ރައީސް މުއިއްޒު އަށް "ރީތި ބޮނޑިއެއް" ނުލިބެނީސް ނޫނެކޭ ގޮޅިގައި ހެޔޮ ފާހަގަ ޖައްސަވަންޖެހޭ!

ދިވެހިރާއްޖޭގެ ސިޔާސީ  މަޝްރަހުން މިއަދު ފެންނަމުން ދަނީ ވަރަށްވެސް ތަފާތު މަންޒަރެކެވެ. ގައުމުގެ ބާރުތައް ކޮންމެވެސް ގޮތަކުން، ވަގުތީ ގޮތެއްގައި ލިބިގެން އުޅޭ ބަޔަކު، ބަތްކައްކާ ކުޅޭހެން ގާނޫނު އަސާސީއާ ކުޅެމުންދަނީ ރައްޔިތުންގެ ބާރުތައް "މުށުތެރެއަށް" ލެވޭނެ ގޮތެއް ހޯދުމަށެވެ. މިއަދު ސަރުކާރު ހިންގުމާ ހަވާލުވެ ހުންނެވި ރައީސް ޑރ. މުހައްމަދު މުއިއްޒާއި، އެމަނިކުފާނަށް ސަނާ ކިޔާ ބަޔަކު އެތިބީ މުޅި މި ގައުމު އެވެރިންގެ އަތުތެރެއަށް ލެވޭނެ އެންމެ ފަސޭހަ ގޮތެއް ހޯދައި، އެ ވަގުތެއްގެ އިންތިޒާރުގަ އެވެ. 

އެކަމަށްޓަކައި ހީލަތްތެރި ރޭވުމަކުން، ޚަރަދުތައް ކުޑަކުރަން ކަމަށް ބުނެ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލަން ރެފަރެންޑަމް އެއް ނެގުމަަށް ނިންމާފައިވާއިރު މިކަމަކީ  ރޭވުމެއްގެ ތެރެއިން ރާއްޖޭގެ ވެރިކަން ދިގުދަންމާލުމަށް ރައީސް މުއިއްޒު ކުރައްވާ ކަމެއް ކަމަށް އެތައް ބަޔަކު އެދަނީ ބުނަމުންނެވެ. ރެފަރެންޑަމް ގައި "އާން" އެކޭ ބުނަން ޖެހޭ ކަމަށް ބުނެ ބޮޑު ކެމްޕޭނެއް މި ސަރުކާރުން ފަށާފައިވާއިރު މި ވޯޓުގައި ނޫނެކޭ ބުނަން ޖެހޭ އެންމެ ފުރަތަމަ ބޭފުޅަކީ ޚުދު ރައީސް މުއިއްޒު ކަމަށް ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު މިވަނީ ވިދާޅުވެފަ އެވެ. ސުއޫދު ވަނީ މިކަން ވަރަށް ރަނގަޅަށް ތަފްސީލު ވެސް ކޮށްދެއްވާފަ އެވެ. 

ސަރުކާރުން މި އުޅެނީ ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހަކު ބާއްވާށެވެ. ބޭނުމަކީ ޚަރަދު ކުޑަކުރުން ކަމަށް ބުނި ކަމުގައިވިޔަސް، މީގެ އަޑީގައި އޮތީ ހީލަތްތެރި ރޭވުމެއްކަން ގިނަ ބަޔަކު މިއަދު ގަބޫލު ކުރެ އެވެ. ސުއޫދު ވިދާޅުވާ ގޮތުގައި، މިއީ ރައީސް މުއިއްޒަށް ލިބިދާނެ ވަރަށް ބޮޑު "ލަނޑަކަށް" ވެދާނެ އެވެ. ރިޔާސީ އިންތިޚާބު ކާމިޔާބު ކުރެއްވި ނަމަވެސް، މަޖިލީހުގެ މެޖޯރިޓީ ނުލިބިއްޖެނަމަ، ދެން ވާނެ ގޮތް އެމަކިނުފާނަށް ވެސް އެނގިވަޑައިގަންނަވާނެ އެވެ. 

