އީރާނުގެ ތެޔޮ އެކްސްޕޯޓްކުރާ މައި މަރުކަޒު ކަމަށްވާ ޚާރްޖް އައިލެންޑް ހިފުމަށް މަސައްކަތް ކުރަނީ

ތެހެރާނާއެކު ކުރިއަށްދާ މަޝްވަރާތައް ނާކާމިޔާބުވެއްޖެ ނަމަ، އީރާނުގެ ތެޔޮ އެކްސްޕޯޓްކުރާ މައި މަރުކަޒު ކަމަށްވާ ޚާރްޖް އައިލެންޑް  އެމެރިކާގެ ބާރުގެ ދަށަށް ގެނައުމަށް ރައީސް ޑޮނަލްޑް ޓްރަމްޕް މަސައްކަތް ކުރައްވާފާނެ ކަމަށް އިޒްރޭލުގެ މީޑިއާތަކުން ބުދަ ދުވަހު ރިޕޯޓްކޮށްފިއެވެ.

އިޒްރޭލުގެ ނަން ހާމަނުކުރާ މަސްދަރަކާ ހަވާލާދީ "ޔެދިއޮތް އަހްރޮނޮތް" ނޫހުން ރިޕޯޓްކޮށްފައިވާ ގޮތުގައި، ހަނގުރާމަ ހުއްޓާލުމަށް ޓްރަމްޕް ވަރަށް ބޮޑަށް ބޭނުންފުޅުވެއެވެ. ނަމަވެސް އެކަން ނާކާމިޔާބުވެއްޖެ ނަމަ، އީރާނުގެ ޚާރްޖް އައިލެންޑް އެމެރިކާގެ ބާރުގެ ދަށަށް ގެންނާނެ ކަމަށް އެ ނޫހުން ބުނެފައިވެއެވެ.

މީގެ އިތުރުން، މިފަދަ ހާލަތަކަށް ތައްޔާރުވުމުގެ މަސައްކަތްތައް މިހާރުވެސް ކުރިއަށްދާ ކަމަށް އެ މަސްދަރުން މައުލޫމާތު ދީފައިވެއެވެ.

އެ ނޫހުން ރިޕޯޓްކޮށްފައިވާ ގޮތުގައި، އިޒްރޭލުން މިހާރު މަސައްކަތް ކުރަމުންދަނީ އީރާނުގެ އަސްކަރީ އުފެއްދުންތެރިކަމުގެ ގާބިލުކަން ކުޑަކުރުމަށްޓަކައި، އިޒްރޭލުގެ އަސްކަރީ މަގްސަދުތައް ވީހާވެސް ބޮޑަށް ހާސިލުކުރުމަށެވެ.

ޕާޝިއަން ގަލްފްގައި އީރާނުގެ އައްސޭރިފަށުން ގާތްގަނޑަކަށް 30 ކިލޯމީޓަރު (19 މޭލު) ބޭރުގައި އޮންނަ ޚާރްޖް އައިލެންޑަކީ އީރާނުން ބޭރު ގައުމުތަކަށް ތެޔޮ އެކްސްޕޯޓް ކުރުމުގައި ބޭނުންކުރާ އެންމެ މައި މަރުކަޒެވެ.

ފެބްރުއަރީ މަހުގެ 28 ވަނަ ދުވަހުން ފެށިގެން އެމެރިކާ އާއި އިޒްރޭލުން ދަނީ އީރާނަށް ވައިގެ ހަމަލާތައް ދެމުންނެވެ. މި ހަމަލާތަކުގައި މިހާތަނަށް 1,340 އަށްވުރެ ގިނަ މީހުން މަރުވެފައިވާއިރު، އޭގެ ތެރޭގައި އީރާނުގެ އޭރުގެ އެންމެ މަތީ ވެރިޔާ ޚާމަނާއީ ވެސް ހިމެނިވަޑައިގަންނަވައެވެ.

މި ހަމަލާތަކުގެ ބަދަލުހިފުމުގެ ގޮތުން އީރާނުން ވަނީ އިޒްރޭލުގެ އިތުރުން  އެމެރިކާގެ އަސްކަރީ މަރުކަޒުތައް ހުރި ގަލްފްގެ ގައުމުތަކަށް ޑްރޯން އަދި މިސައިލް ހަމަލާތަކެއް ދީފައެވެ. މި ހަމަލާތަކުގެ ސަބަބުން އެތައް ބަޔަކު މަރުވެ، އުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބިފައިވާއިރު، ދުނިޔޭގެ ބާޒާރުތަކަށާއި ވައިގެ ދަތުރުފަތުރަށްވެސް ވަނީ ބުރޫއަރާފައެވެ.