ހަނގުރާމަ ނިމުމަކަށް އަންނާނީ ޓްރަމްޕް ބޭނުންވާ ވަގުތަކު ނޫން ކަމަށާއި، އެކަން ނިމޭނީ އީރާނުން އެގޮތަށް ނިންމުމުން ކަމަށް އީރާނުން ބުނެފި

އެމެރިކާއިން ހުށަހަޅާފައިވާ ހުށަހެޅުންތަކަކީ ހަނގުރާމައިގެ މައިދާނުގެ ހަގީގަތްތަކާ ނުބައްދަލު ހުށަހެޅުންތަކެއް ކަމަށް ބުނެ އީރާނުން އެ ހުށަހެޅުންތަކަށް އިންކާރުކޮށްފިއެވެ. އީރާނުގެ އިސް އޮފިޝަލަކު ބުދަ ދުވަހު ޕްރެސް ޓީވީއަށް މައުލޫމާތު ދެއްވަމުން ވިދާޅުވީ، މިހާރު ކުރިއަށްދާ މަޖުބޫރުވެފައިވާ ހަނގުރާމަ ހުއްޓާލާނީ އީރާނުން ބޭނުންވާ ޝަރުތުތައް ފުރިހަމަވުމުން އެކަނި ކަމަށެވެ.

ޕްރެސް ޓީވީއާ ވާހަކަދައްކަވަމުން، އެމެރިކާގެ ހުށަހެޅުމުގެ ތަފުސީލު އެނގިވަޑައިގަންނަވާ އެ އޮފިޝަލް ވިދާޅުވީ، ހަނގުރާމަ ނިންމާނެ ވަގުތެއް ކަނޑައެޅުމުގެ ފުރުސަތު އެމެރިކާގެ ރައީސް ޑޮނަލްޑް ޓްރަމްޕަށް އީރާނުން ނުދޭނެ ކަމަށެވެ.

"އީރާނުން ހަނގުރާމަ ނިންމާނީ އެގައުމުން އެގޮތަށް ނިންމުމުން އަދި އީރާނުގެ އަމިއްލަ ޝަރުތުތައް ފުރިހަމަވުމުން،" އީރާނުގެ ދިފާއީ މަސައްކަތްތައް ކުރިއަށް ގެންދިއުމަށާއި، ޝަރުތުތައް ފުރިހަމަވަންދެން ދުޝްމަނުންނަށް "ބޮޑެތި ގެއްލުންތަކެއް" ދިނުމުގައި ތެހެރާނުން ސާބިތުވެ އޮންނާނެކަން ފާހަގަކުރައްވަމުން އެ އޮފިޝަލް ވިދާޅުވިއެވެ.

އެ އޮފިޝަލް ވިދާޅުވި ގޮތުގައި، ވޮޝިންޓަނުން ދަނީ އެކި ޑިޕްލޮމެޓިކް ވަސީލަތްތައް މެދުވެރިކޮށް މަޝްވަރާ ކުރުމަށް ބާރުއަޅަމުންނެވެ. ނަމަވެސް، އެމެރިކާއިން ހުށަހަޅާ ކަންކަމަކީ ހަނގުރާމައިގެ މައިދާނުގައި އެމެރިކާއަށް ކުރިމަތިވެފައިވާ ނާކާމިޔާބީގެ ހަގީގަތާ ދުރު، އަދި އީރާނުން ގަބޫލުކުރާ މިންވަރަށްވުރެ "އިތުރު" ކަންތައްތަކެއް ހިމެނޭ ހުށަހެޅުންތަކެއް ކަމަށް ތެހެރާނުން ދެކެއެވެ.

މީގެ އިތުރުން، 2025 ވަނަ އަހަރު ބޭއްވުނު ދެ ބުރުގެ މަޝްވަރާތަކަށް އިޝާރާތް ކުރައްވައި، އެއީ އޮޅުވާލުމެއްގެ ގޮތުގައި އެ އޮފިޝަލް ސިފަކުރެއްވިއެވެ.

އެ ދެ ފަހަރުވެސް އެމެރިކާގެ އެއްވެސް އިޚުލާސްތެރި ނިޔަތެއް ނެތްކަން ފާހަގަކުރައްވައި، އެ އޮފިޝަލް ވިދާޅުވީ މަޝްވަރާތަކަށްފަހު އެމެރިކާއިން އީރާނަށް އަސްކަރީ ހަމަލާތައް ދީފައިވާ ކަމަށެވެ.

އެހެންކަމުން، ސަރަހައްދީ ރަހުމަތްތެރި ގައުމެއް މެދުވެރިކޮށް އެމެރިކާއިން އެންމެ ފަހުން ހުށަހެޅި ހުށަހެޅުމަކީ މަސްރަހު އިތުރަށް ގޯސްކުރުމަށް ރޭވި ރޭވުމެއްގެ ގޮތުގައި ތެހެރާނުން ވަނީ ކަނޑައަޅައި، އެކަމަށް ނޫނެކޭ ބުނެފައެވެ.

ހަނގުރާމަ ހުއްޓާލުމަށް އީރާނުން އެއްބަސްވާނެ ފަސް ޝަރުތެއް އެ އޮފިޝަލް ވަނީ ހާމަކުރައްވާފައެވެ. އެ ޝަރުތުތަކަކީ:

1. ދުޝްމަނުން ދެމުންދާ "ހަމަލާތަކާއި މީހުން މެރުން" މުޅިން ހުއްޓާލުން.

