ސަރުކާރުން އުޅެނީ މުއިއްޒު ބޭނުންފުޅުވާ ކޮންމެ ވަގުތެއްގައި މަޖިލިސް އުވާލެވޭނެ ފަދަ ހީލަތެއް ހަދަން: ބޮންޑާ
ރައްޔިތުންގެ މަޖިލީހާއި ކައުންސިލްތަކުގެ ބާރުތައް ކަނޑުވާލައި، ރައީސުލްޖުމްހޫރިއްޔާ ބޭނުންފުޅުވާ ވަގުތެއްގައި މަޖިލިސް އުވާލެވޭ ގޮތަށް ގާނޫނުއަސާސީއަށް ބަދަލު ގެންނަން އުޅޭ ކަމަށް ބޮންޑާ ތުހުމަތު ކުރެއްވި. ސަރުކާރު ހިންގާ ޕާޓީގައި ޑިމޮކްރެޓިކް އުސޫލުތަކެއް ނެތްކަން ފާހަގަކުރައްވައި، އޭނާ ވިދާޅުވީ މި ބަދަލުތަކުގެ ސަބަބުން މެންބަރުންނަށް ސަރުކާރު ޖަވާބުދާރީ ކުރުވުމުގެ ފުރުސަތު ގެއްލިގެންދާނެ ކަމަށް. އެހެންކަމުން، ރައްޔިތުންގެ ހައްގުތައް ހިމާޔަތްކުރުމަށްޓަކައި ކުރިއަށް އޮތް އިންތިޚާބުގައި ސަރުކާރަށް "ނޫނެކޭ" ބުނަންޖެހޭ ކަމަށް އޭނާ ގޮވާލެއްވި.
މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) | ރާއްޖެ އެމްވީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މަސައްކަތް ކުރަމުންދަނީ ރައްޔިތުންގެ މަޖިލީހުގެ ބާރުތައް ކަނޑުވާލައި، ރައީސުލްޖުމްހޫރިއްޔާ ބޭނުންފުޅުވާ ކޮންމެ ވަގުތެއްގައި މަޖިލިސް އުވާލެވޭނެ ފަދަ ހީލަތްތެރި ރޭވުމެއްގެ ދަށުން ކަމަށް މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
އޭނާ މިހެން ވިދާޅުވީ ސަރުކާރުން ގެންނަން އުޅޭ ބަދަލުތަކާ ގުޅޭގޮތުން ކަންބޮޑުވުން ފާޅުކުރައްވައި އެމްޑީޕީގެ ކަންމަތީ ޖަލްސާގައި ވާހަކަ ދައްކަވަމުންނެވެ. އިބްރާހީމް ރަޝީދު ވިދާޅުވީ، މިހާރު ފެންނަމުންދަނީ ރައީސުލްޖުމްހޫރިއްޔާގެ އިޚްތިޔާރުގެ ދަށުން ޕާލިމަންޓު އުވާލުމަށް ކުރަމުންދާ މަސައްކަތްތަކެއް ކަމަށެވެ. އަދި މި ވަގުތު ރައްޔިތުންގެ އަޑުއަހައި، ޑިމޮކްރެޓިކް އުސޫލުން ވާހަކަދައްކަން އޮތް ހަމައެކަނި ސިޔާސީ ޕާޓީއަކީ އެމްޑީޕީ ކަމަށާއި، އެއީ ރާއްޖޭގައި ޑިމޮކްރެޓިކް އުސޫލުތައް އަށަގެންނެވި ޕާޓީ ކަމަށް އޭނާ ފާހަގަކުރެއްވި އެވެ. މީގެ އިތުރުން ޕީއެންސީއަކީ ސިޔާސީ ޕާޓީއެއް ނޫން ކަމަށާއި، އެ ޕާޓީގައި ރައީސާ ދެކޮޅަށް ބަހެއް ބުނާ މީހަކު ޕާޓީން ވަކިކުރަމުންދާ ކަމަށްވެސް އޭނާ ވިދާޅުވި އެވެ.
