އޭޕްރީލް މަހުން ފެށިގެން ކުދިން ފޮސްޓަރ ކުރާ ފަރާތްތަކަށް ވިހެއުމުން ލިބޭ ފަދަ ޗުއްޓީއެއް ލިބޭނެ - މިނިސްޓަރު
ދައުލަތުގެ ބެލުމުގެ ދަށުގައި ތިބޭ ކުދިން ފޮސްޓަރކުރާ (ކުދިން ބެލުމުގެ ޒިންމާ ނަގާ ފަރާތްތަކަށް ނުވަތަ ޢާއިލާއަކަށް) އާއިލާތަކަށް، ވިހެއުމުން ލިބޭ ފަދަ ޚާއްސަ ޗުއްޓީއެއް އަންނަ އޭޕްރީލް މަހުން ފެށިގެން ދިނުމަށް ސަރުކާރުން ވަނީ ނިންމާފަ. މީގެ އިތުރުން، ފޮސްޓަރކުރާ އާއިލާތަކުގެ ތެރެއިން މާލީ އެހީތެރިކަން ބޭނުންވާ ފަރާތްތަކަށް ކޮންމެ ކުއްޖަކަށް މަހަކު 5،000 ރުފިޔާގެ އެލަވަންސެއް ދިނުމަށް ވެސް ވަނީ ހަމަޖެހިފަ. މި ނިންމުންތަކަކީ ކުދިންނާއި އާއިލާތަކުގެ މެދުގައި އޮންނަ ގުޅުން ބަދަހިކޮށް، ކޮންމެ ކުއްޖަކަށް އާއިލީ ވެއްޓެއް ހޯދައިދިނުމަށް ކުރާ މަސައްކަތުގެ ބައެއް.
ރައީސް ޑރ. މުހައްމަދު މުއިއްޒުގެ އިޖުތިމާއީ އަދި އާއިލީ ތަރައްގީއާ ބެހޭ މިނިސްޓަރު ޑރ. އައިޝަތު ޝިހާމް | ރައީސް އޮފީސް
އަންނަ އޭޕްރީލް މަހުން ފެށިގެން ތުއްތުކުދިން ފޮސްޓަރކުރާ ފަރާތްތަކަށް، އަންހެނުން ވިހެމުން ލިބޭ ފަދަ ޚާއްސަ ޗުއްޓީއެއް ދިނުމަށް ނިންމާފައިވާ ކަމަށް ރައީސް ޑރ. މުހައްމަދު މުއިއްޒުގެ އިޖުތިމާއީ އަދި އާއިލީ ތަރައްގީއާ ބެހޭ މިނިސްޓަރު ޑރ. އައިޝަތު ޝިހާމް ވިދާޅުވެއްޖެ އެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ ދައުލަތުގެ ބެލުމުގެ ދަށުގައި ތިބޭ ތުއްތުކުދިން ފޮސްޓަރކުރާ ފަރާތްތަކަށް، (ކުދިން ބެލުމުގެ ޒިންމާ ނަގާ ފަރާތްތަކަށް ނުވަތަ ޢާއިލާއަކަށް) އަންހެނުން ވިހެމުން ލިބޭ ފަދަ ޚާއްޞަ ޗުއްޓީއެއް ދިނުމަށް ސަރުކާރުން ނިންމާފައިވާ ކަމަށެވެ.
އަންނަ އޭޕްރީލް މަހުން ފެށިގެން އެކަން ހަމަޖެހިގެން ދާނެ ކަމަށާއި އެކަން ކުރުމަށް ސަރުކާރުން ނިންމާފައި ވަނީ އާއިލާތަކަށް އެ ކުދިންނާއެކު ވަގުތު ހޭދަކޮށް، ގާތް ގުޅުމެއް އުފެއްދުމަށް ފުރުސަތު ދިނުމުގެ ގޮތުން ކަމަށެވެ.
ކޮންމެ ކުއްޖަކީ ވެސް އާއިލީ ވެއްޓެއްގެ ހިމާޔަތާއި ރައްކާތެރިކަން ލިބިގެން، އާއިލީ ގުޅުންތަކުގެ ތެރެއިން ބޮޑުވާ ކުދިންކަން ކަށަވަރުކުރުމަށް މަސައްކަތްކުރާ ކަމަށް މިނިސްޓަރު ވިދާޅުވި އެވެ. އެކަމަށްޓަކައި، ކޮންމެ ކުއްޖަކަށް އާއިލާއެއް ނަމުގައި ޚާއްސަ ޕްރޮގްރާމެއް ކުރިއަށް ގެންގޮސް، މިހާތަނަށް ދައުލަތުގެ ބެލުމުގެ ދަށުގައި ތިބި 111 ކުދިންނަށް އާއިލީ ވެއްޓެއް ހޯދައިދެވިފައިވާ ކަން މިނިސްޓްރީ އިން ވަނީ ހާމަ ކޮށްފަ އެވެ.
އެ ބައްދަލުވުމުގައި މިނިސްޓަރު ވިދާޅުވީ ކުދިން ފޮސްޓަރ ކުރާ އާއިލާތަކުގެ ތެރެއިން މާލީ އެހީތެރިކަން ބޭނުންވާ އާއިލާތައް ވެސް ފާހަގަ ކުރެވިފައިވާ ކަމަށެވެ. އަދި އެފަދަ އާއިލާތައް އައިޑެންޓިފައި ކޮށް، ބަލަން ޖެހޭ ކަންކަން ބެލުމަށް ފަހު ކޮންމެ ކުއްޖަކަށް މަހަކު 5،000 ރުފިޔާގެ އެލަވަންސެއް ދިނުމަށް ވެސް ހަމަޖައްސާފައިވާ ކަމަށެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި، ޖެންޑަރ މިނިސްޓަރު އާއިޝަތު މުހައްމަދު ދީދީގެ ބެއްލެވުމުގެ ދަށުން ވަނީ ދައުލަތުގެ ބެލުމުގެ ދަށުގައި ތިބޭ ކުދިން ފޯސްޓަރ ކުރުމާގުޅޭ ޚާއްސަ ޕްރޮގްރާމެއް ފަށާފަ އެވެ. މި ޕްރޮގްރާމް ވަރަށް ކާމިޔާބު ކަމާއެކު ކުރިއަށް ގެންގޮސް، މިކަމަށް އާއްމު ރައްޔިތުން ވަރަށް ބޮޑަށް ހޭލުންތެރި ކޮށްފައި ވެ އެވެ. ނަމަވެސް ސަރުކާރުން ބަދަލުވެގެން ދިިއުމާއެކު، މިސަރުކާރުން ވަނީ ފޯސްޓަރ ޕްރޮގްރާމްގެ ނަން ބަދަލުކޮށް، ''ކޮންމެ ކުއްޖަކަށް އާއިލާއެއް'' ނަމުގައި ޕްރޮގްރާމެއް ފަށާފަ އެވެ.
