އީރާނުގެ ރަށެއް ހިފުމަށް ދުޝްމަނުންނަށް އެހީތެރިވެއްޖެ ކޮންމެ ގައުމަކަށް އެއްވެސް ބެލުމެއް، މެދުކެނޑުމެއް ނެތި ހަމަލާ ދޭނަން: އީރާން

އީރާނުގެ އެއްވެސް ރަށެއް ހިފުމަށްޓަކައި ދުޝްމަނުންނާ އެކު ސަރަހައްދީ އެއްވެސް ގައުމަކުން އެއްބާރުލުން ދީފި ނަމަ، އެ ގައުމެއްގެ މުހިންމު އުމްރާނީ ވަސީލަތްތަކަކީ ތެހެރާންގެ ވަރުގަދަ ބަދަލުހިފުމުގެ އަމާޒުފަތްތަކަކަށް ވާނެ ކަމުގެ އިންޒާރު އީރާނުގެ މަޖިލީހުގެ ރައީސް ދެއްވައިފިއެވެ.

"ލިބިފައިވާ ބައެއް މައުލޫމާތުތަކަށް ބަލާއިރު، ސަރަހައްދީ ގައުމެއްގެ އެހީތެރިކަމާއެކު އީރާނުގެ ދުޝްމަނުން ދަނީ އީރާނުގެ ރަށެއް ހިފުމަށް އޮޕަރޭޝަނެއް ތައްޔާރުކުރަމުން،" އެކްސްގައި ބުދަ ދުވަހު އަރަބި ބަހުން ކުރެއްވި ޕޯސްޓެއްގައި މުހައްމަދު ބާގިރު ގާލީބާފް ލިޔުއްވާފައިވެއެވެ.

"ދުޝްމަނުންގެ ހުރިހާ ހަރަކާތްތަކެއް އަޅުގަނޑުމެންގެ ހަތިޔާރު އެޅި ސިފައިން ދަނީ ވަރަށް ގާތުން ބަލަމުން. އެމީހުން އެއްވެސް ފިޔަވަޅެއް އަޅައިފި ނަމަ، އެ ސަރަހައްދީ ގައުމެއްގެ ހުރިހާ މުހިންމު އުމްރާނީ ވަސީލަތްތަކަކަށް އެއްވެސް އުސޫލެއް ނެތި، މެދުކެނޑުމެއްނެތި ހަމަލާދޭނެ،" ގާލީބާފް ވިދާޅުވިއެވެ.

ނިމިދިޔަ މަހުގެ ފަހުކޮޅުން ފެށިގެން އެމެރިކާއާއި އިޒްރޭލުން އީރާނާ ދެކޮޅަށް ގާނޫނާ ޚިލާފަށް އުދުވާނީ ހަމަލާތަކެއް ދޭން ފެށި ފަހުން، ސަރަހައްދީ ބައެއް ގައުމުތަކުން، ޚާއްސަކޮށް ޔޫއޭއީ އާއި ބަހްރައިނުން ވަނީ އެ ގައުމުތަކުގެ ބިން ބޭނުންކޮށްގެން އީރާނަށް ހަމަލާދިނުމުގެ ފުރުސަތު ދީފައި ކަމަށް އީރާނުން ވަނީ ބުނެފައެވެ.

މީގެ ރައްދުގައި އީރާނުގެ ހަތިޔާރު އެޅި ސިފައިން ވަނީ "އޮޕަރޭޝަން ޓްރޫ ޕްރޮމިސް 4" ގެ ނަމުގައި ދުޝްމަނުންގެ އަމާޒުފަތްތަކަށް 80 އަށްވުރެ ގިނަ ފަހަރު މިސައިލާއި ޑްރޯން ބޭނުންކޮށްގެން ބަދަލުހިފުމުގެ ހަމަލާތައް ދީފައެވެ.

މި އޮޕަރޭޝަންގައި އެ ސަރަހައްދުގައި ހުރި އެމެރިކާގެ މުހިންމު މަރުކަޒުތަކަށާއި މަސްލަހަތުތަކަށް ބޮޑެތި ގެއްލުންތަކެއް ދީފައިވެއެވެ. މީގެ ތެރޭގައި ޔޫއޭއީ، ބަހްރައިން، ސައޫދީ އަރަބިއްޔާ، ކުވެއިތު، ގަތަރު އަދި އުރުދުންގައި ހުރި ތަންތަން ހިމެނެއެވެ. މީގެ އިތުރުން އިޒްރޭލުން އިސްތިއުމާރުކޮށްފައިވާ ބިންތަކުގައި ހުރި އެފަދަ އަމާޒުފަތްތަކަށް ވެސް މި ހަމަލާތަކުގެ ސަބަބުން ބޮޑެތި ގެއްލުންތަކެއް ވަނީ ލިބިފައެވެ.

