ދެ އިންތިހާބު އެއްކޮށްލައި މުއިއްޒު އުޅުއްވަނީ ރާއްޖޭގެ ވެރިކަމުގެ ނިޒާމު ރަސްކަމަކަށް ބަދަލުކުރަން: މަލީހު
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ސަރުކާރުން ކުރާ މަސައްކަތަކީ ޚަރަދު ކުޑަކުރުމުގެ ނަމުގައި ރައްޔިތުންނަށް އޮޅުވާލައިގެން، ގާނޫނުއަސާސީގެ ބާރު ކަނޑުވާލުމަށް ކުރާ ކަމެއް ކަމަށް މަލީހު ޖަމާލު ތުހުމަތު ކުރެއްވި. މި ބަދަލާއެކު ދައުލަތުގެ ތިން ބާރު އެކުވެ، ރާއްޖޭގެ ޑިމޮކްރެޓިކް ނިޒާމު ގެއްލިގެންދާނެ ކަމަށާއި، މިއީ ރިޔާސީ މެނިފެސްޓޯގައި ވެސް ނެތް ކަމެއްކަން އޭނާ ފާހަގަކުރެއްވި. އެހެންކަމުން ގައުމުގެ އިގްތިސާދު ހީނަރުވެފައިވާ މި ދަނޑިވަޅުގައި، ރިފަރަންޑަމެއް ބޭއްވުމުގެ ބަދަލުގައި ރައްޔިތުންނަށް ވީ ވައުދުތައް ފުއްދުމަށް މަލީހު ގޮވާލެއްވި.
ޕީއެންއެފްގެ ސެކްރެޓަރީ ޖެނެރަލް މަލީހު ޖަމާލު | ރާއްޖެ އެމްވީ
ދެ އިންތިހާބު އެއްކޮށްލައި ރައީސް ޑރ. މުހައްމަދު މުއިއްޒު އުޅުއްވަނީ ރާއްޖޭގެ ވެރިކަމުގެ ނިޒާމު ރަސްކަމަކަށް ބަދަލުކުރަން ކަމަށް ޕީއެންއެފްގެ ސެކްރެޓަރީ ޖެނެރަލް މަލީހު ޖަމާލު ވިދާޅުވެއްޖެ އެވެ.
ޕީއެންއެފް އިން ބޭއްވި ނޫސްވެރިންގެ ބައްދަލުވުމުގައި މަލީހު ވިދާޅުވީ ކުއްލިއަކަށް ފެންނަ ނުފެންނަ ވޯޓެއް ޚާއްޞަ ގޮތެއްގައި ދެ އިންތިޚާބެއް އެއްކުރުމުގެ ވާހަކައެއް މި ދައްކާއިރު މިއީ ދެ އިންތިޚާބެއް އެއްކުރުމުގެ ވާހަކައެއް ނޫން ކަމަށެވެ. ސަރުކާރުން ދެތިން ވާހަކައެއް ރައްޔިތުން އޮޅުވާލުމަށްޓަކައި އެބަ ދައްކަވާ ކަމަށް އޭނާ ވިދާޅުވި އެވެ. އެއް ވާހަކައަކަށް މި ބުނަނީ ދެ އިންތިޚާބެއް އެއްކޮށް ބޭއްވުމުން ވަރަށް ޚަރަދު ކުޑަވެގެންދާނެ ކަމަށް ކަމަށާއި، ނަމަވެސް އިންތިޚާބުތަކަށް ޚަރަދެއް ކުރަންޖެހޭ ކަމުގައި ވާނަމަ އެއްވެސް އިންތިޚާބެއް ނުބާއްވުމުން ހަރަދު ކުޑަވާނެ ކަމަށް މަލީހު ވިދާޅުވި އެވެ.
ޙަޤީޤަތުގައި ރިފަރަންޑަމޭ ކިޔައި ރައްޔިތުންގެ މަޖިލީހުގެ ދައުރު ކުރުކޮށް ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބޭއްވުމަކީ މި ވަގުތު ޤާނޫނުއަސާސީ އޮތް ގޮތުން، ކުރެވޭނެ ކަމެއް ނޫން ކަމަށް މަލީހު ވިދާޅުވި އެވެ. ޤާނޫނުއަސާސީގެ މުޅި ބާރު، ޤާނޫނުއަސާސީ އެކުލަވާލާފައިވާ މުޅި ދުސްތޫރީ އެއް ވިސްނުން އެއްކޮށް ފުނޑިގެންދާ މަންޒަރު ފެންނަ ކަމަށް އޭނާ ވިދާޅުވި އެވެ.
