ހަނގުރާމައާ ގުޅިގެން އެއްވެސް ހާސް ކަމެއް ނެތް، ތެލުގެ ދަތި ކަމެއް ވެސް ނެތް! އެކަމަކު ތެލުގެ އަގު އެންމެ ބޮޑު ކުރި ޤައުމު ތަކުގެ ހަތް ވަަނައިގައި ރާއްޖެ!

އެމެރިކާ އާއި އިޒްރޭލް އިން އީރާާންއާ ދެކޮޅަށް ފެށި ހަނގުރާމައިގެ ސަބަބުން، މެދު އިރުމަތީގެ މަސްރަހު ވަރަށް ބޮޑަށް ގޯސްވެ، އެކަމުގެ އަސަރު މުޅި ދުނިޔެ އަށް ވެސް ކުރަން ފަށައިފި އެވެ. އެ ހަނގުރާމައިގެ ތެރޭގައި މުޅި ދުނިޔެ ތާށިވެފައި އޮތްއިރު، ޤައުމު ތަކުގެ ވެރިން ފެންނަނީ ސީރިއަސްކަމާ އެކު މަސައްކަތް ކުރައްވާ މަންޒަރެވެ. ހާސް ކަމުގެ ތެރެއިން ވެސް، ސީރިއަސް މައްސަލަތައް ޙައްލު ކުރުމަށް ދެއްވާ އިސްކަން މިއަދު ފެނެ އެވެ.

އެކަމަކު، ރާއްޖެ ވަރަށް ތަފާތެވެ. ހަނގުރާމަ ފެށުނު ފަހުން ރާއްޖޭގެ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ބޭއްވެވި ނޫސްވެރިންގެ ބައްދަލުވުމުގައި އެމަނިކުފާނު ވިދާޅުވީ އެއްވެސް ހާސް ކަމެއް ނެތް ކަމަށެވެ. މޫނު މަތިން ރީތި ހިނިތުންވުމެއް ފެންނަން ހުރިއިރު، ހާސް ކަމުގެ އެއްވެސް ނިޝާނެއް ފެންނާކަށް ނެތެވެ. ވަރަށް ހަމަ ޖެހިލައިގެން ހުންނަވައި ރައީސް ވިދާޅުވީ، ރާއްޖެ އަށް ހާސް ކަމެއް އަދި، ދަތި ކަމެއް ވެސް ނެތް ކަމަށެވެ. 

ރާއްޖެ އިން ތެޔޮ ގެންނަނީ އެ ސަރަހައްދުން ކަމަށްވާއިރު، ހަނގުރާމައިގެ ސަބަބުން ރާއްޖެ އަށް ތެޔޮ ލިބުމުގެ ދަތި ކަމެއް ނެތް ކަމަށް ވެސް ރައީސް މުޢިއްޒު ވިދާޅުވި އެވެ. އެކަމަށް މަސައްކަތް ތަކެއް ކުރަމުން އަންނަ ކަމަށާއި، މިހާރު ވެސް ރާއްޖެ އަށް ތެޔޮ ދަތުރު ކުރަމުން އަންނަ ކަމަށް ވިދާޅުވި އެވެ. ހާސް ކަމެއް ނެތެވެ. އަމުދުން ބިރުވެރިކަމެއް، ނުވަތަ ޖެހިލުމެއް ވެސް ނެތީ އެވެ.

ރައީސް މުޢިއްޒު އެކަންޏެއް ނޫނެވެ. އިޤްތިޞާދީ ވަޒީރު މުޙައްމަދު ސަޢީދު އާއި، މާލީ ވަޒީރު މޫސާ ޒަމީރު ވެސް ދެއްވީ އެ ޔަޤީން ކަމެވެ. ރައީސް ވިދާޅުވެފައިވާ ފަދައިން، ރާއްޖެ އަށް އެއްވެސް ހާސް ކަމެއް ނެތް ކަމަށް ދެ ވަޒީރުން ވެސް ވިދާޅުވީ، ޖެހިލުމެއް ވެސް ނެތި އެވެ. ތެޔޮ ލިބޭނެ ކަމަށާއި، އެކަމުގައި ދަތި ކަމެއް އަދި ހާސް ކަމެއް ނެތް ކަމަށް ވެސް ވިދާޅުވި އެވެ. މުޅި ސަރުކާރުން ދައްކަމުން ދަނީ އެ ވާހަކަ އެވެ.

