ބާކޮލާގެ ލަނޑުން މޮޅުވެ، ޕީއެސްޖީ އެއް ވަނަ އަށް ޖެހިލައިފި

ފްރާންސް ލީގުގައި އުކްސޭއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން ލީގު ތާވަލްގެ އެއް ވަނަ މަގާމަށް ޖެހިލައިފި އެވެ.

އުކްސޭގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗު  ޕީއެސްޖީ އިން ކާމިޔާބު ކުރީ 1-0 އިންނެވެ. މެޗުގެ ހަމައެކަނި ލަނޑު ޕީއެސްޖީ އިން ޖެހީ ވެސް ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ޕީއެސްޖީ އިން ވަނީ ލަނޑު ޖަހަން ފުރުސަތު ތަކެއް ހޯދައިފަ އެވެ. އެގޮތުން ޕީއެސްޖީ އަށް ކުރި ހޯދައިދޭން އޮސްމާން ޑެމްބެލޭ އާއި، ގޮންޒާލޯ ރާމޯސް އަށް ފުރުސަތު ލިބުނުއިރު އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ.

މެޗުގައި ޕީއެސްޖީ އިން ލަނޑު ޖަހައި ލީޑު ނެގީ 79 ވަނަ މިނެޓުގަ އެވެ. އެ ލަނޑު ޕީއެސްޖީ އަށް ޖަހައިދިނީ ބްރާޑްލޭ ބާކޮލާ އެވެ. އެއީ ޑެމްބެލޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އެއާ އެކު، އުކްސޭ އަތުން ޕީއެސްޖީ އަށް ވަނީ މުހިންމު މޮޅެއް ލިބިފަ އެވެ.

މޮޅާ އެކު ޕީއެސްޖީ އިން އެއް ވަނަ އަށް ޖެހިލިއިރު، އެއް ވަނައިގައި އެ ޓީމު އޮތީ މިހާތަނަށް ކުޅެފައިވާ 19 މެޗުން 45 ޕޮއިންޓާ އެކު އެވެ. ދެ ޕޮއިންޓުގެ ލީޑަކުން ޕީއެސްޖީ އެއް ވަަނައިގައި އޮތްއިރު، ޕީއެސްޖީ އަށް ވުރެ އެއް މެޗު މަދުން ކުޅެގެން ދެ ވަނައިގައި ލެންސް އަށް ލިބެނީ 43 ޕޮއިންޓެވެ. މެޗުގެ އަދަދު ހަމަކޮށް، އެއް ވަނަ އަށް ޖެހިލުމުގެ ފުރުސަތު އެ ޓީމަށް އޮންނާނެ އެވެ.