އީރާނުން އެމެރިކާގެ އެއަރކްރާފްޓް ކެރިއަރ އަބްރަހަމް ލިންކަން އަށް ކްރޫޒް މިސައިލް ހަމަލާދީފި
އީރާނުގެ "ގާދިރު" މަރުކާގެ ކްރޫޒް މިސައިލްތަކުން އެމެރިކާގެ "ޔޫއެސްއެސް އެބްރަހަމް ލިންކަން" މަނަވަރަށް އަމާޒުކޮށް ހަމަލާދިނުމާ ގުޅިގެން، އެ މަނަވަރުގެ މިސްރާބު ބަދަލުކުރަން މަޖުބޫރުވެފައިވާ ކަމަށް އީރާނުގެ އަސްކަރިއްޔާއިން ބުނެފި. އެ ގައުމުގެ ކަނޑުގެ ސިފައިންގެ ވެރިޔާ އެޑްމިރަލް ޝަހްރާމް އިރާނީ ވިދާޅުވީ އެމެރިކާގެ މަނަވަރުތަކުގެ ހަރަކާތްތައް ވަރަށް ގާތުން ބަލަމުންދާ ކަމަށާއި، މިސައިލް ރޭންޖަށް ވަންނަ ކޮންމެ ހިނދެއްގައި ވަރުގަދަ ހަމަލާތަކެއް އަމާޒުވާނެ ކަމަށް.
އެމެރިކާގެ ނޭވީން އާންމުކޮށްފައިވާ މި ފޮޓޯއިން ފެންނަނީ، 2007 ވަނަ އަހަރުގެ އޮގަސްޓް މަހުގެ 13 ވަނަ ދުވަހު ޕެސިފިކް ކަނޑުގައި ކުރިއަށްގެންދިޔަ އަސްކަރީ ތަމްރީނެއްގެ ތެރެއިން، ނިމިޓްޒް ކްލާސްގެ އެއަރކްރާފްޓް ކެރިއަރެއް ކަމަށްވާ "ޔޫއެސްއެސް އަބްރަހަމް ލިންކަން" އިން "އާރުއައިއެމް-7ޕީ ނޭޓޯ ސީ ސްޕެރޯ" މިސައިލެއް ފޮނުވާލާ މަންޒަރު. | ގެޓީ އިމޭޖަސް
އެމެރިކާގެ މަނަވަރު "ޔޫއެސްއެސް އަބްރަހަމް ލިންކަން" އެއަރކްރާފްޓް ކެރިއަރަށް އަމާޒުކޮށް ކްރޫޒް މިސައިލް ފޮނުވާލާފައިވާ ކަމަށް އީރާނުގެ އަސްކަރިއްޔާއިން އެ ގައުމުގެ ދައުލަތުގެ މީޑިއާ މެދުވެރިކޮށް ނެރުނު ބަޔާނެއްގައި ބުނެފި އެވެ. އަދި އެމެރިކާގެ އެ މަނަވަރުތައް އީރާނުގެ މިސައިލްތަކުގެ ރޭންޖަށް ވަނުމުން އިތުރު ހަމަލާތައް ދޭނެ ކަމުގެ އިންޒާރުވެސް އެ ގައުމުން ވަނީ ދީފައެވެ.
އީރާނުގެ އަސްކަރިއްޔާގެ ބަޔާނުގައި ބުނެފައިވަނީ، އެ ގައުމުގެ ކަނޑުގެ ސިފައިން ބޭނުންކުރާ "ގާދިރު" މަރުކާގެ ކްރޫޒް މިސައިލްތަކުން (އެއްގަމުން ކަނޑުގެ އުޅަނދުފަހަރަށް ހަމަލާދޭ މިސައިލް) އެމެރިކާގެ "ޔޫއެސްއެސް އަބްރަހަމް ލިންކަން" އަށް އަމާޒުކޮށް ހަމަލާދިނުމާ ގުޅިގެން، އެ މަނަވަރު އޮތް މިސްރާބު ބަދަލުކުރަން މަޖުބޫރުވެފައިވާ ކަމަށެވެ.
އީރާނުގެ ކަނޑުގެ ސިފައިންގެ ވެރިޔާ އެޑްމިރަލް ޝަހްރާމް އިރާނީއާ ހަވާލާދީ އެ ބަޔާނުގައި އިތުރަށް ބުނެފައިވަނީ، އެމެރިކާގެ މަނަވަރުތަކުގެ ހަރަކާތްތައް އީރާނުން ވަރަށް ގާތުން ބަލަމުންދާ ކަމަށެވެ. އަދި ދުޝްމަނުންގެ އެ މަނަވަރުތައް އީރާނުގެ މިސައިލް ނިޒާމުގެ ރޭންޖަށް ވަންނަ ކޮންމެ ހިނދެއްގައި، އީރާނުގެ ކަނޑުގެ ސިފައިންގެ ވަރުގަދަ ހަމަލާތަކެއް އެ މަނަވަރުތަކަށް އަމާޒުވާނެ ކަމަށްވެސް އޭނާ ވިދާޅުވިއެވެ.
މަސްދަރު: އޭއެފްޕީ
