ދެ އިންތިހާބު އެއްކޮށްލުމަށް ގާނޫނުއަސާސީ އަށް ގެނެވުނު އިސްލާހަކީ ދުސްތޫރީ ޝަރުޢިއްޔަތު ލިބިގެންވާ އިސްހާލެއް ނޫން: ކުރީގެ އުއްތަމަ ފަނޑިޔާރު ޑރ. އަބްދުﷲ ދީދީ

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމަށް ޤާނޫނުއަސާސީ އަށް ގެނެވުނު އިސްލާހަކީ ދުސްތޫރީ ޝަރުޢިއްޔަތު ނުވަތަ ކޮންސްޓިޓިޔުޝަނަލް ލެޖިޓިމެސީ ލިބިގެންވާ އިސްލާހެއް ނޫންކަމަށް ރާއްޖޭގެ ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވެއްޖެ އެވެ. 

އަންގާރަ ދުވަހުގެ ރޭ ރާއްޖެ ޓީވީން ފޮނުވި ނޫނެކޭ ކެމްޕެއިން ޕްރޮގްރާމްގައި ބައިވެރިވެވަޑައިގެން ވާހަކަ ދައްކަވަމުން ޑރ. އަޙްމަދު އަބްދުﷲ ދީދީ ވިދާޅުވީ އެޕްރީލް ހަތަރުވަނަ ދުވަހު ބާއްވާ "ފެންނަ ނުފެންނަ ވޯޓު"ގައި ރައްޔިތުން ނޫނެކޭ ބުނަންޖެހޭ އެންމެ ބޮޑު ސަބަބަކީ މި އިސްލާހަށް ކޮންސްޓިޓިއުޝަނަލް ލެޖިޓިމެސީ ލިބިގެންނުވުން ކަމަށެވެ.

އެކަން ތަފްސީލުކޮށް ދެއްވަމުން ޑރ. އަބްދުﷲ ދީދީ ވިދާޅުވީ ޤާނޫނުއަސާސީ އަށް ގެނެވޭ އެއްވެސް އިސްލާހަކަށް އިޖްރާއީ ނުވަތަ ފޯރމަލް ކޮންސްޓިޓިޔުޝަނަލް ލެޖިޓިމެސީގެ އިތުރުން މައުޟޫޢީ ނުވަތަ ސަބްސްޓެންޓިވް ލެޖިޓިމެސީ ލިބިގެންވުން ލާޒިމްވެގެންވާ ކަމަށެވެ.

ކުރީގެ އުއްތަމަ ފަނޑިޔާރު ވިދާޅުވީ ދެ އިންތިޚާބު އެކުގައި ބޭއްވުމަށް ޤާނޫނުއަސާސީ އަށް ގެނެވުނު އިޞްލާޙަކީ ދުސްތޫރީ އަދި ޤާނޫނީ އިޖްރާއާތުތަކަށް އިޙްތިރާމް ކުރުމަކާ ނުލައި ޤާނޫނުއަސާސީގެ ބާރު ކަނޑުވައިލުމަށް ގެނެސްފައިވާ "އެބިއުސިވް" ތަޢައްސުފީ އިޞްލާޙެއް ކަމާމެދު އެއްވެސް ޝައްކެއް ނެތް ކަމަށެވެ.

ޑރ. އަޙްމަދު އަބްދުﷲ ދީދީ ވިދާޅުވީ މިކަމަކީ ރައީސުލްޖުމްހޫރިއްޔާގެ ފުރިހަމަ ކޮންޓްރޯލް އޮންނަ ރައްޔިތުންގެ މަޖިލީސް ބޭނުންކޮށްގެން ދައުލަތުގެ މުއައްސަސާތައް ހިސޯރުކުރުމަށް ޤާނޫނުއަސާސީއަށް ގެނައި ބަދަލެއް ކަމަށެވެ. އަދި މި އިޞްލާޙުގެ މައުޟޫޢީ ލެޖިޓިމެސީ ނެތި އޮޅުވާލައިގެން ހިންގާ ބޮޑު ކޮންސްޓިޓިއުޝަނަލް މެނިޕިއުލޭޝަނެއް ކަމަށް ވެސް އެމަނިކުފާނު ވިދާޅުވިއެވެ.

ދުސްތޫރީ އިލްމުވެރިން ވިދާޅުވަނީ މައުޟޫއީ ލެޖިޓިމެސީ ގެއްލިގެންދާ ދެ ހާލަތެއް ވެޔޭ.. އެއީ ރައީސުލްޖުމްހޫރިއްޔާގެ އަމިއްލަ މަސްލަހަތަކަށްޓަކައި.. ރައީސުލްޖުމްހޫރިއްޔާ ކޮންޓްރޯލްކުރާ މަޖްލިސް މެޖޯރިޓީ އެއް އޮނައިރާއި،.. އެ މެޖޯރިޓީ ބޭނުންކޮށްގެން ގާނޫނު އަސާސީ ބަދަލުކޮށްގެން،..  ދައުލަތުގެ ބާރުތަކާއި މުއައްސަސާތައް ކޮންޓްރޯލް ކުރުމުގެ ބޭނުމުގަ މި ގެންނަ ބަދަލަކީ މައުޟޫއީ ލެޖިޓިމެސީ ގެންލިގެންދާ ކަމެއް... އެޔަށް ދުސްތޫރީ އިލްމުވެރިން ވިދާޅުވަނީ އެއީ ކޮންސްޓިޓުޓަޝަނަލް މެނިޕިއުލޭޝަން އެކޭ... އެއީ އޮޅުވާލުމެއް...ގާނޫނުއަސާސީ އާއި ކުޅުމޭ... ކޮންޓްރޯލް ކުރުމަށްޓަކައި، ނޫނީ ކެޕްޗަރ ކުރުމަށްޓަކައި، ދައުލަތުގެ މުއައްސަސާތައް.

ރާއްޖޭގެ ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ

ރައީސް މުއިއްޒުގެ ސަރުކާރުން ދަނީ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމަށް ޤާނޫނުއަސާސީއަށް ގެނައި އިޞްލާޙަށް ރައްޔިތުންގެ ރުހުން ހޯދުމަށް ވަރުގަދަ ކެމްޕެއިން ތަކެއް ކުރަމުންނެވެ. 

އަނެއްކޮޅުން ދެ އިންތިހާބު އެއްކޮށްލުމާ ދެކޮޅަށް އިދިކޮޅު މައި ޕާޓީ އެމްޑީޕީން ދަނީ ވަރުގަދަ ކެމްޕެއިނެއް މުޅި ރާއްޖޭގައި ހިންގަމުންނެވެ. ސަރުކާރާއި އިދިކޮޅު ފަރާތްތަކުން ތުހުމަތުކުރާ ގޮތުގައި، އިންތިހާބުތަކަށް މިފަދަ ބަދަލެއް ގެންނަން ސަރުކާރުން އުޅެނީ ރައްޔިތުންގެ ފަރާތުން ސަރުކާރަށް އޮންނަ ފާރަވެރިކަން ކުޑަ ކުރުމަށެވެ. އަދި ސިޔާސީ ނުފޫޒު ގަދަކޮށް، ރާއްޖޭގައި ޒަމާންތަކަކަށް ދެމިގެންދާނެ ހުދުމުހުތާރު ވެރިކަމެއް ގާއިމުކުރުމަކީ މި ބަދަލުގެ އަސްލު މަގުސަދު ކަމަށް އިދިކޮޅު ފަރާތްތަކުން ބުނެ އެވެ.