ސަރަހައްދީ ހަމަލާތައް ހުއްޓާލައި މަޝްވަރާގެ މޭޒަށް އައުމަށް، މެކްރޮން އީރާން އަށް ގޮވާލައްވައިފި

އީރާން އިން ސަރަހައްދީ ޤައުމު ތަކަށް ދެމުންދާ ހަމަލާތައް ހުއްޓާލައި، ހެޔޮ ނިޔަތުގައި ވާހަކަ ދެއްކުމުގައި ބައިވެރިވުމަށް ފްރާންސްގެ ރައީސް އިމަނުއެލް މެކްރޮން ގޮވާލައްވައިފި އެވެ. 

މެކްރޮން މިހެން ގޮވާލައްވާފައި ވަނީ، އީރާންގެ ރައީސް މަސްއޫދު ޕެޒެޝްކިއާން އާއެކު ފޯނުން ގުޅުއްވައި ދެއްކެވި ވާހަކައިގަ އެވެ. މީގެ ކުރިން ވެސް މެކްރޮން ވަނީ އީރާންގެ ރައީސް ޕެޒެޝްކިއާންއާ ވާހަކަ ދައްކަވައިފަ އެވެ. 

އެކްސްގައި ކުރެއްވި ޕޯސްޓެއްގައި މެކްރޮން ވިދާޅުވީ، ސަރަހައްދުގެ ޤައުމު ތަކަށް ދެމުން ގެންދާ، ޤަބޫލު ނުކުރެވޭ ހަމަލާތައް ހުއްޓާލުގެ ބޭނުންތެރިކަން ވަރަށް ބޮޑު ކަމަށް ފާހަގަ ކުރައްވައި ޕެޒެޝްކިއާންއާ ވާހަކަ ދެއްކެވި ކަމަށެވެ. އަދި ހަކަތަ އާއި ރައްޔިތުންގެ އިންފްރާސްޓްރަކްޗާ ރައްކާތެރި ކުރުމާއި، ހޮރްމޫޒް ކަނޑު އޮޅީގައި އުޅަނދު ފަހަރު ދަތުރު ކުރުމުގެ މިނިވަންކަން އަލުން ޤާއިމު ކުރުމުގެ ބޭނުންތެރިކަމާ ގުޅޭ ގޮތުން ވެސް މެކްރޮން ވަނީ ވާހަކަ ދައްކަވައިފަ އެވެ. 

މެކްރޮން އިތުރަށް ވިދާޅުވީ، މިހާރު އޮތް ޙާލަތު ހަމަޖެހުމަށް މަގު ފަހި ކޮށްދިނުމަށާއި، އީރާންގެ ނިއުކްލިއާ އަދި ބެލިސްޓިކް ޕްރޮގްރާމް އާއި، ސަރަަހައްދީ ހަމަޖެހުން ޤާއިމު ކުރުމުގެ ކަންކަމާ ގުޅޭ ގޮތުން ހެޔޮ ނިޔަތުގައި ވާހަކަ ދެއްކުމުގައި ބައިވެރިވުމަށް އީރާން އަށް ގޮވާލައްވާފައިވާ ކަަމަށެވެ. 

އީރާންގެ ރައީސް ޕެޒެޝްކިއާންއާ ގުޅުއްވައި މެކްރޮން ވާހަކަ ދައްކަވާފައި މި ވަނީ، ސަރަހައްދީ ޙާލަތު އިތުރަށް ގޯސްވަމުން އަންނަ ދަނޑިވަޅެއްގަ އެވެ. އީރާން އާއި އިޒްރޭލްއާ ދެމެދު އުފެދިފައިވާ ނުތަނަވަސްކަމާއި، ސަރަހައްދުގައި އީރާންގެ ބާރު ފުޅާ ވަމުން އަންނާތީ، އެމެރިކާ އާއި އިޒްރޭލް އިން ވަނީ ކަންބޮޑުވެފަ އެވެ. 

މެކްރޮން މި ވާހަކަތައް ދައްކަވާފައި މި ވަނީ ސަރަހައްދުގައި ހަމަޖެހުން ޤާއިމު ކުރުމަށް ޔޫރަޕުން ކުރަމުން އަންނަ މަސައްކަތް ތަކުގެ ބައެއްގެ ގޮތުގައި ކަމަށް ބެލެވެ އެވެ.