ސުއޫދު ފާހަގަކުރެއްވި ގޮތުގައި، ދެ އިންތިޚާބު އެއްކޮށް ބާއްވައިގެން ރައީސް ހޮވޭ ދުވަހު މަޖިލީހުގެ މެޖޯރިޓީ އިދިކޮޅަށް ލިބިއްޖެނަމަ، "ދެ ދުވަސް ނުވަނީސް" ރައީސް އަޒުލުކޮށް ގެއަށް ފޮނުވާލުމުގެ ބާރު ރައްޔިތުންނަށް ލިބިގެންދާނެ އެވެ. އެހެންވެއްޖެ ނަމަ މިއީ ހަމަ ރީތި "ބޮނޑިއެއް ބޮވުން" ނޫން ދެން ކޮން ކަމެއް ތޯ ސުއޫދު ސުވާލު އުފެއްދެވި އެވެ. 

އޭރުން ރައީސް މުއިއްޒު އަންގަވައިގެން ޖައްސަވާ ބެރައް ނަށަމުންދާ މަޖިލީސް އެކަން ހުއްޓާލާނެ އެވެ. ހަމަގައިމު ވެސް މިއީ އެމަނިކުފާނު ބޭނުންފުޅުވާނެ ގޮތެއް ނޫންތާ އެވެ. އެހެންވީމާ ސުއޫދު ވިދާޅުވި ގޮތަށް ހަގީގަތުގައި މިކަމާ މެދު އެންމެ ފުން ކޮށް ވިސްނާ، އެންމެ ބާރަށް ގޮސް ނޫނެކޭ ބުނަން ޖެހޭ ފުރަތަމަ ބޭފުޅަކީ ރައީސް މުއިއްޒެއް ނޫންތޯ އެވެ؟ 

ރެފަރެންޑަމް ބާއްވަން ނެރުއްވި ގަރާރުގައި އެކަށީގެންވާ ހުއްޖަތެއް ނެތް ކަމަށް ގާނޫނީ މާހިރުން ބުނާއިރު، މިއީ ހަމައެކަނި ބާރުތައް މަސްހުނިކޮށް، ރައީސް އޮފީހުގެ ތެރެއިން މުޅި ދައުލަތް ހިންގަން ކުރާ ކަމެއްގެ ގޮތުގައި ވަނީ ސިފަވެފަ އެވެ. ސުއޫދު ވިދާޅުވާ ފަދައިން، ބާރުތައް ވަކިކުރުމުގެ ވާހަކައަކީ މިއަދު "ދެކޮޅު ނުޖެހޭ" ވާހަކައެކެވެ. މަޖިލީހުގެ ރައީސަކު ހުރިކަމެއް ނުވަތަ ނެތްކަމެއް ވެސް ނޭނގޭ މިންވަރަށް ކަންކަން ގޮސްފައިވާއިރު، މިފަދަ ނިޒާމެއްގެ ތެރެއަށް ރައީސް މުއީއްޒު އަމިއްލަފުޅަށް ވެއްޓިވަޑައިގަންނަވަން އެމަނިކުފާނު ވެސް ބޭނުންފުޅެއް ނުވާނެތާ އެވެ. 

އެހެންކަމުން، ރައީސް މުއިއްޒު އެންމެ ފުރަތަމަ ވެސް ކުރައްވަންވީ ކަމަކީ މި ރެފަރެންޑަމަށް "ނޫނެކޭ" ވިދާޅުވުމެވެ. އެއީ ރައްޔިތުންގެ ހައްގުގައެއް ނޫނެވެ. ހަމަ އަމިއްލަފުޅު ސިޔާސީ މުސްތަގްބަލުގެ ސަލާމަތަށްޓަކައެވެ. އިދިކޮޅު މަޖިލީހަކުން ދީފާނެ "ރީތި ބޮނޑިއަކުން" ސަލާމަތްވެ، މަގާމުގައި ދެމިހުންނެވޭނީ އޭރުންނެވެ. ނޫންނަމަ، އިންތިޚާބު ނިމި، އުފާފާޅުކޮށް ނުނިމެނީސް "ގެއަށް ވަޑައިގަންނަވަން" ޖެހުމަކީ ދުރުގައި އޮތް ކަމެއް ނޫނެވެ.

ރައީސް އެވެ! ސުއޫދު އެ ދެއްވީ ހަމަ ހަގީގަތުގައި ވެސް ރަނގަޅު ނަސޭހަތެކެވެ. މި ކުޅިވަރުގެ ތެރެއިން އަމިއްލަފުޅު އަޒުލުވުމުގެ ސިޓީގައި ސޮއިނުކުރައްވާށެވެ! އަވަހަށް ސަލާމަތްވެވަޑައިގަންނަވާށެވެ!