ފަހަތުން އަރައި މޮނާކޯ ބަލިކޮށް، ޕީއެސްޖީ އިން ފުރުސަތު ބޮޑު ކޮށްފި

ޔުއެފާ ޗެމްޕިއަންސް ލީގުގެ ޕްލޭ އޮފްގެ ފުރަތަމަ ލެގުގައި މޮނާކޯއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ގަދަ 16 ވަނަ ބުރުގެ ފުރުސަތު ބޮޑު ކޮށްފި އެވެ. 

މޮނާކޯގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ޕީއެސްޖީ އިން ކާމިޔާބު ކުރީ 3-2 އިންނެވެ. މެޗުގައި މޮނާކޯ އިން ދެ ލަނޑު ޖަހައިގެން ލީޑު ހޯދާފައި ވަނިކޮށް، ޕީއެސްޖީ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ފުރަތަމަ މިނެޓުގައި މޮނާކޯ އަށް ލީޑު ނަގައިދިނީ ފޮލަރިން ބަލޮގަން އެވެ. އޭގެ ފަހުން ފުރަތަމަ ހާފުގެ 18 ވަނަ މިނެޓުގައި ބަލޮގަން ވަނީ ދެ ވަނަ ލަނޑެއް ޖަހައި މޮނާކޯ އަށް ލީޑު ފުޅާ ކޮށްދީފަ އެވެ. ނަމަވެސް، ފުރަތަމަ ހާފު ނިމުމުގެ ކުރިން ޕީއެސްޖީ އިން ވަނީ ދެ ލަނޑު ޖަހައި ނަތީޖާ ހަމަހަމަ ކޮށްފަ އެވެ.

މެޗުގެ 22 ވަނަ މިނެޓުގައި ޕީއެސްޖީ އަށް ލިބުނު ޕެނަލްޓީ ވިޓީނިއާ ފޮނުވާލި ނަމަވެސް ކާމިޔާބު ކުރެވޭ ގޮތެއް ނުވި އެވެ. އޭގެ ހަތް މިނެޓު ފަހުން ޕީއެސްޖީގެ ފުރަތަމަ ލަނޑު ޖަހައި ފަރަގު ކުޑަ ކޮށްދިނީ ޑެޒައިއާ ޑޯއު އެވެ. އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވާޏް ހަތަރު މިނެޓަށް ވެފައި ވަނިކޮށް ޕީއެސްޖީ އަށް ނަތީޖާ ހަމަހަމަ ކޮށްދިނީ އަޝްރަފް ޙަކީމީ އެވެ.

މެޗުގެ ދެ ވަނަ ހާފުގައި މޮނާކޯ އަށް އެންމެ ބޮޑު ގެއްލުމެއް ދެއްކީ އެ ޓީމުގެ އެލެކްސެންޑާ ގޮލޮވިން އަށް ސީދާ ރަތް ކާޑު ދެއްކުމުންނެވެ. އޭގެ ފަހުން މެޗުގެ 67 ވަނަ މިނެޓުގައި ޑޯއު ވަނީ އޭނާގެ ދެ ވަނަ ލަނޑެއް ޖަަހައި މެޗުން ޕީއެސްޖީ މޮޅު ކޮށްދީފަ އެވެ. 

މޮޅާއެކު ޕީއެސްޖީ އިން ގަދަ 16 ވަނަ ބުރުގެ ފުރުސަތު ބޮޑު ކޮށްފައިވާއިރު، ޕީއެސްޖީގެ އަމިއްލަ ދަނޑުގައި މި ދެ ޓީމު ކުޅޭ ދެ ވަނަ ލެގު އޮންނާނީ ފެބްރުވަރީ މަހުގެ 26 ވަނަ ދުވަހު އެވެ.