ލީލް ބަލިކޮށް ޕީއެސްޖީ އެއް ވަނަ އަށް، އެންރީކޭ އަށް 100 ވަނަ މޮޅު
މިއީ އެންރީކޭގެ އިރުޝާދުގެ ދަށުން ޕީއެސްޖީ އިން ހޯދި 100 ވަނަ މޮޅު. އޭނާގެ އިރުޝާދުގެ ދަށުން މިހާތަނަށް ޕީއެސްޖީ އިން ވަނީ 147 މެޗު ކުޅެފައި. އޭގެ ތެރެއިން 100 މެޗުން މޮޅުވެފައިވާއިރު، 20 މެޗުން ބަލިވެ އަނެއް 27 މެޗުން ވަނީ އެއްވަރުވެފައި.
ޕީއެސްޖީގެ ކޯޗު ލުއިސް އެންރީކޭ | ރޮއިޓަސް
ފްރާންސް ލީގުގައި ލީލްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން ލީގު ތާވަލްގެ އެއް ވަނަ މަގާމަށް ޖެހިލައިފި އެވެ،
ހުކުރު ދުވަހުގެ ރޭ ދަންވަރު ޕީއެސްޖީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ޕީއެސްޖީ އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.
މެޗު ފަށައިގެން 13 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ފްރާންސްގެ ފޯވާޑު އޮސްމާން ޑެމްބެލޭ އެވެ. އެ ލަނޑު ޖަހަން ޑެމްބެލޭ އަަށް ފުރުސަތު ތަނަވަސްކޮށްދިނީ ވިޓީނިއާ އެވެ. އޭގެ ފަހުން ދެ ވަނަ ހާފުގައި ޑެމްބެލޭ ވަނީ ޕީއެސްޖީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޕީއެސްޖީގެ ތިން ވަނަ ލަނޑު ޖެހީ ބްރާޑްލޭ ބާކޮލާ އެވެ.
މޮޅާ އެކު ޕީއެސްޖީ އިން ވަނީ ލީގު ތާވަލްގެ އެއް ވަނަ މަގާމަށް ޖެހިލައިފަ އެވެ. މިހާތަނަށް ކުޅެފައިވާ 18 މެޗުން ޕީއެސްޖީ އަށް ލިބެނީ 42 ޕޮއިންޓެވެ. ޕީއެސްޖީ އަށް ވުރެ އެއް މެޗު މަދުން ކުޅެގެން ދެ ވަނައިގައި ލެންސް އަށް 40 ޕޮއިންޓު ލިބޭއިރު، މެޗުގެ އަދަދު ހަމަކޮށް އެއް ވަނަ އަށް ޖެހިލުމުގެ ފުރުސަތު އެ ޓީމަށް އޮންނާނެ އެވެ.
މެޗަށް ފަހު ވާހަކަ ދައްކަމުން ޕީއެސްޖީގެ ކޯޗު ލުއިސް އެންރީކޭ ބުނެފައި ވަނީ، ޑެމްބެލޭ އަކީ ޕީއެސްޖީ އިން ކޮންމެހެން ވެސް ބޭނުންވާ ފެންވަރުގެ ކުޅުންތެރިޔެއް ކަމަށެވެ. ޚާއްސަކޮށް ޑެމްބެލޭގެ ފަރާތުން ފެންނަމުން އަންނަ ކުޅުމާއި، އެންމެ މުހިންމު ވަގުތު ޑެމްބެލޭގެ ފަރާތުން ޓީމަށް އެތައް ފައިދާ ތަކެއް ކުރާ ކަމަށް އެންރީކޭ ބުންޏެވެ.
މިއީ އެންރީކޭގެ އިރުޝާދުގެ ދަށުން ޕީއެސްޖީ އިން ހޯދި 100 ވަނަ މޮޅެވެ. އޭނާގެ އިރުޝާދުގެ ދަށުން މިހާތަނަށް ޕީއެސްޖީ އިން ވަނީ 147 މެޗު ކުޅެފަ އެވެ. އޭގެ ތެރެއިން 100 މެޗުން މޮޅުވެފައިވާއިރު، 20 މެޗުން ބަލިވެ އަނެއް 27 މެޗުން ވަނީ އެއްވަރުވެފަ އެވެ.