އެކަމަކު، ހަނގުރާމައިގެ ފަހުން ދުނިޔޭގައި ތެޔޮ އެންމެ އަގު ބޮޑު ކުރި ޤައުމު ތަކުގެ ހަތް ވަނައިގައި އޮތީ ރާއްޖެ އެވެ. ރެކޯޑެއްތޯ ނުވަތަ ނޫންތޯ ނިންމާނީ އަޅުގަނޑެއް ނޫނެވެ. އަޅުގަނޑު އެ އަދަދުތައް ދައްކާލާނަމެވެ. 

އަލް ޖަޒީރާ އިން ނެރެފައިވާ ލިސްޓުގައި، ހަނގުރާމައިގެ ފަހުން ތެލުގެ އަގު އެންމެ ބޮޑު ކުރި ލިސްޓުގައި ރާއްޖެ އޮތީ ހަތް ވަަނައިގަ އެވެ. ފެބްރުވަރީ މަހުގެ 23 ވަނަ ދުވަހު ރާއްޖޭގައި ޕެޓްރޯލް ލީޓަރެއްގެ އަގު ހުރީ 0.87 އެމެރިކާ ޑޮލަރުގައި ކަމަށް ފާހަގަ ކޮށްފައިވެ އެވެ. ހަނގުރާމައިގެ ފަހުން މާޗު މަހުގެ 11 ވަނަ ދުވަހާ ހަމައަށް އައިއިރު، އެ އަދަދު ހުރީ ލީޓަރެއް 1.04 އެމެރިކާ ޑޮލަރުގަ އެވެ. އެހެންކަމުން މިއީ 18.54 އިންސައްތައިގެ އިތުރުވުމެއް ކަމަށް ފާހަގަ ކޮށްފައިވެ އެވެ.

ރާއްޖޭގެ ކުރިން އެ ލިސްޓުގައި އޮތީ ކެމްބޯޑިއާ، ވިއެޓްނާމް، ނައިޖީރިއާ، ލާއޯސް، ކެެނެޑާ އަދި ޕާކިސްތާން އެވެ. ރާއްޖޭގެ ފަހަތުން އޮތީ އޮސްޓްރެލިއާ، އެމެރިކާ އަދި ސިންގަޕޫރު ފަދަ ޤައުމު ތަކެވެ. މިއީ ސަރުކާރުން އަދި ރައީސް މުޢިއްޒު އެ ވިދާޅުވާ ތެލުގެ ދަތި ކަމެއް އަދި ހާސް ކަމެއް ނެތުމުގެ ނަތީޖާ ކަމަށް ވަނީ ނަމަ، ދެން ބުނާނެ އެއްޗެއް އަދި ދައްކާނެ ވާހަކައެއް ވެސް ނެތެވެ.

ހާސް ކަމެއް ނެތުމުގަ ނަތީޖާ އަކީ، އެއް ހަފުތާގެ ތެރޭގައި ދެ ފަހަރު ރާއްޖޭގައި ތެލުގެ އަގު ބޮޑު ކުރުމެވެ. ތެޔޮ ވިއްކާ ތަންތަނުން ލިމިޓު ކޮށްގެން ވިއްކަން ފެށީ އެވެ. ހާސް ކަމެއް ނެތުމުގެ ނަތީޖާ އަކީ، ބައެއް ރަށް ރަށުން ތެޔޮ ހުސްވުމެވެ. ތެޔޮ ހުސްވުމުގެ ސަބަބުން ކަރަންޓު ކެނޑެން ފަށައިފި އެވެ. ތެޔޮ ލިބުމުގެ ދަތިކަމާ ހުރެ، އާންމު ދިރި އުޅުމަށް އަސަރު ކުރަން ފަށައިފި އެވެ.

ހާސް ކަމެއް ނެތުމުގެ ނަތީޖާ އަކީ، މީގެ ކުރިން 400 ރުފިޔާ ނުވަތަ 500 ރުފިޔާގައި ހުރި ލޯންޗު ޓިކެޓުތައް، 1000 ފަހަނަ އަޅައި ދިޔައީ އެވެ. ދަތުރު ފަތުރުގެ އަގުތައް ބޮޑުވާން ފަށާފައި ވަނީ، ސަރުކާރުން އަދި ރައީސް މުޢިއްޒު ވެސް އެ ވިދާޅުވާ ކަހަލަ ހާސް ކަމެއް ނެތުމުންތާ އެވެ.