ޓްރަމްޕްގެ ޑިޕްލޮމެސީ އަށް އިތުބާރު ނުކުރެވޭ ކަމަށް އީރާން އިން ބުނެފި

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ޑިޕްލޮމެސީ ނުވަތަ ޚާރިޖީ ގުޅުން ތަކުގެ ވާހަކަ ދެއްކެވި ނަމަވެސް، އެއީ އިތުބާރު ކުރެވޭ ވާހަކަ ތަކެއް ނޫން ކަމަށް އީރާންގެ ފޮރިން މިނިސްޓްރީގެ ތަރުޖަމާނު އިސްމާއިލް ބަޣާއީ ވިދާޅުވެއްޖެ އެވެ. 

އިންޑިއާ ޓުޑޭ އަށް ދެއްވި ބަސްދީގަތުމެއްގައި ބަޣާއީ ވިދާޅުވީ، އެމެރިކާ އާއެކު މެދުވެރިއެއްގެ ދައުރު އަދާ ކުރުމަށް ގިނަ ޤައުމު ތަކަކުން އީރާން އަށް ހުށަހަޅާފައިވާ ކަމަށެވެ. 

ފާއިތުވި ދުވަސް ތަކުގައި އެކި ޤައުމު ތަކުން މެސެޖުތައް ލިބެމުންދާކަން ފާހަގަ ކުރައްވައި ބަޣާއީ ވިދާޅުވީ، އެ މެސެޖު ތަކަށް އީރާން އިން ޖަވާބު ދީފައި ވާނެ ކަމަށެވެ. އީރާންގެ މެސެޖަކީ ވަރަށް ސާފު މެސެޖެއް ކަމަށާއި، އެ ޤައުމުން އަބަދު ވެސް ދެމި އޮންނާނީ އަމިއްލަ ނަފްސުގެ ދިފާއުގައި ކުރަން ޖެހޭ މަސައްކަތްތައް ކުރުމުގައި ކަމަށް އޭނާ ފާހަގަ ކުރެއްވި އެވެ. 

މަޝްވަރާގެ މަގު އިޚްތިޔާރު ކުރަން އެމެރިކާާ އިން ބޭނުންވާ ކަމަށް ބުނާ ބުނުމަށް ރައްދު ދެއްވަމުން ބަޣާއީ ވިދާޅުވީ، ބިން މަތީގައި ހިނގަމުންދާ ކަންކަމަށް ބަލާއިރު، އެ ވާހަކަ ތަކަކީ ހަގީގަތެއް އެކުލެވޭ ވާހަކަ ތަކެއް ނޫން ކަމަށެވެ. އީރާން އަށް އަމާޒުކޮށް އެމެރިކާ އާއި އިޒްރޭލް އިން މެދު ނުކެނޑި މިސައިލް އާއި، ބޮމުގެ ހަމަލާތައް ދެމުން އަންނަ ކަަމަށް އޭނާ ފާހަގަ ކުރެއްވި އެވެ. މި ހަނގުރާމަ ފަށައި، އީރާން އަށް ހަމަލާ ދެމުން ދަނީ އެމެރިކާ އާއި އިޒްރޭލް އިން ކަމަށްވާއިރު، އެ ފަރާތް ތަކުން ދައްކާ ޑިޕްލޮމެސީގެ ވާހަކަތައް ޤަބޫލު ކުރެވޭނެ އެއްވެސް ޖާގައެއް ނެތް ކަމަށް އޭނާ ވިދާޅުވި އެވެ. 

މި މައްސަލައިގައި ޕާކިސްތާންގެ ދައުރާ ގުޅޭ ގޮތުން ސުވާލު ކުރުމުން ބަޣާއީ ވިދާޅުވީ، ޕާކިސްތާން އިން މަސައްކަތް ކުރަނީ ހެޔޮ ނިޔަތެއްގައި ކަމަށް އީރާން އިން ޤަބޫލު ކުރާ ކަމަށެވެ. އީރާންގެ ފޮރިން މިނިސްޓަރު އައްބާސް އަރާގްޗީ ގެންދަވަނީ ޕާކިސްތާންގެ ފޮރިން މިނިސްޓަރުގެ އިތުރުން، އެހެން ޤައުމު ތަކުގެ ޑިޕްލޮމެޓުންނާ ވެސް މެދު ނުކެނޑި ގުޅުއްވައި އަދި މަޝްވަރާ ކުރައްވަމުންނެވެ. 

މިފަދަ މަޝްވަރާތައް އީރާާންއާ އަވަށްޓެރި ޤައުމު ތަކުގެ އިތުރުން، އެހެން ޤައުމު ތަކާ އެކު ވެސް ކުރިއަށްދާކަން ބަޣާއީ ހާމަ ކުރެއްވި އެވެ. ސަރަހައްދީ ޤައުމު ތަކުން މި ހަމަނުޖެހުމުގެ ސަބަބުން ނުކުމެދާނެ ނަތީޖާއަކާ މެދު ކަންބޮޑުވާ ކަމަށާއި، މަސްރަހު ފިނި ކުރުމަށް ހުރިހާ ފަރާތް ތަކުން ވެސް އެހީތެރިކަން ފޯރުކޮށްދިނުމަށް މަސައްކަތް ކުރަމުންދާކަން އީރާން އިން ބަލައި ގަންނަ ކަމަށް ބަޣާއީ ވިދާޅުވި އެވެ.