ދެ ވަނަ ލެގު އެއްވަރުވެ، އެގްރިގޭޓް އިން ކުރި ހޯދައި ޕީއެސްޖީ ގަދަ 16 އަަށް

ޔުއެފާ ޗެމްޕިއަންސް ލީގުގެ ޕްލޭ އޮފްގެ ދެ ވަނަ ލެގުގައި މޮނާކޯއާ އެއްވަރުވި ނަމަވެސް، އެގްރިގޭޓް އިން ކުރި ހޯދައި އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

މޮނާކޯގެ އަމިއްލަ ދަނޑުގައި މި ދެ ޓީމު ބައްދަލުކުރި ފުރަތަމަ ލެގު ޕީއެސްޖީ އިން ކާމިޔާބު ކުރީ 3-2 އިންނެވެ. ބުދަ ދުވަހުގެ ރޭ ޕީއެސްޖީގެ އަމިއްލަ ދަނޑުގައި ކުޅުނު ދެ ވަނަ ލެގު ނިމުނީ ދެ ޓީމު 2-2 އިން އެއްވަރު ވެގެންނެވެ.

މެޗުގެ ފުރަތަަމަ ހާފުގެ ފަހު ވަގުތުގެ ތެރޭގައި މޮނާކޯ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މެގްނެސް އަކްލިއޫޗޭ އެވެ. އެއާ އެކު، މޮނާކޯ އިން ފުރަަތަމަ ހާފު ނިންމާލީ ވެސް ލީޑުގައި އޮވެގެންނެވެ. ނަމަވެސް، ދެ ވަނަ ހާފުގައި އެ ޓީމުގެ މަމަދޫ ކުލިބާލީ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުން، މެޗުގެ ބާކީ ބައި ކުޅުނީ އެއް ކުޅުންތެރިޔަކު މަދުކޮށެވެ.

މެޗުގެ 60 ވަނަ މިނެޓުގައި ޕީއެސްޖީގެ މާކީނިއޯސް ވަނީ ލަނޑު ޖަހައި އެޓީމަށް ނަތީޖާ ހަމަހަމަ ކޮށްދީފަ އެވެ. އޭގެ ހަ މިނެޓު ފަހުން ކްވިޗާ ކްވަރަޝްކޭލިއާ ވަނީ ޕީއެސްޖީގެ ދެ ވަނަ ލަނޑު ޖަހައި ލީޑު ނަގައިދީފަ އެވެ. ނަމަވެސް މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖޯޑަން ޓެޒޭ ވަނީ މޮނާކޯގެ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްފަ އެވެ. 

ދެ ވަނަ ލެގުގެ މެޗު އެއްވަރުވި ނަމަވެސް، އެގްރިގޭޓް ނަތީޖާ 5-4 އިން ކުރި ހޯދައި ޕީއެސްޖީ އިން ވަނީ މުބާރާތުގެ ގަދަ 16 ވަނަ ބުރުގެ ޖާާގަ ހޯދައިފަ އެވެ.