2. އިސްލާމީ ޖުމްހޫރިއްޔާއާ ދެކޮޅަށް އަލުން ހަނގުރާމައެއް ފެށިޔަނުދޭނެކަން ކަށަވަރުކުރުމަށް ވަރުގަދަ ނިޒާމެއް ގާއިމުކުރުން.

3. ހަނގުރާމައިގެ ގެއްލުމުގެ ބަދަލު ދޭނެކަމުގެ ޔަގީންކަން ދިނުމާއި، އެކަން ކުރާނެ ގޮތް ސާފުކޮށް ކަނޑައެޅުން.

4. ހުރިހާ ފްރަންޓްލައިންތަކެއްގައާއި، ސަރަހައްދުގައި ހިމެނޭ ހުރިހާ "ރެސިސްޓަންސް ގްރޫޕްތަކަށް" އަމާޒުކޮށް ކުރާ ހަނގުރާމަ ހުއްޓާލުން.

5. ހޮރްމޫޒް ކަނޑުއޮޅީގެ މައްޗަށް އީރާނުގެ ފުރިހަމަ ބާރު އޮތުމަކީ އެގައުމުގެ ގުދުރަތީ އަދި ގާނޫނީ ހައްގެއްކަން ބަލައިގަތުން. 

ފެބްރުއަރީ 28 ވަނަ ދުވަހު އެމެރިކާއާއި އިޒްރޭލުން އީރާނަށް ދިން އާ ހަމަލާތަކުގެ ދުވަސްކޮޅެއް ކުރިން ޖެނީވާގައި ބޭއްވުނު ދެވަނަ ބުރުގެ މަޝްވަރާތަކުގައި ތެހެރާނުން ހުށަހެޅި ކަންކަމުގެ އިތުރުން މި ޝަރުތުތައް ހިމެނޭނެ ކަމަށް އޮފިޝަލް ވިދާޅުވިއެވެ.

އީރާނުން ވަނީ ހެޔޮނިޔަތުގައި މެދުވެރިއެއްގެ ދައުރު އަދާކުރާ ހުރިހާ ފަރާތްތަކަށް، ހަނގުރާމަ ހުއްޓާލެވޭނީ އީރާނުގެ ހުރިހާ ޝަރުތުތަކެއް ގަބޫލުކުރުމުން އެކަނި ކަމަށް އަންގާފައެވެ.

"އޭގެ ކުރިން އެއްވެސް މަޝްވަރާއެއް ނޯންނާނެ،" އޮފިޝަލް ވިދާޅުވިއެވެ. އަދި އީރާނުން ކަނޑައަޅާފައިވާ ޝަރުތުތައް ފުރިހަމަވަންދެން ދިފާއީ އޮޕަރޭޝަންތައް ކުރިއަށްދާނެ ކަމަށް އޭނާ ތަކުރާރުކުރެއްވިއެވެ.

އޭނާ އިތުރަށް ވިދާޅުވީ، "ހަނގުރާމަ ނިމުމަކަށް އަންނާނީ ޓްރަމްޕް ބޭނުންވާ ވަގުތަކު ނޫން ކަމަށާއި، އެކަން ނިމޭނީ އީރާނުން އެގޮތަށް ނިންމުމުން" ކަމަށެވެ.

މި ޣައިރު ގާނޫނީ ހަނގުރާމަ ފެށުނީ ފެބްރުއަރީ 28 ވަނަ ދުވަހު، ނިއުކްލިއާ މައުލޫމާތާ ގުޅޭ ނުސީދާ މަޝްވަރާތައް ކުރިއަށްދަނިކޮށް، އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި އަސްކަރިއްޔާގެ އިސް ކޮމާންޑަރުންނާއި ސަރުކާރުގެ އިސް އޮފިޝަލުން އަވަހާރަކޮށްލުމާ ގުޅިގެންނެވެ.

އޭގެ ރައްދުގައި އީރާނުގެ ހަތިޔާރު އެޅި ފައުޖުތަކުން ވަނީ މިހާތަނަށް ސަރަހައްދުގައިވާ އިޒްރޭލާއި އެމެރިކާގެ އަސްކަރީ މަރުކަޒުތަކަށް އަމާޒުކޮށް 80 އަށްވުރެ ގިނަ ހަމަލާތައް ދީފައެވެ.

ފަހަކަށް އައިސް އެމެރިކާއިން ދަނީ ސަރަހައްދީ ބައެއް ގައުމުތައް މެދުވެރިކޮށް، އީރާނުން ދެމުންދާ ރައްދު ހަމަލާތައް ހުއްޓުވުމަށާއި، ހޮރްމޫޒް ކަނޑުއޮޅިން އެމެރިކާގެ އުޅަނދުފަހަރަށް ދަތުރުކުރެވޭނެ މަގު ފަހިކުރުމަށް މަސައްކަތް ކުރަމުންނެވެ. އީރާނުގެ މި ހަމަލާތަކުގެ ސަބަބުން ސަރަހައްދުގައިވާ އެމެރިކާއާއި އިޒްރޭލުގެ އަސްކަރީ އިންފްރާސްޓްރަކްޗަރަށް ވަނީ ބޮޑެތި ގެއްލުންތަކެއް ލިބިފައެވެ.