ސުލްޙައިގެ މަޝްވަރާ ތަކުގައި މެދުވެރިއްގެ ދައުރު އަދާ ކުރަން ޕާކިސްތާން އޮތީ ތައްޔާރަށް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ނިންމުމަށްޓަކައި، ސުލްޙައިގެ މަޝްވަރާތައް ކުރިއަށް ގެންދިޔުމުގައި މެދުވެރިއެއްގެ ދައުރު އަދާ ކުރަން ތައްޔާރަށް އޮތް ކަމަށް ޕާކިސްތާން އިން ހާމަ ކޮށްފި އެވެ.

ޕާކިސްތާންގެ ބޮޑު ވަޒީރު ޝެހްބާޒް ޝަރީފް މިހެން ވިދާޅުވެފައި ވަނީ، އީރާންގެ ކަރަންޓުގެ ނިޒާމަށް ހަމަލާ ދޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރު، ފަސް ދުވަހަށް މަޑު ޖައްސާލައި، މަޝްވަރާ ކުރަމުން އަންނަ ކަމަށް ޓްރަމްޕް ވިދާޅުވިތާ އެއް ދުވަސް ފަހުންނެވެ. 

އެކްސްގައި ކުރެއްވި ޕޯސްޓެއްގައި ބޮޑު ވަޒީރު ޝެހްބާޒް ވިދާޅުވީ، ހަނގުރާމަ ނިމުމަކަށް ގެނައުމަށްޓަކައި މިހާރު ކުރިއަށްދާ މަޝްވަރާ ތަކަށް ޕާކިސްތާން އިން ފުރިހަމަ އަށް ތާއީދު ކުރާ ކަމަށެވެ. އަދި އެމެރިކާ އާއި އީރާން އިން އެއްބަސްވާ ނަމަ، ދާއިމީ ޙައްލެއް ހޯދުމަށް ބާއްވާ މާނަ ހުރި މަޝްވަރާ ތަކަށް ފުރުސަތު ހޯދައި ދިނުމަކީ ޕާކިސްތާނަށް ލިބޭނެ ޝަރަފެއް ކަމަށް ވެސް ބޮޑު ވަޒީރު ވިދާޅުވި އެވެ. 

އެމެރިކާ އާއި އިޒްރޭލް އެކުވެގެން އީރާންއާ ދެކޮޅަށް ހަމަލާތައް ދޭން ފެށީ ވެސް، އެމެރިކާ އާއި އީރާންއާ ދެމެދު މަޝްވަރާތައް ކުރިއަށް ގެންދަމުން އަންނަނިކޮށެވެ. އޮމާން މެދުވެރި ވެގެން ކުރިއަށް ގެންދިޔަ މަޝްވަރާތަކާ މެދު ދެ ޤައުމުގެ އިސްވެރިން ވެސް ވަނީ އުންމީދު ފާޅު ކުރައްވައިފަ އެވެ. ނަމަވެސް، ވަކި ހިސާބަކުން އެމެރިކާ އާއި އިޒްރޭލް އިން އީރާން އަށް ހަމަލާ ދިނުމާ ގުޅިގެން އެ މަޝްވަރާތައް ވަނީ މަޑު ޖެހިފަ އެވެ. 

މި ހަނގުރާމައިގައި އީރާން އިން ވަނީ މެދު އިރުމަތީގެ ސަރަހައްދުގައި ހުރި އެމެރިކާގެ އަސްކަރީ މަރުކަޒު ތަކަށް އަމާޒުކޮށް ވަރުގަދަ ހަމަލާ ތަކެއް ދީފަ އެވެ. އަދި އީރާން އިން ވަނީ ދުނިޔޭގެ ތެލާއި ގޭހުގެ ފަސްބައި ކުޅަ އެއް ބައި ދަތުރު ކުރާ ހޮރްމޫޒް ކަނޑު އޮޅި ވެސް ބަންދު ކޮށްފަ އެވެ. އެކަމުގެ ސަބަބުން ތާރީޚުގައި ވެސް ކުރިމަތި ނުވާ ވަރުގެ ހަކަތައިގެ ދަތި ތަކެއް ދުނިޔެ އަށް ވަނީ ކުރިމަތިވެފަ އެވެ. 

ޕާކިސްތާންގެ ސަރުކާާރުގެ މަސްދަރު ތަކުން މައުލޫމާތު ދޭ ގޮތުގައި، މި މަޝްވަރާތައް ބޭއްވުމާ ގުޅޭ ގޮތުން ދެކެވެމުން އަންނަ ވާހަކަތައް މިހާރު އޮތީ ވަރަށް ކުރިއަރާފައިވާ މަރުޙަލާއެއްގަ އެވެ. އަދި ދެ ފަރާތުން ވެސް އެއްބަސްވެއްޖެ ނަަމަ، ކުރިއަށް އޮތް ހަފުތާއެއްހާ ދުވަހުގެ ތެރޭގައި މި ބައްދަލުވުން ބޭއްވުމުގެ ފުރުސަތު ބޮޑު ކަމަށް ވެސް ބުނެފައިވެ އެވެ.