އީރާން ބަލި ކޮށްލުމަށް އެމެރިކާ އާއި އިޒްރޭލުން ޖެހި ހިސާބު ގޯސް: އިޒްރޭލުގެ ޖާސޫސީ އިދާރާގެ ކުރީގެ އިސް އޮފިޝަލް

އީރާނުގެ ވެރިން އަވަހާރަކޮށްލައިގެން އެ ގައުމުގައި އިންގިލާބެއް ގެނައުމަށް އެމެރިކާ އާއި އިޒްރޭލުން ގެންގުޅުނު ސިޔާސަތު ބިނާވެފައިވާ އޮތީ "ގޯސް ހިސާބެއް" ގެ މައްޗަށް ކަމަށާއި، އޭގެ ސަބަބުން އިސްލާމީ ޖުމްހޫރިއްޔާ ބަލިކަށިކޮށްނުލެވުނު ކަމަށް އިޒްރޭލުގެ ޖާސޫސީ އިދާރާ، މޮސާޑްގެ ކުރީގެ އިސް އޮފިޝަލަކު ރަޝިޔާ ޓީވީ (އާރުޓީ) ނިއުސްއަށް ދެއްވި އިންޓަވިއުއެއްގައި ވިދާޅުވެއްޖެއެވެ.

މޮސާޑްގެ ހޮސްޓޭޖަސް އެންޑް މިސިންގް ޕާސަންސް ޑިވިޜަންގެ ކުރީގެ ވެރިޔާ ރާމީ އިގްރާ ދެއްވި ހާއްސަ އިންޓަވިއުއެއްގައި ވިދާޅުވީ، އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އާއި އެ ގައުމުގެ އެހެން އިސްވެރިން އަވަހާރަކޮށްލުމުން އީރާނުގެ ރައްޔިތުން މަގުތަކަށް ނުކުމެ މުޒާހަރާކުރާނެ ކަމަށް އުންމީދުކޮށްގެން ތިބި މީހުންނަށް މިހާރު ވަނީ "ބޮޑު މާޔޫސްކަމެއް" ލިބިފައި ކަމަށެވެ.

އިންގިލާބަކީ ކޮބައިކަން މީހުންނަށް ފަހުމްނުވާކަން ފާހަގަކުރައްވަމުން އިގްރާ ވިދާޅުވީ، އިންގިލާބެއް ގެނައުމަށްޓަކައި ރައްޔިތުންގެ ފަރާތުން އުފެދޭ ހަރަކާތެއް ބޭނުންވާނެ ކަމަށާއި، ނަމަވެސް އީރާނުގައި އެފަދަ ހަރަކާތެއް ނެތް ކަމަށެވެ. އަދި އިންގިލާބަކަށް ބޭނުންވަނީ ގައުމުގެ އެތެރޭގެ ލީޑަޝިޕެއް ކަމަށާއި، އެމެރިކާގެ ލޮސް އެންޖެލިސްގައި ހުންނެވި އީރާނުގެ ކުރީގެ ރަސްގެފާނުގެ ދަރިކަލުން ރިޒާ ޕަހްލަވީ ފަދަ ބޭފުޅުންނަށް އެކަން ނުކުރެވޭނެ ކަމަށް އޭނާ ވިދާޅުވިއެވެ.

މީގެއިތުރުން، އެމެރިކާ އާއި އިޒްރޭލުން އީރާނަށް ދެމުންދާ ވައިގެ ހަމަލާތަކުން އެ ގައުމު ބަލިކޮށްލެވިދާނެ ކަމަށް ގަބޫލުކުރެވޭ ވިސްނުމަށް އިގްރާ ވަނީ ދެކޮޅު ހައްދަވާފައެވެ. ދެވަނަ ބޮޑު ހަނގުރާމައިން މިސާލު ދައްކަވަމުން އޭނާ ވިދާޅުވީ، ރަޝިޔާގެ ސިފައިން ޖަރުމަނުގެ ބާލިންއަށް އެއްގަމު މަގުން އަރަންދެން އެއްވެސް ކަމެއް ކާމިޔާބުނުވާ ކަމަށާއި، ހަނގުރާމަ ކާމިޔާބު ކުރެވެނީ ހަމައެކަނި ވައިގެ ހަމަލާތަކުން ނޫން ކަމަށާއި، އެކަމަށްޓަކައި އެއްގަމު މަގުން ސިފައިން އެތަނަކަށް ވަންނަން ޖެހޭނެ ކަމަށެވެ.

މޮސާޑްގެ ކުރީގެ އޮފިޝަލް މިހެން ވިދާޅުވެފައި މިވަނީ، އީރާނުން ނިއުކްލިއާ ހަތިޔާރު އުފެއްދުން ހުއްޓުވުމުގެ ނަމުގައި އެމެރިކާ އާއި އިޒްރޭލުން އީރާނަށް ހަމަލާދޭތާ ހަތަރުވަނަ ހަފުތާ ފާއިތުވެފައިވަނިކޮށްނެވެ. އިގްރާ ވިދާޅުވި ގޮތުގައި މި ހަމަލާތަކުގެ ސަބަބުން އީރާނުން ނިއުކްލިއާ ހަތިޔާރު އުފެއްދުމުގެ ފުރުސަތު މިހާރު ވަނީ ކުރިއަށްވުރެ ބޮޑުވެފައެވެ. އަދި އީރާނުގެ ލީޑަރުން ނިއުކްލިއާ ބޮން އުފެއްދުމަށް ގޮވާލައި "އާ ފަތުވާއެއް" ނެރެފައިވާ ކަމަށް ލިބޭ ރިޕޯޓްތަކަށް އޭނާ އިޝާރާތް ކުރެއްވިއެވެ.

މި ހަނގުރާމަ މިހާރު ދުނިޔެއަށް ނުރައްކާތެރި "ހަކަތައިގެ ހަނގުރާމައަކަށް" ބަދަލުވަމުންދާ ކަމުގެ އިންޒާރު ދެއްވަމުން، އެމެރިކާގެ ރައީސް ޑޮނަލްޑް ޓްރަމްޕަށް މި ހަނގުރާމަ ހުއްޓުވުމަށް އެއްބަސްވުމަކަށް އާދެވިދާނެ ކަމާމެދު އިގްރާ ވަނީ ޝައްކު އުފައްދަވާފައެވެ.