އިރާގު ހަނގުރާމަ އަށް ވުރެ، މެދު އިރުމަތީގެ ހަނގުރާމަ ނުރައްކާތެރި: ސްޕެއިންގެ ބޮޑު ވަޒީރު

މެދު އިރުމަތީގެ ސަރަހައްދުގައި މިހާރު ހިނގަމުންދާ ހަނގުރާމަ އަކީ، 2003 ވަނަ އަހަރު އިރާގަށް އެރި އެރުމަށް ވުރެ، މާ ނުރައްކާތެރި އަދި ޙާލަތު ގޯސް ހަނގުރާމައެއް ކަމަށް ސްޕެއިންގެ ބޮޑު ވަޒީރު ޕެޑްރޯ ސަންޗޭޒް ވިދާޅުވެއްޖެ އެވެ. 

ސްޕެއިންގެ ޤާނޫނު ހަދާ މަޖިލީހުގައި ބުދަ ދުވަހު ވާހަކަ ދައްކަވަމުން ސަންޗޭޒް ވިދާޅުވީ، މިއީ އިރާގުގައި ކުރި ފަދަ ޣައިރު ޤާނޫނީ ހަނގުރާމައެއް ކަމަށާއި، މިހާރު ކުރިމަތިލާން ޖެހިފައި ވަނީ އެއަށް ވުރެ ވެސް މާ ބޮޑު ނުރައްކަލަކާ ކަމަށެވެ. މި ހަނގުރާމައިގެ ސަބަބުން ކުރާނެ އަސަރު މާ ފުޅާވެފައި، މާ ފުން ވާނެ ކަމަށް އޭނާ ފާހަގަ ކުރެއްވި އެވެ. 

މީގެ އިތުރުން މިއީ އެއްވެސް ބުއްދި އަކަށް ޤަބޫލު ނުކުރެވޭ ފަދަ އަނިޔާވެރި ހަނގުރާމައެއް ކަމަށާއި، މީގެ ސަބަބުން އިޤްތިޞާދީ، އިޖުތުމާއީ އަދި ތިމާވެށީގެ ލަނޑު ދަނޑިތައް ހާސިލު ކުރުމަށް ކުރާ މަސައްކަތުގައި އެތައް އަހަރެއް ފަހަތަށް ސޮއްސާލާނެ ކަމަށް ވެސް ސްޕެއިންގެ ބޮޑު ވަޒީރު ވަނީ ވިދާޅުވެފައި އެވެ. 

އީރާންއާ ދެކޮޅަށް ހަމަލާ ދިނުމަށް، އެމެރިކާ އިން ސްޕެއިންގައި ހުންނަ އަސްކަރީ މަރުކަޒުތައް ބޭނުން ކުރުމަށް އެމެރިކާ އިން އެދުނު އެދުމަށް، ސަންޗޭޒް ވަނީ އިންކާރު ކުރައްވައިފަ އެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ، ސްޕެއިންއާ އެކު އޮންނަ ވިޔަފާރީގެ ގުޅުންތައް ކަނޑާލާނެ ކަމުގެ އިންޒާރު ވެސް ދެއްވައިފަ އެވެ.

ސަންޗޭޒް ވިދާޅުވީ 2003 ވަނަ އަހަރު އެމެރިކާ އިން އިރާގަށް އެރުމުން އެއްވެސް މަގުސަދެއް ހާސިލު ނުވި ތަނުގައި، އާންމު ރައްޔިތުންގެ ދިރިއުޅުމަށް މާ ބޮޑަށް ދަތިވެގެން ދިޔަ ކަމަށެވެ. އަދި އީރާން އަށް ދޭ ހަމަލާ ތަކުގެ ސަބަބުން، މިލިއަނުން ބަޔަކަށް އިޤްތިޞާދީ ގޮތުން ބޮޑެތި ގެއްލުން ތަކެއް ލިބިދާނެ ކަމުގެ އިންޒާރު ވެސް ސަންޗޭޒް ވަނީ ދެއްވައިފަ އެވެ. 

ބޮޑު ވަޒީރު ސަންޗޭޒް، އިރާގު ހަނގުރާމައިގެ މިސާލު ދެއްކެވުމަކީ ސްޕެއިންގެ ރައްޔިތުންގެ މެދުގައި އޭނާ އަށް އޮންނަ ތާއީދު އަދި އިޙުތިރާމް އިތުރު ވާނެ ކަމެއް ކަމަށް ބެލެވެ އެވެ. އެއީ އޭރު ވެރިކަމުގައި އޮތް ކޮންޒަވޭޓިވް ޕޮޕިއުލާ ޕާޓީ އިން އިރާގު ހަނގުރާމަ އަށް ތާއީދު ކުރުމުން، ސްޕެއިންގެ ރައްޔިތުން އެކަމާ ދެކޮޅަށް ބޮޑެތި މުޒާހަރާ ތަކެއް ކޮށްފައިވާތީ އެވެ.