ސްޕޯޓިން އަތުން ޗެމްޕިއަންސް ޕީއެސްޖީ ބަލިވެއްޖެ

ޔުއެފާ ޗެމްޕިއަންސް ލީގުގައި ސްޕޯޓިންއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) ބަލިވެއްޖެ އެވެ.

ސްޕޯޓިންގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 2-1 އިން ޕީއެސްޖީ ބަލިކޮށްފަ އެވެ. މެޗުގެ ދެ ވަނަ ހާފުގައި ސްޕޯޓިން އިން ލަނޑު ޖަހައި ލީޑު ހޯދާފައި ވަނިކޮށް، ޕީއެސްޖީ އިން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ލަނޑެއް ޖަހައިގެން ސްޕޯޓިން އިން ވަނީ ޕީއެސްޖީ ބަލިކޮށްފަ އެވެ.

މެޗުގެ ފުރަތަމަ ހާފުގައި ޕީއެސްޖީގެ ވަރެން ޒެއިރް އެމެރީ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަަލައި ނުގަންނަން ނިންމައިފަ އެވެ. މެޗުގެ ދެ ވަނަ ހާފުގައި ވެސް ޕީއެސްޖީ އަށް ވަނީ ލީޑު ނަގަން ފުރުސަތު ލިބިފަ އެވެ. 

މެޗުގައި ސްޕޯޓިން އިން ލަނޑު ޖަހައި ކުރި ހޯދީ 74 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ ލުއިސް ސުއަރޭޒް އެވެ. އޭގެ ފަސް މިނެޓު ފަހުން ކްވިޗާ ކްވަރަޝްކޭލިއާ ވަނީ ލަނޑު ޖަހައި ޕީއެސްޖީ އަށް ނަތީޖާ ހަމަހަމަ ކޮށްދީފަ އެވެ. ނަމަވެސް، މެޗުގެ އެންމެ ފަހު ވަގުތުގައި ދެ ވަނަ ލަނޑެއް ޖަހައި ސުއަރޭޒް ވަނީ ސްޕޯޓިން އަށް މޮޅެއް ހޯދައިދީފަ އެވެ.

މިއީ މިފަހަރުގެ ޗެމްޕިއަންސް ލީގުގައި ޕީއެސްޖީގެ ދެ ވަނަ ބައްޔެވެ. މިހާތަނަށް ޗެމްޕިއަންސް ލީގުގައި ކުޅެފައިވާ ހަތް މެޗުން ޕީއެސްޖީ އަށް 13 ޕޮއިންޓު ލިބޭއިރު، އެ ޓީމު އޮތީ ފަސް ވަނައިގަ އެވެ. ހަމަ އެ އަދަދަށް ޕޮއިންޓު ހޯދައިގެން، ސްޕޯޓިން އޮތީ ހަ ވަނައިގަ އެވެ.