މަޖިލިސް މެންބަރުންގެ ޒިންމާއަކީ ރައީސުލްޖުމްހޫރިއްޔާ އާއި ވަޒީރުން ޖަވާބުދާރީކުރުވުން ކަމަށާއި، އެ ބޭފުޅުން ވައްކަން ކުރޭތޯ ބެލުމަކީ ރައްޔިތުންގެ މަންދޫބުންގެ މަސްއޫލިއްޔަތެއް ކަމަށް އޭނާ ވިދާޅުވި އެވެ. ނަމަވެސް މިހާރު ފެންނަނީ މެންބަރުން ބަހެއް ބުނާއިރަށް ވަކިކުރެވޭ ގޮތަށް ކަންކަން ބަދަލުކުރަމުންދާ މަންޒަރު ކަމަށާއި، އެހެންކަމުން ކުރިއަށް އޮތް އިންތިޚާބުގައި ސަރުކާރަށް "ނޫނެކޭ" ބުނަންޖެހޭ ކަމަށް އޭނާ ވިދާޅުވި އެވެ. ޕީއެންސީގައި ވެސް އަދި ކައުންސިލްތަކަށް ވާދަކުރާ ކެންޑިޑޭޓުންގެ ވެސް ރައްޔިތުންގެ ހައްގުގައި ވަކާލާތު ކުރާނެ ޑިމޮކްރެޓިކް ކެންޑިޑޭޓުން ނެތް ކަމަށް އޭނާ ވިދާޅުވި އެވެ.
މި އިންތިޚާބަށް ތައްޔާރުވަމޭ ރައްޔިތުންގެ ބޮލަށް ޗިޕުޖަހަން، ރައްޔިތުންނަށް އޮޅުވާލަން އެމް.ޑީ.ޕީ ބަދުނާމުކުރަން. ނުވަތަ ކައުންސިލުގައި ތިބި ފަރާތްތައް އަތޮޅު ކައުންސިލާ އެކިއެކި ތަންތާ ތިބި މޭޔަރުންނަށް، މާލެ ސިޓީގެ މޭޔަރު، ކުޅުދުއްފުށީ މޭޔަރު، އައްޑޫ މޭޔަރު، މި ހުރިހާ އެންމެންގެ ފަރާތުން ލިބެމުންދިޔަ ޚިދުމަތްތައް؛ އެލް.ޖީ.އޭ ކިޔާ ތަނެއްގައި އޮންނާނީ އޮތޯރިޓީއެއް. އެއީ ކުރީގެ ނަމަ، އެއީ މާލޭގައި ހުންނަ އެޓޯލްސް. އާދެ! ޝަރީފެއް ކިޔާ މީހަކު ހުންނާނީ. އެޓޯލްސްގެ ބެލުމުގެ ދަށަށް ހުރިހާ ބާރުތަކެއް ގެނެސް، ބަޖެޓުތައް ނުދީ، ދަނޑުވެރިކަން ކުރާނެ، ނުވަތަ މަސްވެރިކަން ކުރާނެ. ނުވަތަ މަސްހިއްކަން ދީފައި ހުރި ބިންތަކާއި ހުރިހާ އެއްޗެއް ސަރުކާރަށް ނެގީ. ކައުންސިލުގެ ބާރު ކަނޑުވާލީ، އަތޮޅު ކައުންސިލު އުވާލީ. އަތޮޅު ކައުންސިލު އުވާލާފައި، އައިލެންޑް ކައުންސިލުތައް އުވާލީމާ ދެން ކޯޗެއްތޯ އޮންނާނީ؟މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ)
މަޖިލީހުގެ ދައުރާ ގުޅޭގޮތުން ވާހަކަދައްކަވަމުން ބޮންޑާ ވިދާޅުވީ، ގާނޫނުއަސާސީގައި މަޖިލީހުގެ ދައުރަކީ ފަސް އަހަރު ކަމަށް ސާފުކޮށް ބަޔާންކޮށްފައި އޮތް ނަމަވެސް، މިހާރު ގެންނަން އުޅޭ އިސްލާހުގެ ސަބަބުން އެއް މަސްދުވަހުގެ ތެރޭގައި ރައީސުލްޖުމްހޫރިއްޔާއަށް މަޖިލިސް އުވާލުމުގެ ބާރު ލިބިގެންދާނެ ކަމަށެވެ. މިއީ ރައްޔިތުންނަށް އޮޅުވާލައިގެން ހިންގާ ވަރަށް ބޮޑު ހީލަތެއް ކަމަށާއި، މި ބަދަލު ފާސްވެއްޖެނަމަ ކުރިއަށް އޮތް ތަނުގައި އިންތިޚާބުތަކުގައި ކެންޑިޑޭޓުންނެއް ނުފެންނާނެ ކަމަށާއި، ފެންނާނީ ހަމައެކަނި ރައީސުލްޖުމްހޫރިއްޔާ ކަމަށް އޭނާ ވިދާޅުވި އެވެ.