ގާލީބާފް މިފަދަ ޕޯސްޓެއް ކުރައްވާފައި މިވަނީ، އީރާނުގެ ދެކުނުގައި އޮންނަ މުހިންމު ޚާރްގް ރަށް ހިފުމުގެ ރޭވުންތަކާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ފިތުނަވެރި ވާހަކަތަކާ ގުޅިގެންނެވެ.

އެމެރިކާގެ މީޑިއާ ރިޕޯޓްތައް ބުނާގޮތުން، މަސްރަހު ގޯސްވަމުންދާ ދަނޑިވަޅެއްގައި އެމެރިކާގެ އަސްކަރިއްޔާގެ 82 ވަނަ އެއާބޯން ޑިވިޜަންގެ ގާތްގަނޑަކަށް 2,000 ސިފައިން ހުޅަނގު އޭޝިއާއަށް ފޮނުވުމަށް އެ ގައުމުގެ ޑިޕާޓްމަންޓް އޮފް ވޯ އިން ވަނީ އަމުރުކޮށްފައެވެ.

ބުދަ ދުވަހުގެ ކުރީކޮޅު އީރާނުގެ މަޖިލީހުގެ ރައީސް ވަނީ މި މައްސަލައާ ގުޅޭގޮތުން ވާހަކަދައްކަވަމުން އެމެރިކާއަށް ވަރުގަދަ އިންޒާރެއް ދެއްވާފައެވެ. އަދި އެމެރިކާ ސިފައިން އެ ސަރަހައްދަށް ފޮނުވަމުންދާ ދިއުން އީރާނުން ވަރަށް ގާތުން ބަލަމުންދާ ކަމަށް ވެސް އޭނާ ވިދާޅުވިއެވެ.

"ޖެނެރަލުން ހަލާކުކޮށްލި ކަންކަމެއް ސިފައިންނަކަށް ރަނގަޅެއް ނުކުރެވޭނެ. އޭގެ ބަދަލުގައި އެމީހުން ވާނީ [އިސްރާއީލުގެ ބޮޑުވަޒީރު ބެންޖަމިން] ނަތަންޔާހޫގެ ކުށްހީތަކުގެ ޝިކާރައަކަށް،" ނަތަންޔާހޫގެ ބާރު އެޅުމާއެކު ވޮޝިންޓަނުން އިޒްރޭލާއި ގުޅިގެން އީރާނާ ދެކޮޅަށް އުދުވާން ހިންގަން ފެށުމާ ގުޅޭގޮތުން ގާލީބާފް ލިޔުއްވާފައިވެއެވެ.

"އަޅުގަނޑުމެންގެ ބިން ދިފާއުކުރުމަށް އޮތް އަޒުމް އިމްތިހާނު ނުކުރައްވާ،" ގާލީބާފް ވިދާޅުވިއެވެ. މި އުދުވާނާ ގުޅިގެން އީރާނުން ވަނީ ސަރަހައްދީ ގައުމުތަކުގެ ބިންތައް އީރާނަށް ހަމަލާދިނުމަށް ބޭނުންކުރުމުގެ ފުރުސަތު ނުދިނުމަށާއި، މި އުދުވާނުން އެކަހެރިވުމަށް އެ ގައުމުތަކަށް ބާރުއަޅާފައެވެ.

މީގެ އިތުރުން ބުދަ ދުވަހު އީރާނުގެ ޚާރިޖީ ވަޒީރު އައްބާސް އަރާގްޗީ ވަނީ، އީރާނާ ދެކޮޅަށް އެ ގައުމުތަކުގެ ބިން ބޭނުންކުރުމުގެ ފުރުސަތު ނުދޭނެ ކަމަށް މީގެ ކުރިން ބުނި ބައެއް ސަރަހައްދީ ގައުމުތަކުން އެ ބުނި ބުނުމާ ޚިލާފުވެފައިވާތީ އެކަމާ ހިތާމަކުރައްވާ ކަމަށް ވިދާޅުވެފައެވެ.

"އެ ގައުމުތަކަށް ނޭނގި މިކަން ހިނގާފައިވާނެ ކަމަކަށް އަޅުގަނޑުމެން ގަބޫލެއް ނުކުރަން،" އަރާގްޗީ ވިދާޅުވިއެވެ.

"ސަރަހައްދީ ގައުމުތަކަށް އަޅުގަނޑު ދޭން އޮތް މެސެޖަކީ، އީރާނުގެ ބިމަށާއި ރައްޔިތުންނަށް އަމާޒުކޮށް އެމެރިކާއާއި ޒަޔަނިސްޓުން ހިންގާ މި އުދުވާނުން އެ ގައުމުތަކުން ކަނޑައެޅިގެން ދުރުވާންޖެހޭނެ ކަމާއި، މި ހަނގުރާމައިން އެކަހެރިވާންޖެހޭނެ ކަން،" ޚާރިޖީ ވަޒީރު ވިދާޅުވިއެވެ.