ދެ އިންތިހާބު އެއްކުރުމަކީ ރައްޔިތުންގެ ބާރު ކަނޑުވާލުން: ބޮންޑާ
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ސަރުކާރުން ނަގާ ފެންނަ ނުފެންނަ ވޯޓަކީ ރައްޔިތުންގެ ބާރު ކަނޑުވާލައި، މަޖިލީހުގެ ޒިންމާތައް ހަނިކުރުމަށް ކުރާ ކަމެއް ކަމަށް ބޮންޑާ ވިދާޅުވެއްޖެ. މި ވޯޓަކީ ޑިކްޓޭޓަރޝިޕަކަށް މަގުފަހިކުރުމަށް ރޭވިފައިވާ ކަމެއްގެ ގޮތުގައި ސިފަކުރައްވައި، މިކަމާ ދެކޮޅަށް "ނޫނެކޭ" ބުނުމަށް އޭނާ ވަނީ ރައްޔިތުންނަށް ގޮވާލައްވާފަ. ސަރުކާރު ޖަވާބުދާރީ ކުރުވުމުގެ ބާރު ކަނޑުވާލުމަށް ކުރާ މި މަސައްކަތަކީ ޑިމޮކްރަސީގެ އުސޫލުތަކާ ޚިލާފު ކަމެއް ކަމަށްވެސް އޭނާ ފާހަގަކުރެއްވި.
ރާއްޖެ ޓީވީން ގެނެސްދޭ "ނޫނެކޭ" ކެމްޕެއިން ޕްރޮގްރާމްގައި ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވާހަކަ ދައްކަވަނީ. | ރާއްޖެ އެމްވީ
ހީލަތްތެރިކަމާއެކު މި ސަރުކާރުން ފެންނަ ނުފެންނަ ވޯޓެއް ނަގަގައިގެން ދެ އިންތާބު އެއްކޮށްލަން މަސައްކަތް ކުރަނީ ރައްޔިތުންގެ ބާރު ކަނޑުވާލަން ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
ހޯމަ ދުވަހުގެ ރޭ ރާއްޖެ ޓީވީން ފޮނުވި "ނޫނެކޭ" ކެމްޕެއިން ޕްރޮގްރާމްގައި ބައިވެރިވެވަޑައިގެން ވާހަކަދައްކަވަމުން ބޮންޑާ ވިދާޅުވީ އަވަސް އަރުވާލައިގެން ގާނޫނުތަކަށް ބަދަލުގެނެސްގެން ދެ އިންތިހާބު އެއްކޮށްލުމަށް ނަގާ ވޯޓަކީ ރައީސް މުއިއްޒުގެ ސަރުކާރުން ރައްޔިތުންގެ ބާރު ކަނޑުވާލަން ކުރާ ކަމެއް ކަމުގަ އެވެ.
ބޮންޑާ ވިދާޅުވީ ރައްޔިތުންގެ ބާރު ފެށޭ ހިސާބަކީ ރައްޔިތުން މަންދޫބުން އެކި ދާއިރާތަކުން ރައްޔިތުންގެ ފަރާތުން ރައްޔިތުންގެ މަޖިލީހަށް ފޮނުވައިގެން ކަމަށާއި އެމީހުންގެ ޒިންމާ އަކީ ސަރުކާރު ޖަވާބުދާރީ ކުރުވުން ކަމަށެވެ. ނަމަވެސް ސަރުކާރު ޖާވާބުދާރީ ކުރުވާ ރައްޔިތުންގެ މަޖިލީހަކީ ޑިކްޓޭޓަރުން ވަރަށް ޖެހިލުންވާ ތަނެއް ކަމުގައި ބޮންޑާ ވިދާޅުވި އެވެ. އަދި އެފަދަ ވެރިކަމެއްގަ ރައްޔިތުންގެ މަޖިލީހަކީ މާ ބޮޑު އަމިއްލަ ބާރެއް އޮތް ތަނެއް ނޫންކަން ތާރީހުން ހެކިދޭ ކަމަށާއި، ރާއްޖެ އިން ވެސް މިހާރު ފެނިގެންދާނީ ހުދުމުހުތާރު ވެރިން ބާރުތައް މުށުތެރެއަށް ޖަމާ ކުރާގޮތަށް ޖަމާކުރަމުންދާ މަންޒަރުކަމަށް ބޮންޑާ ސިފަކުރެއްވި އެވެ.
