އީރާންގެ ފޮރިން މިނިސްޓަރު އަރާގްޗީ އާއި ޤާނޫނު ހަދާ މަޖިލީހުގެ ރައީސް ޣަލިބާފް އަވަހާރަ ކޮށްލަން ހަމަލާ ދޭން އުޅުނު، އެކަން ހުއްޓުވީ ޕާކިސްތާން އިން އެދިގެން

އީރާންގެ ފޮރިން މިނިސްޓަރު އައްބާސް އަރާގްޗީ އާއި، ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް އަވަހާރަ ކޮށްލަން ހަމަަލާ އަމާޒު ކުރަން އިޒްރޭލް އިން ރޭވި ކަމަށާއި، އެކަން ހުއްޓުވާފައި ވަނީ ޕާކިސްތާން އިން އެމެރިކާގައި އެދިގެން ކަމަށް ރޮއިޓާސް އަށް މައުލޫމާތު ދީފި އެވެ.

މި މައްސަލައިގައި ދެކެވިފައިވާ މަޝްވަރާ ތަކުގެ މައުލޫމާތު ލިބިފައިވާ ޕާކިސްތާންގެ ވެރިޔަކު ބުރާސްފަތި ދުވަހު ރޮއިޓާސް އަށް މައުލޫމާތު ދެމުން ވިދާޅުވީ، އިޒްރޭލް އިން އޮތީ އަރާގްޗީ އާއި ޣަލިބާފް ތިއްބެވި ތަނެއް ހޯދައިގެން، އެ ބޭފުޅުންނަށް ހަމަލާ ދޭން ބޭނުންވެފައި ކަމަށެވެ. 

އެހެން ނަމަވެސް، އެ ދެ ބޭފުޅުން އަވަހާރަ ކޮށްލައިފި ނަމަ މަޝްވަރާ ކުރަަން ބޭނުންވާނެ އިތުރު މީހަކު ނުހުންނާނެ ކަމަށް، ޕާކިސްތާން އިން ވަނީ އެމެރިކާ އަށް އަންގާފައި ކަމަށް ވަނީ ރިޕޯޓު ކޮށްފަ އެވެ. އެހެންވެ، އެމެރިކާ އިން އިޒްރޭލްގެ އެ ހަމަލާތައް ހުއްޓުވާފައިވާ ކަމަށް ވެސް ރިޕޯޓުގައިވެ އެވެ. 

މި މައްސަލައާ ގުޅިގެން ޕާކިސްތާންގެ ފޮރިން މިނިސްޓްރީ އާއި، އަސަކަރިއްޔާ އިން ވަކި އެއްޗެއް ބުނެފައި ނުވެ އެވެ. 

ވޯލް ސްޓްރީޓް ޖާނަލް އިން ރިޕޯޓު ކުރި ގޮތުގައި، އީރާނުގެ އިސްވެރިންގެ ތެރެއިން، އިޒްރޭލް އިން އަވަހާރަ ކޮށްލަން ތައްޔާރު ކޮށްފައިވާ ލިސްޓުން ވަގުތީ ގޮތުން އީރާންގެ އެ ދެ އިސްވެރިން އުނި ކޮށްފައި ވަނީ، ސުލްޙަވެރި މަޝްވަރާ ތަކެއް ބޭއްވުމުގެ ފުރުސަތު ހޯދުމަށް ކަަމަށެވެ. އެ ނޫހުން ބުނި ގޮތުގައި، އެމެރިކާގެ އިސްވެރިންގެ ބަހަށް ރިއާޔަތްކޮށް އެ ދެ ބޭފުޅުންގެ ނަން ހަތަރު ދުވަސް ނުވަތަ ފަސް ދުވަހަށް ލިސްޓުން ނަގާފައިވާއިރު، އެކަމުގައި ޕާކިސްތާންގެ ދައުރެއް އޮތް ކަމަށް ނޫހުން ބުނެފައިވެ އެވެ. 

އެމެރިކާ އާއި އިޒްރޭލް އިން އީރާން އަށް އަމާޒުކޮށް ހަމަލާ ދިނުމުގެ ސަބަބުން، އީރާން އިން ވެސް އަންނަނީ ވަރުގަދަ ހަމަލާ ތަކެއް ދެމުންނެވެ. އެ ހަމަލާ ތަކުގައި އެމެރިކާ އާއި އިޒްރޭލް އަށް ވެސް ގިނަ ގެއްލުން ތަކެއް ދަނީ ލިބެމުންނެވެ. ޚާއްސަކޮށް އެމެރިކާ އަށް މާލީ ގޮތުން ބޮޑު ދަތި ތަކެއް ކުރިމަތި ވަމުން އަންނަ ކަމަށް ފާހަގަ ކޮށްފައިވެ އެވެ.