ޤާނޫނުއަސާސީގެ ހަތަރު ވަނަ މާއްދާ، ރައީސުލްޖުމްހޫރިއްޔާގެ ވާހަކަ އައުމުގެ ކުރިން އޮތީ ރައްޔިތުންގެ ބާރުގެ ވާހަކަ، ޤާނޫނުއަސާސީގެ ހަތަރު ވަނަ މާއްދާގައި ރައްޔިތުންގެ ބާރު އެހައި ކުރިއަށް މި ލީ ކީއްވެގެންތޯ؟ ރައްޔިތުންގެ ބާރަކީ ކޮބައިތޯ؟ ރައްޔިތުންގެ ބާރަކީ ވޯޓުލުމުގެ ޙައްޤު. ވޯޓުލާން އެދާންޖެހޭ ދިޔުން އިނގޭތޯ. މުޅި ޤާނޫނުއަސާސީގެ މުޅި މަފްހޫމަކަށް، މުޅި ވިސްނުމަކަށް ވެފައި އޮތީ ތިން ބާރު ވަކިވެފައިވާ މިނިވަން ޑިމޮކްރާތީ ރާއްޖެއަކަށް ރާއްޖެ ގެންދިއުން. އެ މުޅި މަފްހޫމާ ޚިލާފަށް ޑިކެޓޭޓަރ ޑރ. މުހައްމަދު މުޢިއްޒު މި އުޅުއްވަނީ ދިވެހިރާއްޖެ ކިންގްޑަމަކަށް ހެދުމަށްޓަކައި. މި ރިފަރަންޑަމް ވޯޓު ކާމިޔާބުވެގެން ގޮއްސިއްޔާ، ދެން އޮންނާނެ ބާރުތަކަކީ، ރައްޔިތުންގެ މަޖިލީހުގެ ބާރު، ރައީސުލްޖުމްހޫރިއްޔާ ހިންގުމުގެ ބާރު، މިނިވަންކަމަށް، ޤާނޫނުއަސާސީގެ ޖުޑިޝަރީގެ ބާރު، މިހެން ނޫން. މިގޮތަށް މި ރިފަރަންޑަމް ފާސްވެގެން ގޮއްސިއްޔާ، ރާއްޖޭގައި އޮންނާނީ، މުޢިއްޒު އެއީ އެއް ބާރު، ސާޖިދާ އެއީ އަނެއް ބާރު، ފަލާހު އެއީ އަނެއް ބާރު، މި ތިން ބާރުގެ މައްޗަށް. އޭގެތެރެއިން ސާޖިދާއާއި މުޢިއްޒާ އެއްބާރުލެއްތޯ ހަމަ އެގޮތަށް މިވަނީ. އެހެންވީމާ، މަޖިލީހާއި އެގްޒެކްޓިވް ބްރާންޗް، ނޫނީ ރައީސުލްޖުމްހޫރިއްޔާ އެއްކުރަން އުޅޭ އުޅުމެކޭ މި އުޅެނީ.ޕީއެންއެފްގެ ސެކްރެޓަރީ ޖެނެރަލް މަލީހު ޖަމާލު
މަލީހު ވިދާޅުވީ ރިޔާސީ އިންތިޚާބަށް ބޮޑުސިންގާ ކިތާބުލް ބުހުތާނު ގެންދެވިއިރު މި ކިތާބުލް ބުހުތާނުގެ ފަސްސަތޭކަ ސަފްހާގެ އެއްވެސް ސަފްހާއެއްގައި ދެ އިންތިޚާބު އެއްކުރަން ނެތް ކަމަށް މަލީހު ފާހަގަކުރެއްވި އެވެ.
ރިޔާސީ ދައުރެއްގެ މެދުތެރެއިން ކުންފުންޏެއް ހިންގާ ގޮތަށް ޤައުމު ވެސް މި ހިންގަނީ ކަމަށާއި މިއަދު އޮތީ ރައްޔިތުންގެ މަޖިލިސް ޕެރެލައިޒްކޮށްފައި ކަމަށް މަލީހު ވިދާޅުވި އެވެ. ރާއްޖޭގެ އިޤްތިޞާދު އެއޮތީ އެއްކޮށް ފުނޑުފުނޑުވެފައި ކަމަށާއި ޑިކްޓޭޓަރ މުޢިއްޒު ރައްޔިތުންނަށް ވެވަޑައިގެންނެވި އެއްވެސް ވަޢުދަކަށް ހުރުމަތްތެރިކޮށް ނުހިއްތަވައި ޕެޓްރޯލްގެ އަގު އެހެރީ ޑޮލަރަކަށްވުރެ މަތީގައި ކަމަށް އޭނާ ވިދާޅުވި އެވެ.