މިއީ ރައްޔިތުންގެ ބާރު ކަނޑުވާލަން ކުރާ ކަމެއް. ރައްޔިތުންގެ ބާރު ފެށޭ ހިސާބަކީ ރައްޔިތުންގެ މަންދޫބުން ތަކެއް ރައްޔިތުންގެ ފަރާތުން އެކި ރަށްރަށުން އެކި އަތޮޅުތަކުން، އެކި ދާއިރާތަކުން ރައްޔިތުންގެ މަޖިލީހަށް ފޮނުވައިގެން. އެމީހުންގެ ޒިންމާ އަކީ ސަރުކާރު ޖަވާބުދާރީ ކުރުވުން.އެއީ ވެރިކަންހިންގާ ޑިކްޓޭޓަރުން ވަރަށް ބިރުގަންނަ ކަމެއް. އަޅުގަނޑުމެން މިރާއްޖޭގަ ޑިކްޓޭޓަރޝިޕެއް ތަޖުރިބާ ކޮށްފިން. އޭރުގަ ނޭނގެ މިރާއްޖޭގަ މަޖިލީހެއް އޮންނަ ކަމެއް ވެސް. ރައްޔިތުންގެ ހައްގުގަ ވަކާލާތުކުރާ މީހެއް އޭރުގަ ލަނީ ޖަލަށް. އަނދަގޮނޑިޖަހަނީ. އެހެންވީމަ މިހާރު މުއިއްޒު ކަހަލަ ޑިކްޓޭޓަރަކަށް ސަރުކާރު ޖަވާބުދާރީ ކުރުވާނެ ރައްޔިތުންގެ މަޖިލީހެއް އޮތުމަކީ އޭނަ އަށް ވަރަށް ބޮޑު ބިރެއް. ފުރަތަމަ މަރުހަލާގަ ރައްޔިތުންގެ މަޖިލީހުގެ ބާރުކަނޑުވާލައިފި. މަޖިލީހުގެ ވަކި ވަކި މެމްބަރުން. ރައްޔިތުންގެ ހައްގުގަ ވާހަކަ ދައްކާ މީހުންގެ ދުވަސް ދުއްވާލީ. މިހާރު ތިބީ އަނގަ ބަންދުކޮށްފަ. ދެން ސްޕްރީމް ކޯޓުގެ ބާރު ކަނޑުވާލީ.ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ)
ރައްޔިތުންގެ މަޖްލިސް އުވާލުމުގެ ބާރު ސަރުކާރަށް ނެތީމަ، މަޖިލީހުގެ ބާރު ކަނޑުވާލަން ރައީސް މުއިއްޒު ވަނީ ރައްޔިތުންގެ މަޖްލިސް ކުރުގަޅުވާލާފަ ކަމަށް ބޮންޑާ ވިދާޅުވި އެވެ. ބޮންޑާ ވިދާޅުވީ ރައްޔިތުންގެ މަޖްލިސް މިހާރު މަސައްކަތް ކުރަނީ ކުޑައެއް ހުޅުވާ ލައްޕާ ބީދައިން ކަމާ، އަދި އެ ކުޑަ ހުޅުވުމާ ލެއްޕުން ކޮންޓްރޯލް ކުރަނީ ރައީސް މުއިއްޒުޒެ އަތްޕުޅުގަ އޮންނަ ބަޓަނަކުން ކަމަށެވެ.
ބޮންޑާ ވަނީ ސަރުކާރުން ރައްޔިތުންގެ ކަނު ބަނދެފަ މި ނަގާ ވޯޓުގަ ހުރިހާ ރައްޔިތުން ވެސް ބޮޑުތަނުން ނޫނެކޭ ބުނުމަށް ގޮވާލާފަ އެވެ.
