދަ ޙުކުމެއްގެ ގޮތުގަ އެވެ. އެއާ އެކު، އެމެރިކާގެ ޤާނޫނީ ނިޒާމުގެ ވަރުގަދަ ކަމާއި، ބާރުތައް ވަކިވެފައި އޮތުމާއި، ސުޕްރީމް ކޯޓުގެ ފަނޑިޔާރުންގެ ޖެހިލުން ކުޑަ ކަމަށާއި، އިންސާފުން ކަންކަން ކުރުމަށް ދެއްވާ އަހަންމިއްޔަތުކަން ފާހަގަވި ކަމަށް ސިޔާސީ ތަޖުރިބާކާރުން ވަނީ ބުނެފަ އެވެ. އެއީ އެމެރިކާ އެވެ. 

ދައްކަން މި އުޅެނީ ރާއްޖޭގެ ވާހަކަ އެވެ. މި ރާއްޖޭގައި ވެސް އޮތީ ސުޕްރީމް ކޯޓެކެވެ. ސަރުކާރުން ބޭނުންވާހާ ގޮތަކަށް ޤާނޫނު އަސާސީ އަށް ބަދަލުތައް ގެނެސް، ތިން ބާރު ވަކިވެފައި އޮތް މި ނިޒާމުގެ ފުރިހަމަ ކަމާއި، މޫރިތިކަން ނަގާލަމުންދާއިރު، ސުޕްރީމް ކޯޓު އެ އޮތީ ހަނު އެވެ. ސަރުކާރުން ކުރިމަތި ކުރުވާ ޕްރެޝަރާއި، ސަރުކާރު ދެކެ ބިރުން، ސުޕްރީމް ކޯޓުގެ ފަނޑިޔާރުން ޤާނޫނު ނެގެހެއްޓުމަށް މަސައްކަތް ނުކުރާ ކަމީ، މިއަދު ލޯ މައްޗަށް ފެންނަން އޮތް ހަގީގަތެވެ.

ސަރުކާރުން މަޖިލިސް މެމްބަރުން ހަންމަތަކޮށް، މެމްބަރުންގެ އަތް ފައިގައި ތަޅު އަޅުވަން ޤާނޫނަށް ގެނައި އިސްލާޙު ބާތިލު ކުރަން ސުޕްރީމް ކޯޓަށް މައްސަލަ ހުށަހަޅާފައި އޮންނަތާ އަހަރަކަށް ވުރެ ގިނަ ދުވަސްވީ އެވެ. އެ މައްސަލަ ހުށަހެޅުމާ އެކު، ސުޕްރީމް ކޯޓުގެ ބެންޗަށް ވެގެން ދިޔަ ގޮތާއި، ތިން ފަނޑިޔާރުންނާ މެދު ކަންތައް ވެގެން ދިޔަ ގޮތް ހަނދާން ނެތޭހާ ދުވަހެއް ނުވެ އެވެ. އެކަންކަން ބަލަަން އޮތް ޖުޑީޝަލް ސާވިސަސް ކޮމިޝަން (ޖޭއެސްސީ) އަށް އައި ބަދަލާއި، މެމްބަރުން ބަދަލުވީ ގޮތް ވެސް އެ ހުރީ ފެންނާށެވެ. އައްޔަން ކުރީ ކޮން ބައެއްކަން ނޭނގޭ މީހަކު މި ރާއްޖޭގައި ވެސް ނެތެވެ. 

ތިން ފަނޑިޔާރުން ކުއްލި ގޮތަކަށް ބަދަލު ކުރުމާ އެކު، ދެން ސުޕްރީމް ކޯޓަށް އައްޔަން ކުރެއްވީ ރައީސް ޑޮކްޓަރު މުޙައްމަދު މުޢިއްޒު ފޮނުވި ނަންތަކެވެ. އޭގެ ފަހުން އުއްތަމަ ފަނޑިޔާރަކަށް ވެސް އައްޔަން ކުރެއްވީ ރައީސް މުޢިއްޒު ބޭނުންފުޅުވި ފަރާތެކެވެ. ސުޕްރީމް ކޯޓުގެ ބެންޗު ބަދަލުވީ ފަހުން، މި ފާހަގަ ކުރި މައްސަލައިގެ އެންމެ އަޑު އެހުމެއް ވެސް މިއަދާ ހަމައަށް ބޭއްވިފައި ނެތެވެ. ރައްޔިތުންގެ މަޖިލީހުގެ މެމްބަރެއްގެ ގޮނޑިއާ މެދު ސުވާލު އުފައްދައި ހުށަހެޅު މައްސަލަ ޙުކުމް ކުރުމާ ހަމައިގައި އޮންނަތާ، ހަ މަސް ދުވަހަށް ވުރެ ގިނަވީ އެވެ. އަދި ޙުކުމް ނުކުރެވެ އެވެ.

ފާހަގަ ކުރަން މި އުޅެނީ އެއް ވާހަަކަ އެކެވެ. އެމެރިކާ ގައި، އަދި ރާއްޖޭގައި ވެސް އޮތީ ސުޕްރީމް ކޯޓެވެ. އެކަމަކު، ރާއްޖޭގައި ނެތީ އިޚުލާސްތެރިކަމާއި، ތެދުވެރިކަމާއި، އަދި ޤާނޫނު ނަގަހައްޓައި، ދެމެހެއްޓުމުގެ ނިޔަތެވެ. އެ ނިޔަތް އޮވެއްޖެ ނަމަ، އެމެރިކާގެ ސުޕްރީމް ކޯޓުން ކުރާ ކަހަލަ ހާދަ ޙުކުމެއް މި ރާއްޖޭގެ ސުޕްރީމް ކޯޓުން ކުރާނެ އެވެ.