ޕާކިސްތާން ދެމި އޮންނާނީ ސައުދީ އާއެކު: ޕާކިސްތާންގެ ބޮޑު ވަޒީރު

އީރާން އިން ސައުދީ އަރަބިއްޔާ އަށް އަމާޒުކޮށް ދެމުން އަންނަ ހަމަލާތަކާ ދެކޮޅަށް، ޕާކިސްތާން އިން އަބަދު ވެސް ސައުދީ އަރަބިއްޔާ އާއެކު ސާބިތުކަމާ އެކު ދެމި އޮންނާނެެ ކަމުގެ ޔަޤީންކަން، އެ ޤައުމުގެ ބޮޑު ވަޒީރު ޝެހްބާޒް ޝަރީފް ދެއްވައިފި އެވެ. 

ޕާކިސްތާންގެ ބޮޑު ވަޒީރު ޝެހްބާޒް މި ޔަޤީންކަން ދެއްވާފައި ވަނީ، ސައުދީގެ ވަލީ އަހުދު މުޙައްމަދު ބިން ސަލްމާންއާ ފޯނުން ގުޅުއްވައި ކުރެއްވި މަޝްވަރާ ތަކުގަ އެވެ. 

ސައުދީ ޕްރެސް އެޖެންސީ (އެސްޕީއޭ) އިން ރިޕޯޓު ކޮށްފައިވާ ގޮތުގައި، މި ފޯނު ކޯލުގައި ދެ ބޭފުޅުން ވަނީ މެދު އިރުމަތީގައި މިހާރު އުފެދިފައިވާ ނުތަނަވަސްކަމާއި، އޭގެ ސަބަބުން ސަރަހައްދީ އަދި ބައިނަލްއަޤުވާމީ ސަލާމަތާއި ހަމަޖެހުމަށް ކުރާނެ ނޭދެވޭ އަސަރުތަކާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވައިފަ އެވެ.

މި މަޝްވަރާ ތަކުގައި ޝެހްބާޒް ވަނީ، ސައުދީގެ ސަލާމަތާއި އިސްތިޤުލާލަށް އުނިކަން އަންނަ ގޮތަށް އީރާން އިން ތަކުރާރުކޮށް ދެމުންދާ ހަމަލާތަކާ ދެކޮޅަށް ޕާކިސްތާން އިން ފުރިހަަމަ އަށް ވަކާލާތު ކުރާ ކަމަަށް ވިދާޅުވެފަ އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ސަބަބުން، މެދު އިރުމަތީގެ ސަރަހައްދު ވަނީ ބޮޑު ނުތަނަވަސްކަމެއްގެ ތެރޭގަ އެވެ. އީރާން އިން ދަނީ ޑްރޯން އާއި މިސައިލް ބޭނުން ކޮށްގެން މެދު އިރުމަތީގެ ސަރަހައްދުގައި ހުރި އެމެރިކާގެ ބޭސް ތަކަށް އަމާޒުކޮށް ހަމަލާ ދެމުންނެވެ. 

ސައުދީގެ ވަލީ އަހުދު މުޙައްމަދާއި، ޕާކިސްތާންގެ ބޮޑު ވަޒީރު ޝެހްބާޒްގެ މި މަޝްވަރާ ތަކަކީ ސަރަހައްދީ ރައްކާތެރިކަން ކަށަވަރު ކުރުމަށާއި، އިސްލާމީ ޤައުމު ތަކުގެ މެދުގައި އޮންނަ ގުޅުން ބަދަހި ކުރުމަށް ކުރެވުނު މުހިންމު މަޝްވަރާ ތަކެއްގެ ގޮތުގައި ފާހަގަ ކޮށްފައިވެ އެވެ. ޕާކިސްތާން އަކީ އަބަދު ވެސް ސައުދީގެ ދިފާއީ އަދި ސަލާމަތީ ކަންކަމުގައި އެންމެ ގާތުން މަސައްކަތް ކުރާ އެއް ޤައުމެވެ.