ނިއުކާސަލްއާ އެއްވަރުވެ، ޗެމްޕިއަން ޕީއެސްޖީ ޕްލޭ އޮފްގައި ކުޅެން ޖެހިއްޖެ

ޔުއެފާ ޗެމްޕިއަންސް ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން އެއްވަރުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން ޕްލޭ އޮފްގައި ކުޅެން ޖެހިއްޖެ އެވެ.

ޕީއެސްޖީގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ޕީއެސްޖީ އިން ލަނޑު ޖަހައި ކުރި ހޯދާފައި ވަނިކޮށް، ނިއުކާސަލް އިން ވަނީ ފަހަތުން އަރައި ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ހަތަރު ވަނަ މިނެޓުގައި ޕީއެސްޖީ އަށް ވަނީ ލީޑު ނަގަން ފުރުސަތު ލިބިފަ އެވެ. ޕީއެސްޖީ އަށް ލިބުނު ޕެނަލްޓީ އޮސްމާން ޑެމްބެލޭ ފޮނުވާލި ނަމަވެސް، ނިއުކާސަލްގެ ގޯލު ކީޕަރު ވަނީ އެ ޕެނަލްޓީ ހުއްޓުވައިފަ އެވެ.

އޭގެ ހަތަރު މިނެޓު ފަހުން ޕީއެސްޖީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޕީއެސްޖީ އަށް ޖަހައިދިނީ ވިޓިނިއާ އެވެ. އެ ލަނޑު ޖަހަން ވިޓީނިއާ އަށް ފުރުސަތު ތަނަވަސްކޮށްދިނީ ކްވިޗާ ކްވަރޭޝްކޭލިއާ އެވެ. މެޗުގެ ފުރަތަމަ ހާފުގެ އިތުރު ވަގުތުގައި ނިއުކާސަލް އަށް ނަތީޖާ ހަމަހަމަ ކޮށްދިނީ ޖޯ ވިލޮކް އެވެ.

މެޗު އެއްވަރުވެ ޕީއެސްޖީ އޮތީ އަށް މެޗުން 14 ޕޮއިންޓާ އެކު 11 ވަނައިގަ އެވެ. ހަމަ އެ އަދަދަށް ޕޮއިންޓު ހޯދައިގެން ނިއުކާސަލް އޮތީ 12 ވަނައިގަ އެވެ. މެޗުން މޮޅުވެ ސީދާ 16 އިން ޖާގަ ހޯދުމުގެ ފުރުސަތު ޕީއެސްޖީ އަށް އޮތް ނަމަވެސް، ބައްޔާ އެކު އެ ޓީމަށް ޖެހޭނީ ޕްލޭ އޮފްގައި ވާދަ ކުރާށެވެ.